Mazmure 17 - Geeshsha Maxaafa

Xillo Asa Woosa

Dawita Woosa.

¹ Abeeti Godaw, ta xillo maggannuwa si7a; taani neeko waassiya waasuwa hayza. Cimon gidonashin tuman, woossiya woosa zaara.

² Ne xillo pirday taw qonco; ne ayfey tumaa xeello.

³ Neeni qamma tana xomoosadasa; ta wozanaa paacadasa. Shin paacadaka ta bolla aykoka demmabaaka; ta inxarsayka baletibeenna.

⁴ Taani hara asatada iitabaa haasayike; taani ne qaala naagiya gisho, gene ogiya kaallabike.

⁵ Ta tohoy dhubetonna mela, ta tangoy ne ogiyape gaxa keybeenna.

⁶ Abeeti Xoossaw ta woosa ne si7iya gisho, taani nena woossayis. Ne haythaa taako zaarada, ta qaala si7a.

⁷ Banta morketape baqateyisata, ne ushacha kushen qottada ashsheyso, ne keehatetha malaalsiya ogen bessa.

⁸ Ne ayfe na77e mela tana naaga; ne qefiya garsan tana qosa.

⁹ Tana un7ethiya iitatape; teqidi oykida morketape ashsha.

¹⁰ Entaw qadhey baawa; otoron haasayoosona.

¹¹ Tana gooddidi oykidosona; teqidosona; tana biittan holidi yegganaw xeelloosona.

¹² Enti miyaba koyiya gaammo mela; qosetidi naagiya wodala gaammo mela.

¹³ Godaw, denda; ta morketara eqetada enta sa7an yegga; ne mashshan iitata kushepe tana ashsha.

¹⁴ Godaw, haysa mela asape tana qosa; enta qaaday sa7aba gidida asape ne kushen tana ashsha. Ne minjida seeran enta kalsa; he seeray enta naytas gididi, enta nayta naytas palaho.

¹⁵ Shin taani xillotethan ne som7uwa be7ana; ta barkiya wode ne malaa be7ada ufaytana.