Mazmure 10 - Geeshsha Maxaafa

Suure Pirda Kosha Woosa

Dawita Mazmure

¹ Abeeti Godaw, ayis haakada eqay? Meto wode ayis neeni geemmay?

² Ba otoruwan iita asi manquwa yedethees; enti banta maquwan bantaw oyketidosona.

³ Iita asi ba iita amuwan ceeqetees; ba uuziyan Godaa cayeesinne kadhees.

⁴ Iitati banta otoruwan Xoossaa koyokona; banta qofan Xoossas besse immokona.

⁵ Iyaw ubba wode injetees; ne higgey iyaw gelenna; ba morketa I qelqisees.

⁶ Ba wozanan, “Tana aybika qaathenna tana metoy gakenna” yaagidi qopees.

⁷ Iya doonan baadethi, wordoynne mandethi kumis. Geneynne iitatethi iyan inxarsan de7ees.

⁸ Gutatan zugidi uttees; suure asata wodhanaw qosetidi naagees; wolqi bayna daaburanchota wochees.

⁹ Ba qosetida bessan geemmidi, manquwa oykanaw gaammoda zugees; iya oykidi ba xihiyan goochidi efees.

¹⁰ Wolqi bayna manquwa shocidi yeggees; iya tohuwa garsan I kundees.

¹¹ I ba wozanan, “Xoossay dogis. Ba som7uwa genthidi be7enna” yaagees.

¹² Abeeti Godaw, denda! Xoossaw, ne wolqaama kushiya dentha; manqota dogopa.

¹³ Iita asati Xoosse ayis kadhoona? Banta wozanan, “Xoossay nuna seerenna” ayis yaagona?

¹⁴ Shin Xoossaw, ne metuwanne un7aa be7aasa; neeni maaddanaw giiga uttadasa. Neeni yi7otas maade, qohetiday ne maaddana mela bana new aathidi immees.

¹⁵ Gene asata wolqaa mentha; iita asata seera; zaaridi enta giddon iitatethi bentofo.

¹⁶ Goday merinaw kawotidi de7ees; hara kawotethati iya biittafe dhayana.

¹⁷ Abeeti Godaw, neeni ashketa amuwa kunthaasa; enta minthetha; enta woosa si7a.

¹⁸ Yi7otanne un7etidaysata qohonna mela, sa7an de7iya oonika enta yashisonna mela, neeni entaw pirda.