Mazmure 141 - Geeshsha Maxaafa

Ne Haytha Taako Zaara

Dawita Mazmure

¹ Godaw, taani nena xeegayis; tana maaddanaw ellesa; Ta neeko waassiya wode tana si7a!

² Ta woosay ixaaneda ne sinthe shiiqo; ta kushe micethay omarsa yarsho mela gido.

³ Godaw, ta doona naagiya asi wotha; ta mettersha pengiya naaga.

⁴ Iita oothiya asatara iita oothonna mela, ta wozanaa iitako zaaropa; enta gibira tana muzopa.

⁵ Xillo asi tana seero, hessi taw keehatethi, I tana hanqeto, hessi ta huuphen zayte tiyo mela. Ta wozanay hessa ixenna; Ta woosay ubba wode enta iita oosuwa bollana.

⁶ Enta daynnati aafo holetiya wode, ta qaalay tuma gideysa enti erana.

⁷ Enti, “Asi biitta goyeysadanne phasha laalleysada, nu meqethay duufo doonan laaletana” yaagosona.

⁸ Ubbaa Haariya Godaw, ta ayfey nena xeellees. Taani neeko baqatayis; tana hayqos aathada immofa.

⁹ Enti taw yeggida gitiyapenne iitaa ootheyisata xihiyape tana naaga.

¹⁰ Taani saro aadhin, iitati banta wothida gitiyan oyketo.