Leemiso 11 - Geeshsha Maxaafa

¹ Goday wordo mizaane ixees; shin like mizaanen ufaytees.

² Otoroy yaa wode kawushatethi yees; shin ashketethan cincatethi yees.

³ Xillota enta suuretethay kaalethees; shin iita asata enta geellatethay dhaysis.

⁴ Hanqo gallas duretethi go77enna; shin xillotethi hayqope ashshees.

⁵ Borey bayna uraa ogiya xillotethay suurisees; shin iita uray ba iitatethan kundees.

⁶ Suureta enta xillotethay ashshees; shin ammanetonayisata enta amoy xihe gididi oykana.

⁷ Iita asi hayqiya wode, I naagiya ufaysay iyara issife hayqees; I ba wolqan ceeqetiyabay ubbayka dhayees.

⁸ Xilloy metope attees; iya gisho iitaa bolla metoy yees.

⁹ Xoossaa kaddida asi ba doonan asa dhaysis; shin xilloti eran kessi ekoosona.

¹⁰ Xilloti bonchetiya wode, katamay ufaytees; qassi iitati hayqiya wode, hashshu gees.

¹¹ Xillota anjuwa gaason katamay diccees; shin iita uraa odi katamaa dhaysis.

¹² Ba shooruwa kadhiya uraas wozani baawa; shin akeekancho uray si77i gees.

¹³ Zigiriya asi xuuraa laallees; shin ammanetiya asi xuuraa genthees.

¹⁴ Kaalethiyabay dhayiko, kawotethay kundees; shin daro zoreysati de7iko, saroy de7ees.

¹⁵ Erenna uraas waase gidiya asi tumape metootana; hessafe waase gidonna ixeysi lo77o.

¹⁶ Ulo keeha maccasi bonchetawusu; shin iita asi duretetha xalaala duretees.

¹⁷ Keeha asi baw lo77oba oothees; shin wozana mino asi bana qohees.

¹⁸ Iita asi demmiya miishey cimo; shin xillotethaa zeriya uray tuma woyto cakana.

¹⁹ Xillotethan minnidi de7iya uray paxa de7ana; shin iitatethaa kaalliya uray hayqana.

²⁰ Goday iita qofay de7iya asata ixees; shin suure hemeteysatan ufaytees.

²¹ Iita asi seerettonna attenna; shin xillota kochay attana.

²² Qofi bayna mala lo77o macca puulatethay guduntho sidhen aathida worqaa mela.

²³ Xillota amuwas poloy lo77o xalaala; shin iitata amuwas poloy hanqo xalaala.

²⁴ Issi issi asati banta miishe asas coo keehosona; shin enta aqoy haa darees. Hara asati qassi banta miishas pala uuzettoosona; shin enta aqoy yaa pacees.

²⁵ Keeha asi duretana; harata maaddiya asi maadetana.

²⁶ Kathi al77in bayzanaw minjiya uraa asay baaddees. Shin ba kathaa asay koyiya wode bayziya uraa anjees.

²⁷ Lo77oba minthidi koyiya uray ufaysaa demmees; shin iitabaa koyiya uraa iitabay demmees.

²⁸ Ba duretetha ammanetiya asi kundana; shin xilloti balgo mithada.

²⁹ Ba soo asaa bolla buqethi denthiya uray go7etiyabay aybika baawa. Eeyatika cincatas aylle gidana.

³⁰ Xillo asi de7o ayfe ayfiya mitha mela; shempo ashsheysati cincata.

³¹ Xilloti sa7an banta ooso gate ekiyaba gidiko, iitatinne nagaranchati banta oosuwas ekana gatey waanidi darandeesha!