Mazmure 12 - Geeshsha Maxaafa

Alame Iitatethaafe Atetha Woosa

Zammaareta Halaqaas Xaafetida Dawita Mazmure.

¹ Xoossa asi biittafe wurida gisho, asa giddon ammanetethi bayna gisho, Godaw nuna maaddarkii?

² Ubbay wordo haasayoosona; issoy issuwa cimmiya inxarsan nam7u wozanan odetoosona.

³ Abeeti Godaw, cimmiya doona gorda; otoron ceeqetiya inxarsaa teqa.

⁴ Enti, “Nu inxarsan nu xoonana; nu doonay nuusa; nuus godi oonee?” yaagosona.

⁵ “Manqota un7aa gishonne, metootanchota ooliya gisho, ha77i taani dendana; enti amotiya sarotethaa entaw immana” yaagees Goday.

⁶ Godaa qaalay geeshshi; taman laapun toho seerida birada geeshshi.

⁷ Abeeti Godaw neeni enta naaga; haysa mela asape merinaw enta ashsha.

⁸ Iiti asaa giddon bonchetiya wode, geella asati ceeqetishe simeretoosona.