Mazmure 20 - Geeshsha Maxaafa

Xoossan Ammaneta

Zammaareta Halaqaas Xaafetida Dawita Mazmure.

¹ Meto wode Goday nena si7o; Yayqooba Xoossaa sunthay nena naago.

² Ba keethaafe new maado kiitto; Xiyoonepe nena katiso.

³ I ne yarsho ubbaa hassayo; ne xuussa yarshuwan ufayto. Salaha

⁴ Ne wozanaa amuwa new immo; ne qofaa ubbaa polo.

⁵ Ne xoonuwan nuna ufayso; nu Xoossa sunthan nu bandira dhoqu oothana; ne woosa ubbaa Goday new zaaro.

⁶ Goday ba doorida kawas, xoono immidaysa taani buroo erayis. I ba geeshsha saluwan si7ana; ba ushacha kushen gita xoono iyaw immana.

⁷ Issoti issoti banta ola para gaariyan, harati banta paran ceeqetoosona; shin nuuni Godaa nu Xoossaa wolqan ceeqetoos.

⁸ Enti dhubetidi kundana; shin nuuni dendidi minni eqana.

⁹ Abeeti Godaw, kawas xoono imma; nuuni nena xeegiya wode si7a.