Leemiso 21 - Geeshsha Maxaafa

¹ Kawo wozani Godaa kushena; iya wozanaa dhawa haathada ba koyida soo zaarees.

² Asi oothiyaba ubbay iyaw like daanees; shin Goday iya wozanaa qofaa paacees.

³ Yarsho yarshanaape aathidi, xillonne suure ootheysa Goday dosees.

⁴ Iitati otoroninne ceeqetethan eretoosona; hessi qassi nagara.

⁵ Mino oothiya asa halchoy dureyees; shin eesotiya ubbay manqees.

⁶ Wordon dagayida shaloy pentoda dhayees; hessa koyeysati hayqo koyoosona.

⁷ Iitati suureba oothanaw koyonna gisho, enta geella oosoy enta ekidi bees.

⁸ Nagaranchoti geella ogen hemetoosona; shin geeshshati suureba oothosona.

⁹ Doonatiya machira issi keethan daanape kare darmachan duussi lo77o.

¹⁰ Iitati iitaba oothanaw amottoosona; banta shoorotas qadhetokona.

¹¹ Qelqisiya asi seeretiya wode wozani bayna uray cincatethi tamaarees; wozanaama uray era demmees.

¹² Xillo Xoossay iitata son oosetiyaba ubbaa be7ees; enta shiri yeggidi dhaysees.

¹³ Manqota waasuwa si7anaape gidi, ba haythaa tucciya uray, ika waassana; I waassin alliya asi dhayana.

¹⁴ Geeman immiya imoy hanqo doshisees; qosan immida wodhaafey hanqo irxisees.

¹⁵ Suure pirdi pirdetiya wode, xilloti ufaytoosona; shin iita ootheyisata daganthees.

¹⁶ Akeeka ogiya haakiya uraa hayqoy naagees.

¹⁷ Injetin daana giya uray manqees; woynenne zayte dosiya uray duretenna.

¹⁸ Xoossa asata ashshanaw iita asati seeretosona; ammanetona asati suure asata gisho seeretosona.

¹⁹ Doonatiyanne yilotiya machira daanape bazzon de7oy lo77o.

²⁰ Wozanaama uraa son mal7o quminne oysi minjettees; shin eeya asi de7iyaba ubbaa midigees.

²¹ Xillotethinne siiqo koyiya uraa laythay aduqees; he uray xillotethinne boncho demmees.

²² Wozanaama asi wolqaama olanchota katamaa olidi oykees; enti ammanetiya mino miixaa laallees.

²³ Ba doonanne ba inxarsaa naagiya asi bana metope naagees.

²⁴ Otoreynne ceeqetey qelqisiya asi; I otorancho gidida gisho asas qopenna.

²⁵ Oothanaw koyonna gisho azalla amoy wodhees.

²⁶ Azalla asi ubba wode darobaa demmanaw amottees; shin xilloy baw ashshona immees.

²⁷ Goday iitata yarshuwa ixees; enti iyaw iita qofan shiishiya yarshuwa aathidi ixees.

²⁸ Wordo marki dhayana; shin tuma marki eqidi daana.

²⁹ Iita asi bessona xaala xaalees; shin suure asi yuushshi qopees.

³⁰ Asi ba cincatethan, akeekaninne zoren Godaara eqetanaw danda7enna.

³¹ Olas para kooranaw danda7etees; shin xoonoy Godaaba.