Mazmure 19 - Geeshsha Maxaafa

Xoossa Higgen Borey Baawa

Zammaareta Halaqaas Xaafetida Dawita Mazmure.

¹ Saloti Xoossaa bonchuwa haasayoosona; salo gufanthoy iya kushe oosuwa awaajees.

² Issi gallasi hara gallassas hessa odees; issi qammi hara qammas eratethi qoncisees.

³ Odi woyko qaali baawa; enta girsay si7etenna.

⁴ Gidoshin enta oday sa7a ubban laaletis; enta qaalay biitta gaxaa gakis. Awi de7iya bessi Xoossay salon giigisis.

⁵ Ba soope keyiya mishirada, gaadde woxanaw ufaytidi giigida asada, away wonta wonta keyees.

⁶ Issi bagga salo gaxape keyidi, hara bagga salo gaxa gakanaw bees; iya suulape geemmiyabay baawa.

⁷ Godaa higgey suure; shempo zaarees. Godaa kiitay ammanetidaysa; akeeki pacidaysata cinca oothees.

⁸ Godaa wogay like; wozana ufaysees. Godaa kiitay geeshshi; ayfe poo7isees.

⁹ Godaas yashshi geeshshi; merinaw eqidi de7ees. Godaa pirday kumethi tumanne xillo.

¹⁰ Worqafe aadhidi koyetees; walahi bayna worqafe aadhidi lo77o. Eessafe aadhidi lo77o ililo eessafe aadhidi mal7o.

¹¹ Ne aylley naagetana mela zorees; ne higgiya naagoy daro go77ees.

¹² Ba qohuwa demmey oonee? Abeeti Godaw, geemmida nagarape tana geeshsha.

¹³ Tana ne aylliya, erishe oothiya nagarape naaga. Nagari tana haaronna mela maadda; he wode taani suure gidana, gita balape geeyana.

¹⁴ Abeeti Godaw, ta zaallaw, tana wozeyso; ta doonape keyiya qaalaynne ta wozanaa qofay nena ufaysiyabaa gido.