Mazmure 118 - Geeshsha Maxaafa

Iya Siiqoy Merinaasa

¹ Goday keeha gidiya gisho galatite; iya siiqoy merinaasa.

² Isra7eele asay, “Iya siiqoy merinaasa” yaago.

³ Aarona keetha asay, “Iya siiqoy merinaasa” yaago.

⁴ Godaas yayiya ubbay, “Iya siiqoy merinaasa” yaago.

⁵ Ta un7etida wode Godaako waassas; I ta waasuwa si7idi tana la77a kessis.

⁶ Goday taara de7iya gisho ta yayyike; asi tana ay oothanee?

⁷ Goday tana maaddanaw taara de7ees; ta morketa xoonetethaa ta be7ana.

⁸ Asan ammanetanape Godan geemmidi atteysi lo77o.

⁹ Gita asan ammanetanape Godan geemmidi atteysi lo77o.

¹⁰ Kawotethati ubbay tana teqidi oykidosona; shin Godaa sunthan ta enta xoonas.

¹¹ Enti ta yuushuwa teqidosona; shin Godaa sunthan ta enta xoonas.

¹² Enti ta yuushuwa mathada teqidosona; Shin buurey taman eexeysada eexidi dhayidosona; Godaa sunthan ta enta dhaysas.

¹³ Taani sugetada kundanaw gakas; shin Goday tana maaddis.

¹⁴ Goday ta minotethaanne yethaa; I tana ashsheysa gidis.

¹⁵ Xillota dunkaaniyan ola xoonidi, simmiya asaa ufaysas giyaba si7ite; Godaa ushacha kushey gitaba oothis.

¹⁶ Godaa ushacha kushey xoono immis; Godaa ushacha kushey gitaba oothis.

¹⁷ Taani hayqike; de7on daana; Goday oothidaba awaajana.

¹⁸ Goday tana iita seera seeris; shin hayqos aathidi immibeenna.

¹⁹ Taani gido gelada Godaa galatana mela, xillotetha pengeta taw dooyite.

²⁰ Haysi Godaa penge; xilloti iyara geloosona.

²¹ Godaw, ne tana si7ida gishonne taw xoono immida gisho ta nena galatayis.

²² Gimbeysati kadhidi yeggida shuchay, godaa xaphuwa minthiya shuchu gidis.

²³ Haysi Godaa ooso; nu ayfiyas malaalsiyaba.

²⁴ Haysi gallasay Goday oothida gallas; ane nuuni iyan ufaytoosinne ililoos.

²⁵ Godaw, ha77i nuna ashsha; Godaw, ha77i nuus injeya.

²⁶ Godaa sunthan yaa asi anjetidaysa gido; nuuni Xoossa keethaafe hintena anjoos.

²⁷ Goday Xoossaa; I nu bolla poo7isis; yarsho bessan de7iya kaciyako keyite; irxa tashe oykidi ba7aale bonchite.

²⁸ Neeni ta Xoossaa; ta nena galatana; neeni ta Xoossaa; ta nena sabbana.

²⁹ Goday keeha gidiya gisho iya galatite; iya siiqoy merinaasa.