Mazmure 18 - Geeshsha Maxaafa

Xoono Mazmure

Goday iya morketapenne Saa7ola kushepe ashshida wode Dawiti Godaas yexida mazmure.

¹ Abeeti Godaw, ta wolqaw, taani nena dosayis.

² Goday ta zaalla; ta miixa; tana ashsheysa; ta Xoossay ta iyako baqatiya ta zaalla. I taw gondalle; tana ashshiya wolqa; taani qosetada attiya besse.

³ Galata bessiya Godaa ta xeegayis; ta morketape taani attana.

⁴ Hayqo wodoroy tana cuullis; dhayo di7oy tana daganthis.

⁵ Duufo wodoroy ta bolla xaaxetis; hayqo xihey tana oykis.

⁶ Ta un7an Godaa xeegas; tana maaddana mela ta Xoossaako waassas. Ba keethan gididi ta girsaa si7is; ta waasoy iya haythan wodhis.

⁷ Xoossay hanqetida gisho, biittay qaaxis; dereta xaphoy kokoris.

⁸ Iya siidhiyape hanqo cuyay keyis; iya doonape miya tama lacoy keyis; I xuuggiya bonqo cuttis.

⁹ Saluwa phalqidi wodhis; iya tohuwape garsan dhuma shaari de7ees.

¹⁰ Kiruubeta bolla uttidi paallis; carko qefen pude dendis.

¹¹ Bana dhuman kammis; iya dunkaaney iran kumida shaara.

¹² Iya sinthan de7iya gita poo7uwape shachinne tama lacoy keyidi dhuma shaara kanthidi bis.

¹³ Goday dadada salope guummis; Ubbaafe Dhoqa Xoossay ba girsaa sissis; wol7anthaninne tama lacon qoncis.

¹⁴ Ba dongiya dukidi ba morketa laallis; wol7antha poo7o kiittidi enta yedethis.

¹⁵ Abeeti Godaw, neeni seerida wode, shenetada peenuqida wode, Abbay zin7ida biittay bentis; sa7a baasoy qoncis.

¹⁶ Goday bollafe kushiya yeddidi tana oykis; ciimmo haathaafe tana dafidi kessis.

¹⁷ Ta bolla daro wolqaamida ta morketapenne tana ixeysatape ashshis.

¹⁸ Ta metootida wode enti ta bolla dendidosona; shin Goday tana katisis.

¹⁹ I tana dalga bessi kessis; tanan ufaytida gisho tana ashshis.

²⁰ Ta xillotethaada Goday taw qanxis; ta kushe geeshshatethaada I taw zaaris.

²¹ Taani Godaa ogiya kaallas; ta Xoossaa aggada kare keyabike.

²² Taani iya higgiya ubbaa naagas; iya kiitaa polo aggabike.

²³ Taani iya sinthan suure de7as; tana nagarape naagas.

²⁴ Goday ta xillotethaadanne ta kushe geeshshatethaada taw zaaris.

²⁵ Ammaneteysatas ne ammanetaasa; suuretas ne suure.

²⁶ Geeshshatas ne geeshshi; shin geellatas ne geella.

²⁷ Ashketa ashshaasa; shin otoranchota kawushaasa.

²⁸ Abeeti Godaw, ne taw xompaasa; ta Xoossay ta dhumaa poo7isaasa.

²⁹ Ne maaduwan ta morke toora bolla dendayis; ta Xoossan miixaa xeerara gupada aadhayis.

³⁰ Xoossaa ogey polo; Godaa qaalay geeshshi; iyako baqatiya ubbaas I gondalle.

³¹ Godaape attishin, hara xoossi oonee? nu Xoossaafe attishin, hara zaalli oonee?

³² Taw wolqa immeynne ta ogiya saro oothey Xoossaa.

³³ I ta tohuwa gen7e tohoda minthees; dhoqa bessan hirgi bayna essees.

³⁴ Ta kushiya ola tamaarsees; naase birata dongiya dukana mela ta qessiya minthees.

³⁵ Tana ashshiya ne gondalliya taw immadasa; ne ushacha kushey tana zempisees; ne lo77o oykethay tana gitayees.

³⁶ Ta hemetiya bessaa dalgisadasa; ta tohuwa harchuchi ekibeenna.

³⁷ Ta morketa yedethada oykas; enta dhaysona guye simmike.

³⁸ Enti zaari dendonnaada shocas; enti ta tohuwa garsan kundidosona.

³⁹ Olas tana dancisadasa; taara gaaddeteyisata taw gulbatisadasa.

⁴⁰ Ta morketa ta sinthafe guye zaaradasa; tana ixeyisata dhaysas.

⁴¹ Maade koyidi waassidosona, shin oonika enta ashshibeenna. Godaa enti xeegidosona, shin I entaw koybeenna.

⁴² Carkoy pitidi efiya baanada enta liiqisas; oge urqada enta yedhas.

⁴³ Gene asape tana ashshadasa; tana kawotethata bolla shuumadasa; ta eronna asay taw haaretidosona.

⁴⁴ Enti tabaa si7idi taw kiitetoosona; allaga derey ta sinthan ziggees.

⁴⁵ Enti kaha dhayidosona; banta miixape kokorishe yoosona.

⁴⁶ Goday de7ees! Xoossay, ta zaallay galatetto! Tana ashshiya Xoossay dhoqu dhoqu go!

⁴⁷ I taw halo kessiya Xoossaa; kawotethata ta garsan haariseysa.

⁴⁸ Ta morketape tana ashsheysa; tana ixeyisata bolla dhoqu dhoqu oothaasa; iitatape tana ashshaasa.

⁴⁹ Hessa gisho, Godaw kawotethata giddon taani nena galatana; ne sunthaa sabbana.

⁵⁰ I ba kawas xoono immees; ba tiyidaysas, Dawitasinne iya kochaas, ba keehatetha bessees.