Mazmure 112 - Geeshsha Maxaafa

Xilloy Qaaxenna

¹ Godaa galatite; Godaas yayeysinne iya kiita naageysi anjetidaysa.

² Iya nayti biittan wolqaama gidana; suure asaa yeletay anjetana.

³ Shaloynne duretethi iya keethan de7ees; iya xillotethay merinaw daana.

⁴ Keeha, xillonne qadhetiya asas, dhuma giddon poo7oy poo7ees.

⁵ Keehatethan coo tal7iya uraas, ba oosuwa suuretethan oothiya uraas keehabay yaana.

⁶ Xillo asi awudeka kundenna; I merinaw hassayetana.

⁷ Iya wozanay hirgonna gishonne I Godan ammanetiya gisho, iitabaa si7ikoka I dagammenna;

⁸ Iya wozanay mino gidiya gisho yayyenna; wursethan iya morketi xoonetin be7ana.

⁹ I manquwas darsidi immees; iya xillotethay merinaw de7ees; iya kacey bonchon dhoqu dhoqu gaana.

¹⁰ Iita asi hessa be7idi yilotees; mettershe saxishe coo dhayees; iita asa amoy coo attana.