Mazmure 142 - Geeshsha Maxaafa

Neeni Taw Qosetiya Bessi

Dawiti gongolon de7iya wode xaafida timirte

¹ Ta qaala dhoqu oothada Godaako waassayis; maarota demmanaw iya woossayis.

² Ta oysha ubbaa iya bessayis; ta metuwa ubbaa iyaw odayis.

³ Taani heettida wode ne ta ogiya eraasa; ta ogiyan gite yeggidi wothidosona.

⁴ Taani ta yuushuwa xeelliya wode, tana maaddey issoyka baawa. Taani qosetada attiya bessi baawa; tana naagiya oonika baawa.

⁵ Godaw, taani neeko waassayis; taani, “Ne taw baqatada attiya bessi; de7on de7eyisata biittan ta saamay nena” yaagas.

⁶ Taani daro metootiya gisho, ta waasuwa si7a. Tana yedetheysati wolqaamida gisho, tana entafe ashsha.

⁷ Ta ne sunthaa galatana mela, tana qashope birsha. Neeni taw keeha gidiya gisho, xilloti ta yuushon shiiqana.