Leemiso 13 - Geeshsha Maxaafa

¹ Erancho na7ay ba aawa seera si7ees; shin qelqiseysi seera ekenna.

² Asi ba doonape keyiya qaalan lo77oba ekees; shin ammanetonaysati makallaba amottoosona.

³ Ba doona naagiya uray ba shempuwa naagees; shin eeson haasaya uray bana dhaysees.

⁴ Azallay amottees; amotikonne aybaka demmenna; shin minnidi ootheysati kallana.

⁵ Xillo asati wordo oda ixoosona. Shin iita asata odi yeellayeesinne kawushshees.

⁶ Suure de7uwa de7iya uraa iya xillotethay naagees; shin nagarancho iya nagaray ongees.

⁷ Bana dure daanisiya asi de7ees; shin iyaw aybinne baawa; qassi bana manqo daanisiya asi de7ees; shin iyaw daro aqoy de7ees.

⁸ Asi ba miishen ba shempo wozanaw danda7ees; shin manquwa yashisiyabay baawa.

⁹ Xillota poo7oy phoolees; shin iitata xompey to7ana.

¹⁰ Otoroy ooshshi yelees; shin zore ekeysati cincata.

¹¹ Daaburi bayna demmida miishey eeson dhayees; shin minni oothidi demmida aqoy, dari daridi bees.

¹² Koyiyabay poletonna gam7eysi azzanthees; shin amotidabay poleteysi ufaysees.

¹³ Zore kadhiya uray meton gelees; shin kiita bonchiya uray saro de7ana.

¹⁴ Cincatethi immiya timirtey de7o pulto; higgey ase hayqo xihepe kessi ekanaw maaddees.

¹⁵ Akeeki de7iya uray bonchetees; shin ammanetona ixoy qohos gathees.

¹⁶ Cinca asi ubbay eran oothees; shin eeyi ba eeyatetha qoncisees.

¹⁷ Iita asati kiitetidi, meton geloosona; shin ammanthiya asati kiitetidi, sarotethi ehoosona.

¹⁸ Seera ixiya asi manqeesinne yeellatees; shin seera ekiya uray bonchetees.

¹⁹ Amotidabay poleteysi daro ufaysees; shin iitati iitabaape haakanaw koyokona.

²⁰ Cinca asara hemetiya asi cinca gidees; shin eeya asara hemetiya asi meton gelees.

²¹ Nagaranchota iita qaaday kaallees; shin duretethi xillota woyto.

²² Lo77o asi ba nayta nayta laatisees; shin nagaranchuwa aqoy xilluwas dagayetees.

²³ Manquwa goshshay daro kathi ayfenaw danda7ees; shin suure pirda pacan dhayees.

²⁴ Pircon seeranaw dosonna asi ba na7aa ixees; shin ba na7aa siiqiya uray minnidi seerees.

²⁵ Xilloy, uloy kallana gakanaw mees; shin nagaranchoy ubba wode koshatana.