Mazmure 140 - Geeshsha Maxaafa

Iita Asa Kushepe Tana Ashsha

Dawita Mazmure

¹ Godaw, iitatape tana ashsha; makallanchotape tana naaga.

² Enti iita oothanaw maqetoosona; gallas gallas ola denthoosona.

³ Banta inxarsaa shoosha inxarsada qarayoosona; enta doonan wodhiya marzey de7ees. Salaha

⁴ Godaw, iitata kushepe tana ashsha; ta tohuwa qaxanaw qopiya makallanchotape tana naaga.

⁵ Otorancho asati taw xihe wothoosona; gite hiixoosona; tana oykanaw gite yeggoosona. Salaha

⁶ Godaa, “Neeni ta Xoossaa” gaana; Godaw, ta woosa si7a.

⁷ Ubbaa Haariya Godaw, tana ashshiya minuwaw, ola gallas taw gondalle gidadasa.

⁸ Godaw, iitatas enta amuwa immofa; enti otortonna mela enta maquwa polisopa. Salaha

⁹ Ta morketan tana xoonisopa; enta doonape keyiya iitay enta bolla simmo.

¹⁰ Enta bolla xuuggiya tama bonqoy qoletto; enti tama ollan yegeto; keyanaw danda7onna olla holeto.

¹¹ Yooyamati biitta bolla de7opo; buqeyisata iitabay yedethidi oyko.

¹² Goday manqotas pirdeysanne metootanchotas mooteteysa erayis.

¹³ Xilloti tuma ne sunthaa galatana; suure asati ne sinthan daana.