Mazmure 102 - Geeshsha Maxaafa

Ne Som7uwa Taape Genthofa

Un7etida wode Xoossa sinthan woossida asa woosa

¹ Godaw, ta woosa si7a; ta waasoy neeko gako.

² Ta waayiya gallas ne som7uwa taape genthofa; ne haytha taako zaara; taani neeko waassiya wode, tana eeson alla.

³ Ta laythay cuyada dhayees; ta meqethay tamada eexees.

⁴ Ta wozanay buucidi yeggida maatada melis; kathika taw meetetenna.

⁵ Taani ta qaala dhoqu oothada oolida gisho; ta gogay meqethaara oyketis.

⁶ Taani woran de7iya solo mela, kaysa keethan de7iya gutto mela.

⁷ Taani zin7in dhiskoy yeenna; taani keetha huuphen barka uttida kafo gidas.

⁸ Ta morketi gallas kumethi tana cayoosona; tana qelqiseysati ta sunthan baaddoosona.

⁹ Bidoy taw kathi gidis; ta afuthay ta ushshara Walaketis.

¹⁰ Hessi haniday ne hanqoynne ne yiloy, tana denthadi wora holida gishosa.

¹¹ Ta laythay omarsa kuya mela ellesidi aadhees; taani maatada shullayis.

¹² Shin Godaw, neeni ne araatan merinaw uttadasa; ne sunthay yeletaape yeletaa gakanaw hassayetana.

¹³ Neeni iyo maariya wodey gakida gisho; dendada Xiyoones qadheta; neeni doorida wodey gakis.

¹⁴ I shuchati ne oosanchotas al7o; I biittayka enta qadhethees.

¹⁵ Kawotethati Godaa sunthaas yayyana; sa7aa kawoti iya bonchuwas dagammana.

¹⁶ Goday Xiyoone zaaridi keexana; ba gitatetha bessana.

¹⁷ I manqota woosa si7ana; enta oysha kadhenna.

¹⁸ Buroo yeletana asay Godaa galatana mela, haysi yaa yeletas xaafeto.

¹⁹ Goday dhoqan de7iya ba geeshsha bessaafe xeellis; salon gididi sa7aa xomoosees.

²⁰ Hessika qashetida asaa waasuwa si7anawunne hayqo pirdetida asaa birshanaasa.

²¹ Hessa gisho, Godaa sunthay Xiyoonen odetana; iya galatay Yerusalaamen awaajettana.

²² Dereynne kawotethay shiiqidi, Godaas he wode goyinnana.

²³ Taani na7atethan de7ishin, ta wolqaa ixisis; ta laytha qaamisis.

²⁴ Taani, “Ta Xoossaw, ta laytha giddo zawan tana dhukofa” yaagayis. Godaw, neeni yeletape yeletaa gakanaw de7aasa.

²⁵ Neeni beni sa7aa medhadasa; saloyka ne kushe ooso.

²⁶ Haysati ubbay dhayana; shin neeni daana; enti ubbay afilada wurana. Neeni enta curqa afilada laammana; entika aadhana.

²⁷ Shin neeni nena; ne laythay wurenna.

²⁸ Ne aylleta nayta neeni saro wothaasa; enta kochay ne sinthan minnidi daana.