Leemiso 16 - Geeshsha Maxaafa

¹ Asi ba wozanan halchees; shin like zaaroy Godaape bentees.

² Asi oothiya ooso ubbay iyaw like daanees; shin Goday dendo qofaa be7ees.

³ Ne ooso ubbaa Godaas hadara imma; neeni qopidabay poletana.

⁴ Goday ubbabay qopidaysatho bana mela oothees; hanikoka, makallanchota wursethay dhayo.

⁵ Goday otoranchota ixees; enti seerettonna attokona.

⁶ Siiqoninne ammanetethan nagari atto geetetees; Godaas yayyidi asi iitabaape attees.

⁷ Asa hemethi Godaa ufaysiyabaa gidiko, I ba morketara saro daanada oothees.

⁸ Xillotethan bentiya guuthabay, wordon demmiya daro wodhepe lo77o.

⁹ Asi wozanan ba oothanaba halchees; shin halchoy Godaa maaden poletees.

¹⁰ Kawoy Xoossaafe ekida maatan pirdees; iya inxarsay suure pirdees.

¹¹ Gina mizaanetinne maka miisheti Godaaba; bayziyaba ubban geney doonna mela Goday koyees.

¹² Kawoti iita ooso ixoosona; enta araatay xillotethan eqees.

¹³ Kawoti xillo inxarsan ufaytoosona; tumaa haasaya uraa dosoosona.

¹⁴ Kawa hanqoy hayqo kiitancho mela; shin cinca asi hanquwa irxisees.

¹⁵ Kawa som7oy poo7iko de7oy de7ees; Iya lo77otethay ira ehiya shaara mela.

¹⁶ Cincatethi demoy worqa demope aadhees; akeeka demoy bira demope lo77o.

¹⁷ Suureta ogey iitape haako; ba hemethaa naagiya uray ba shempuwa naagees.

¹⁸ Otoroy dhayo kaalethees; ceeqetethi kundethi ehees.

¹⁹ Otoranchotara di7o shaaketanaape, ashke gididi manqidi de7eysi lo77o.

²⁰ Zore si7iya uraas I oothiyaba ubbay injetana; Godan ammanetiya uray anjetana.

²¹ Ba qofan cinca gidida asi akeekancho geetetees; lo77o qaali eratethi gujees.

²² Cinca asas eratethi de7o pulto mela; shin eeyata seeroy coo wode wursees.

²³ Cinca asi odetanaape sinthe qopees; iya mettershay eratethi gujees.

²⁴ Lo77o qaali eessa ililoda mal7ees; shempos mal7o; meqethas paxo gidees.

²⁵ Asas suure daaniya ogey de7ees; shin wursethan hayqoko gathees.

²⁶ Asi minnidi oothana mela oothey katha amo; koshi minnidi oothana mela denthethees.

²⁷ Kawusha asi iitabaa halchees; iya oday tamada xuuggees.

²⁸ Wobe asi ooshshi denthethees; zigirsi ammanetiya laggeta shaakees.

²⁹ Gene asi ba shooruwa cimmees; lo77o gidonna oge kaalethees.

³⁰ Ba ayfen qam7otiya asi geellaba qopees; ba mettersha saxidi mandiya asi iitabaa oothees.

³¹ Puulumida huuphey boncho kallacha; hessika bentey xillo de7o de7ina.

³² Wolqaama asi gidanaape danda7a asi gidoy lo77o, daro katamata olidi oykanaape bana haaroy aadhees.

³³ Asi saama yeggees; shin wursetha zaaroy Godaape bentees.