Leemiso 25 - Geeshsha Maxaafa

Hara Solomone Leemisota

¹ Haysati Yihuda kawa Hizqiyaasa asati duuqidi xaafida Solomone leemisota.

² Xuura genthoy Xoossas boncho; xuura pilgidi kesoy kawotas boncho.

³ Saloy dhoqu gidaysadanne sa7i ziqa gididaysada kawota qofaa asi eranaw danda7enna.

⁴ Birape qita digga; hessafe guye, hiillanchoy loythana.

⁵ Kawo sinthafe iita asata digga; iya araatay xillotethan minnidi eqana.

⁶ Kawo sinthan eqiya wode ceeqetofa; gita asata giddon new besse koyopa.

⁷ Neepe gitatiya asas besse immanaw halaqay nena denthin, kawuyeysafe, I nena, “Ha dhoqa bessan utta” geysi lo77o.

⁸ Ne ayfen be7idaba markatanaw daynna sinthe baanaw ellesopa. Ne markata simmin hara asi ne markatethay bala gideysa qoncisiko, ne yeellatana.

⁹ Ne giddoninne ne shooruwa giddon palami medhetiko, iyara odetada ne palama wursa; hara asa xuura qoncisopa.

¹⁰ Hessi hanonna ixiko ne odeysa si7ida asi nena kawushana; ne sunthay zaaridi simmonnaada iitana.

¹¹ Bessiya wode odetida like qaali, bira miishe bolla tigetida worqa alleeqo mela.

¹² Era asi zoriya zore si7iya haythas, hessi worqafe woyko geeshsha worqafe oosetida alleeqo mela.

¹³ Katha cakiya wode irxa haathi uyin aleysada, ammanthiya kiitanchoy bana kiittoysa ufaysees.

¹⁴ Immonnaba immana gidi ceeqetiya asi iri bayna shaaranne carko mela.

¹⁵ Danda7a asi halaqa odidi mayzees; liiqo qaali meqethi kanthi gelees.

¹⁶ Eessi demmiko kallana gakanaw ma; shin darsiko nena cooshshana.

¹⁷ Nena uufishe ixonnaada, ne shooruwa soo ubba wode boopa.

¹⁸ Ba shooruwa bolla wordon markatiya asi, xam7i, mashshinne toori qoheysada qohees.

¹⁹ Meto wode ammanetona asan zempoy, qaaxiya achan coommiyanne silida tohon hemeteysa mela.

²⁰ Azzanida asas yethi yexiya asi, meego wode ma7o qaariyanne maduntha bolla caalaba tigiya asa mela.

²¹ Ne morkey koshatiko muza; saamotiko ushsha.

²² Ne hessa oothiko iya huuphen tama bonqo kaashidi qoleysa mela; Goday nena woytana.

²³ Doloha bagga carkoy ira eheysada, zigirsi hanqo ehees.

²⁴ Doonatiya machira issi keethan daanape kare barandan duussi lo77o.

²⁵ Daaburida asi irxa haathi uyidi aleysada, haaho biittafe yaa lo77o odi ufaysees.

²⁶ Iita asa sinthan gulbatiya xillo asi, buullotida pultonne iitida olla haatha mela.

²⁷ Daro eessi muussi lo77o gidenna; hessadaka, ba boncho koshshi bonchisenna.

²⁸ Bana haaronna asi dirsi laaletida katama mela.