Leemiso 10 - Geeshsha Maxaafa

Solomone Leemisota

¹ Haysati Solomone leemisota. Cinca na7i ba aawa ufaysees; shin eeya na7i ba aayiw azzanthees.

² Nagaran demmida miishey go77enna; shin xillotethi hayqope ashshees.

³ Goday xillota koshaysenna; shin nagaranchota amuwa polisenna.

⁴ Azallatethi manqisees; shin minnidi oosoy dureyees.

⁵ Cinca asi ba kathaa bone shiishees; shin kathi cakiya wode dhiskiya asi kawuyees.

⁶ Xillo asi anjetees; shin nagarancho asi ba makallatethaa doonan genthees.

⁷ Xilluwa sunthay anjon xeegetishe de7ees; shin nagaranchota sunthay elle dogetees.

⁸ Cinca asi kiittidaba oothees; shin eeya asi dhayoko bees.

⁹ Suure asi saro de7ees; shin geella asi ba gomen oyketees.

¹⁰ Gene ayfen qam7otiya asi meto ehees; shin yayyonna seeriya asi sarotethi medhees.

¹¹ Xillo asa odi de7o pulto; shin nagarancho asa odi makalla genthees.

¹² Ixoy palama denthethees; shin siiqoy bala ubbaa kammees.

¹³ Wozanaama asi cincatethan odees; shin eeya asa zokoy xam7as attees.

¹⁴ Cincati eratethi dagayoosona; shin eeyata doonay dhayo dafees.

¹⁵ Dure asa miishey diretida katamada naagees; shin manqotethi manqota dhaysees.

¹⁶ Xillo asa oosoy iya de7o; shin iita asa wursethay dhayo.

¹⁷ Seerin simmiya asi de7o ogen hemetees; shin seerin ixiya asi balees.

¹⁸ Ixo kammiya asi wordancho; zigirsi laaliya asi eeya.

¹⁹ Daro haasaya giddon nagari dhayenna; shin ba doona shiishiya asi cinca.

²⁰ Xillo asa inxarsi geeshsha bira mela; shin iita asa wozani iitaban kumis.

²¹ Xillo asa odi daro asaa go77ees; shin eeyati banta paca wozanan hayqoosona.

²² Godaa anjoy dure kessees; he duretetha bolla meto gujenna.

²³ Eeya uraas iitabaa oosoy kaassa mela; shin wozanaama asi cincatethan ufaytees.

²⁴ Iita asi hirgidabay iya bolla gakana; shin xilloy amotidabay imetana.

²⁵ Gotey aadhiya wode nagaranchoy bentenna; shin xilloti merinaw minnidi daana.

²⁶ Caalabay ache, cuyi ayfe qoheysada, azalla asi kiittidaysa yiloyees.

²⁷ Godaas yashshi laythi adussees; shin nagaranchota laythay qaammees.

²⁸ Xillo asi ufaysi yaana gidi naagees; shin nagaranchota ufaysay dhayana.

²⁹ Godaa ogey xillotas baqatidi attiya besse; shin iita oothiya asaas dhayo.

³⁰ Xilloti ubba wode qaaxokona; shin iitati biitta bolla dookona.

³¹ Xillo asi cincatethan odees; shin geellaba odetiya inxarsi qanxetana

³² Xillo asa inxarsi bessiya haasaya erees; shin iita asaa oday wobbe.