Mazmure 135 - Geeshsha Maxaafa

Xoossa Sunthay Merinaw Eretees

¹ Godaa galatite! Hinteno, Godaa aylleto, Godaa sunthaa galatite!

² Hinteno, Godaa keethan, nu Xoossa keethaa dabaaban eqeysato, Godaa galatite!

³ I keeha gidiya gisho Godaa galatite! I lo77o gidiya gisho iya sunthaa sabbite!

⁴ Goday Yayqooba babaa, Isra7eele baw buzo oothidi dooris.

⁵ Goday gita gideysanne nu Goday, xoossata ubbaafe aadheysa taani erayis.

⁶ Salon sa7an, abbaninne iya giddon Goday ba dosidaba ubbaa oothees.

⁷ Shaara sa7aa gaxape denthees; wol7anthi irara kiittees; carko ba minja keethaafe kessees.

⁸ Gibxe biittan asape mehe gakanaw, bayra yeletida ubbaa wodhis.

⁹ Neno Gibxe, Paaronanne iya aylleta ubbaa seeranaw malaatatanne malaalsiyabata kiittis.

¹⁰ I daro kawotethata dhaysis; wolqaama kawota wodhis.

¹¹ Amoore kawa Sihoona Baasane kawa Oogenne Kanaane kawota ubbaa wodhis.

¹² Enta biitta ba asaa, Isra7eele laatisis.

¹³ Godaw, ne sunthay merinaw daana; yeletaape yeleta gakanaw ne hassayetana.

¹⁴ Goday ba asaas pirdana; I ba aylletas qadhetana.

¹⁵ Kawotethata eeqati asa kushe oosota; birapenne worqafe medhetidaysata.

¹⁶ Entaw dooni de7ees, shin haasayokona; ayfey de7ees, shin xeellokona.

¹⁷ Haythi de7ees, shin si7okona; enta siidhen shempoy baawa.

¹⁸ Enta medhidaysatinne entan ammaneteysati ubbay entada hano.

¹⁹ Isra7eele asaw Godaa galatite; Aarona soo asaw Godaa galatite.

²⁰ Leewe soo asaw Godaa galatite; Godaa yayyeysato ubbay Godaa galatite.

²¹ Yerusalaamen de7iya Goday Xiyoonen galatetto! Godaa galatite!