Leemiso 3 - Geeshsha Maxaafa

Godan Ammaneta

¹ Ta na7aw, ta timirtiya dogopa; ta kiitaa ne wozanan wotha.

² Enti ne laytha adussana; injenne sarotethi new gujana.

³ Siiqoynne tumatethi neepe haakofo; enta ne qoodhen qacha; ne wozanan xaafa.

⁴ Hessa oothiko ne Xoossanne asa sinthan sabetananne nashetana.

⁵ Ne kumetha wozanan Godaa ammaneta; ne akeekan zempofa.

⁶ Ne ooso ubban iya sinthaya; I nena suure oge kaalethana.

⁷ Nena ne huuphen cinca oothofa; Godaa yayya; iitape haaka.

⁸ Hessi ne asatethaas payyatethi ehana; ne meqethaaka xaalisana.

⁹ Ne shaluwan Godaa boncha; koyro ayfida kathaafe bayraa immada iya boncha.

¹⁰ Hessa ne oothiko, ne shaaliyan kathi kumana; ne daalloy woyne ushshan kumidi palahana.

¹¹ Ta na7aw, Godaa seera kadhopa; I nena seeriya wode lancofa.

¹² Aaway ba dosiya na7a seereysada, Goday ba dosiya uraa seerees.

¹³ Cincatethi demmeynne, akeeka baw miishe oothiya uray anjetidaysa.

¹⁴ Cincatethi birape aadhidi go77ees; worqafe aadhidi maaddees.

¹⁵ Cincatethi worqafe aadhidi al7o; ne demmanaw amotiya ubbay cincatethara ginenna.

¹⁶ Cincatethi ushacha kushen adussa laythi, haddirsa kushen duretethinne boncho oykasu.

¹⁷ I ogeti ufaysiya ogeta; I horogay saro horoga.

¹⁸ Iya bana oykeysatas de7o mithi; iyo minthidi oykiya ubbay anjetidaysata.

¹⁹ Goday ba cincatethan sa7aa medhis; ba akeekan salota minthis.

²⁰ Iya eratethan shaafati goggoosona; shaaratape iri bukees.

²¹ Ta na7aw, suure pirdanne shaakidi ero minthada oyka enti neepe shaaketofo.

²² Enti new de7o gidana; injenne ufaysi immana.

²³ He wode ne hirgi bayna hemetana; ne tohoy dhubetenna.

²⁴ Neeni zin7iya wode yayyaka; qamma kumethi mal7o dhisko dhiskana.

²⁵ Akeekona gakiya gados yayyaka; iitati dhayiya dhayuwan dagammaka.

²⁶ Goday new zempo gidana; ne tohoy xihen oyketonnaada I naagana.

²⁷ New wolqi de7ishin, metootida uraas lo77oba ooso aggofa.

²⁸ Ha77i maaddanaw danda7ashe ne shooruwa, “Simmada ya; ta new wonto immana” yaagopa.

²⁹ Nena ammanetidi, ne matan de7iya, ne shooruwa bolla gene oothofa.

³⁰ Nena qohonna de7ishin, ase coo mootopa.

³¹ Gene oothiya asata qanaatopa; enta iita oosuwa kaallofa.

³² Goday iita oothiya asata ixees; shin suureta dosees.

³³ Goday iita oothiya asaa keethaa baaddees; shin suureba oothiya asaa keethaa anjees.

³⁴ Otoron qelqiseyisata Goday qelqisees; shin bantana kawusheyisata sabbees.

³⁵ Cincati boncho demmana; shin eeyati kawuyana.