Leemiso 5 - Geeshsha Maxaafa

Laymatethafe Haaka

¹ Ta na7aw, ta cincatetha hayza si7a; ne haythaa ta timirtiyako zaara.

² Hessi nena wozanaama oothana; ne oday ne eratethaa qoncisana.

³ Layma maccasa inxarsafe ililo eessi xokees; I oday oysape aadhidi looxikees.

⁴ Shin wursethan iya godare uthada cammawusu; nam7u baggara qanxiya mashshada qara.

⁵ I tohoy hayqoko bees; I tangoy duufo gathees.

⁶ Iya de7o oge qopuku; I ogey geella; shin geella gideysa iya eruku.

⁷ Ta na7aw, tana si7a; ta odeysafe keyopa.

⁸ Layma maccasa heera boopite; I keetha pengiyako shiiqopite.

⁹ Hessi hanonna ixiko hinte bonchuwa harati ekana; na7atethan wozana mino asa kushen hinte hayqana.

¹⁰ Hinte aquwa allagati ekana; hinte daaburadi shiishidabay hara asas gidana.

¹¹ Wursethan hinte ashoynne hinte asatethay wurin hinte yeekana.

¹² Hinte yaagana; “Ta ayis timirte ixadina? Ta wozanay seera ayis kadhidee?

¹³ Taani ta astamaareta si7abike; tana zoreyisata zoriya ekabike.

¹⁴ Hesaa gisho, ta asay shiiqida shiiquwan, kawuyanaw matas” yaagana.

¹⁵ Neeni ne pultuwafe haathe uya; ne mache xalaala siiqa.

¹⁶ Ne pultuwa dabaaban, ne olla haatha denban ayis gussay?

¹⁷ Enta new buzo ootha; hara allaga uraara koxofa.

¹⁸ Ne pultoy new anjeto; ne na7atetha machera ufayta.

¹⁹ Lo77iya gaaredaninne ufaysiya gen7eda I dhanthay ubba wode nena alo; ubba wode I siiqoy nena di77o.

²⁰ Ta na7aw, layma maccasan ayis di7etay? Hara asa macho ayis qoommay?

²¹ Asi oothiyaba ubbaa Goday be7ees; I hemetiya horoga ubbaa xeellees.

²² Nagaranchuwa I oothida nagaray oykees; Iya nagaraa gitey iya qachees.

²³ I ba eeyatethan dhayis; bana naagiboonna gisho hayqis.