Leemiso 22 - Geeshsha Maxaafa

¹ Lo77o sunthi daro duretethafe aadhees; bonchoy birapenne worqafe aadhees.

² Durenne manqo Goday medhis; hessan enti nam7ay issino.

³ Cinca asi iita be7idi qosetidi attees; shin akeeki bayna asi meton gelidi qohetees.

⁴ Ashketethinne Godaa yashshi, duretethi, bonchonne de7o immees.

⁵ Iitata ogen agunthinne xihey de7ees; shin bana naagiya asi entafe haakees.

⁶ Na7i waanidi daanaw bessiyako tamaarsa; I cimiya wodeka iyape haakenna.

⁷ Durey manquwa haarees; tal7e ekiday tal7e immidaysas aylle gidees.

⁸ Nagara zeriya uray waaye cakees; iya hanqo xam7ay meqana.

⁹ Ba kathaa manqotas shaakiya gisho keeha asi anjetana.

¹⁰ Qelqisiya asi diggiko, palami, ooshshinne cashshi attana.

¹¹ Wozani geeshshi gidida asinne lo77o oda dosiya asi kawora dabbotees.

¹² Godaa ayfey eratethi naagees; shin wordanchota qaala shiri yeggees.

¹³ Azalla asi, “Karen gaammoy de7ees; tana ogen maana” yaagees.

¹⁴ Layma maccasa dooni wolqaama olla mela; Goday hanqetidaysati iyan kundoosona.

¹⁵ Eeyatethi na7a wozanan de7ees; shin pircoy iyape haassees.

¹⁶ Shalo shiishanaw manquwa naaqeynne dure asas imota immiya nam7ay manqana.

Hastamu Cinca Zoreta

¹⁷ Ne haytha zaarada cincata qaala si7a; ne wozanaa ta timirtiyako zaara.

¹⁸ Enta ne wozanan wothikonne ne doonan enta haasayiko, ne ufaytana.

¹⁹ Ne ammanoy Godan gidana mela, taani nena hachi tamaarsayis.

²⁰ Taani new zorenne eratethi kumida hastamu leemisota xaafas.

²¹ Nena kiittidaysas like zaaro zaarana mela, taani nena tumatethi tamaarsas.

1

²² Manqotas aybika bayna gisho, enta bonqofa; pirdan enta maata dhaysofa.

²³ Goday enta gisho mootetana; enta bonqidaysata I bonqana.

2

²⁴ Yilotiya uraara laggetopa; elle shenetiya uraara hemetofa.

²⁵ Neeni iya yiluwara meezetiko, guyepe agganaw danda7aka.

3

²⁶ Asa aco ta qanxana gada waase gidopa.

²⁷ Ne qanxiyaba dhayiko, ne zin7iya hiixay attonna, new de7iyaba ubbay eketana.

4

²⁸ Ne mayzati tokida beni zawa shoddofa.

5

²⁹ Ba oosuwan loohida asi be7adii? I coo asatas gidonashin kawotas oothees.