Mazmure 113 - Geeshsha Maxaafa

Nu Xoossa Meli Oonee?

¹ Godaa galatite; hinteno, Godaa aylleto, Godaa sunthaa galatite.

² Godaa sunthay, hachife merinaa gakanaw galatetto.

³ Away doliyasuwape wulliyasuwa gakanaw, Godaa sunthay galatetto.

⁴ Goday kawotetha ubbaa haarees; iya bonchoy saluwape dhoqa.

⁵ Godaa nu Xoossaa meli oonee? I bolla dhoqan ba araatan uttis.

⁶ I salotanne sa7aa be7anaw duge hokees.

⁷ I manquwa baanape dhoqu oothees; metootanchuwa bidope denthees.

⁸ Moorinnatara lagge oothees; halaqatara dhoqa bessan utisees.

⁹ Mayntha maccasiw nayta aayo oothidi, ufaysidi I keethan iyo bonchisees. Godaa galatite!