Mazmure 143 - Geeshsha Maxaafa

Ta Shempiya Nena Koyawusu

Dawita Mazmure

¹ Godaw, ta woosa si7a; maarota demmanaw ta waasseysa hayza. Neeni xillotethaninne ne ammanetethan taw zaaro imma.

² Ne sinthan xillo asi bayna gisho tana ne aylliya pirdas shiishopa.

³ Tana ta morkey yedethidi, tincherethidi sa7an yeggis. Beni hayqida asada tana dhuman wothis.

⁴ Hessa gisho taani heettas; ta wozanayka til7is.

⁵ Taani beni wodeta hassayayis; ne oothida ooso ubbaa qopayis; ne kushe ooso ubbaa akeekayis.

⁶ Taani ta kushiya neeko miccas; mela biitti haathe koyeysada, ta shempoy nena saamotees. Salaha

⁷ Godaw, ta wozanay heettida gisho taw zaaro immanaw ellesa. Taani duufon geliya asada hanonna mela ne som7uwa taape genthofa.

⁸ Taani nenan ammanetiya gisho, wonta wonta ne siiquwaba tana bessa. Taani ta shempuwafe nena woossiya gisho, ta baana ogiya tana bessa.

⁹ Godaw, taani new maggannida gisho, ta morketape tana ashsha.

¹⁰ Neeni ta Xoossaa gidiya gisho, ta ne sheniya oothana mela tana tamaarsa; ne lo77o ayyaanay suure ogiyan tana kaaletho.

¹¹ Godaw, ne sunthaa gisho tana ashsha; ne xillotethan tana metope kessa.

¹² Ne siiquwan ta morketa wodha; ta ne aylle gidiya gisho tana un7etheyisata ubbaa dhaysa.