Mazmure 2 - Geeshsha Maxaafa

Godan Tiyetidaysa Aysuwa

¹ Kawotethati ayis dendoona? asay ayis coo maqetoona?

² Kawoti Godaa bollanne I tiyidaysa bolla dendidosona; deriya haareysati enta bolla shiiqidosona.

³ “Enta santhalaata duuthoos; enta qasho wodoruwa holoos” yaagidosona.

⁴ Salon uttidaysi enta bolla miicees; Goday enta qelqisees.

⁵ I ba hanquwan enta daganthees; ba yiluwan enta yashisees.

⁶ “Ta geeshsha zuma Xiyoone bolla ta kawa kawothas” yaagees goday.

⁷ Taani Godaa higgiya awaajana; Goday tana, “Neeni ta na7aa; taani hachi new aawa gidas.

⁸ Ne tana oycha; ta new kawotethata immana; sa7a ubbay nebaa gidana.

⁹ Neeni birata xam7an enta menthana; meqa miisheda enta tincherethana” yaagis.

¹⁰ Hiza, kawoto eeyopite; ha sa7aa haareysato akeekite.

¹¹ Godaa yashshan goyinnite; kokoridi kiitetite.

¹² Goday hanqetin ogen hinte dhayonnaada iya tumatethan goyinnite. Iya hanqoy eeson eexi keyana; iyan qosetidi attida ubbay anjetidaysata.