Mazmure 22 - Geeshsha Maxaafa

Xillo Asa Metonne Ufaysi

“Guura gen7e” geetetiya diitha cuudhethan yexetida mazmure

¹ Ta Xoossaw, ta Xoossaw, tana ayis aggadii? Tana maadda gada ta nena woossiya wode, ayis taape haakay?

² Ta Xoossaw, gallas kumethi ta neeko waassas; shin ne tana allaka. Qamma ubban neeko waassayis, shin wopatethi demmike.

³ Gidoshin neeni geeshshi; Isra7eele galatay ne araata yuushon de7ees.

⁴ Nu aawati nenan ammanetidosona; nenan ammanetin, ne enta ashshadasa.

⁵ Neeko waassidi attidosona; nenan ammanetidi yeellatibookona.

⁶ Shin ta ase gidike; guxune; ta asan kadhetidaysanne boretidaysa.

⁷ Tana be7iya ubbay qelqisoosona; banta huuphiya qaathishe dereeqosona.

⁸ “I Godan ammanetis; ane iya asho; Goday iya dosiko, ane iya asho” yaagosona.

⁹ Gidoshin taani ta aaye ulope suure yeletanaada oothiday nena. Ta aaye dhantha dhammiya wodeka tana naagiday nena.

¹⁰ Ta yeletoosope doomada nenan diccas; ta aaye ulope doomin ne ta Xoossaa.

¹¹ Metoy taako matiya gishonne tana maaddiya asi bayna gisho, ha77i neeni taape haakofa.

¹² Daro morketi qayciya boorada tana teqidosona; qayciya Baasane kormatada tana oykidosona.

¹³ Mentherethidi gudiya gaammoda banta doona ta bolla dooyosona.

¹⁴ Taani haathada goggas; ta meqethay ba kesuwape keyis; ta wozanay oysada ta gaathan til7is.

¹⁵ Ta qoodhey kun7ada melis; ta inxarsay kottonuwara oyketis; ne tana hayqida asada baanan yeggadasa.

¹⁶ Kanati tana teqidosona; iita asati ta yuushuwa oykidosona; ta kushetanne ta tohota caddoosona.

¹⁷ Ta meqethati taybetoosona; ta morketi tana dereeqosona.

¹⁸ Ta ma7uwa shaakidi ekoosona; ta adussa ma7uwa bolla saama yeggoosona.

¹⁹ Ta Godaw, ne ta matay taape haakofa; Ta wolqaw, tana maaddanaw ellesada haaya.

²⁰ Tana mashshafe kessa eka; ta al7o de7uwa kanatape ashsha.

²¹ Gaammota doonape tana ashsha; qayciya bazzo boorata kacepe tana naaga.

²² Taani ne sunthaa ta ishatas odana; enta shiiquwan nena galatana.

²³ Hinteno, Godaa yayyesato, iya galatite; hinteno, Yayqooba zareto, iya bonchite. Hinteno, Isra7eele kochato, yashshan iya dhoqu dhoqu oothite.

²⁴ I un7etidaysa kadhenna; enta qohuwa be7ishe qelli geenna. Ba som7uwa entafe genthenna; enti iyako waassiya wode, entaw zoko zaaribeenna.

²⁵ Ta ne lo77o oosuwa gisho gita shiiqon galatana; ta qangetha new yayiya asaa sinthan gathana.

²⁶ Manqoti midi kallana; Godaa koyeysati iya galatana; enti merinaw ufaysan daana.

²⁷ Sa7a gaxa gakanaw de7iya asa ubbay, akeekan Godaako simmana; asa zare ubbay iya goyinnana.

²⁸ Maati ubbay Godaasa; I kawotethata haarees.

²⁹ Sa7an de7iya dure ubbay iya goyinnana; bantanan hayqope ashshanaw danda7onaysatinne biitta simmiya ubbay iyaw gulbatana.

³⁰ Yaana yeletay iyaw kiitetana; sintha yeletas Godaaba odana.

³¹ Buroo yeletiboona asaska, iya geeshshatetha odana.