Hose 4 - Geeshsha Maxaafa

Goday Isra7eele Mootees

¹ Ha biittan de7iya asa ubbaa, Goday mootiyabay de7iya gisho, Isra7eele asato, Godaa qaala si7ite. Hessika, biitta bolla ammanetethi, siiqoynne Xoossaa eroy baawa.

² Ha biitta bolla de7ey baadethi, wordo, shempo wodho, kaysotonne layma xalaala. Enti woga ubbaa menthosona; suuthu gussoosona.

³ Hessa gaason biitta ubbay yeekana; biittan de7iya ubbay daaburana. Sa7a do7ati, salo kafotinne abba moloti hayqana.

⁴ Hinteno, kahineto, taani hintena mootiyabay de7iya gisho, oonika hara asara palametofo; woyko hara asi mootopo.

⁵ Hinte gallasinne qamma dhubeteeta; nabetika hintera dhubetoosona. Hessa gisho, taani hinte aayiw dhaysana.

⁶ Ta asaas eratethi bayna gisho dhayidosona. Hinte eratethi ixida gisho, taka hinte taw kahine gidonna mela ixas. Hinte Xoossaa higgiya dogida gisho, taka hinte nayta dogana.

⁷ Kahineta tayboy dari dari biya wode tana guji guji naaqidosona; taani enta bonchuwa qaarada yeellayana.

⁸ Ta asaa nagaray entaw kathi gidida gisho enti ta asay balaba oothana mela koyoosona.

⁹ Kahineti deriyape dummatibokona. Taani enta hanota gisho, enta seerana; enta oosuwada entaw zaarana.

¹⁰ Enti Godaa aggida gisho maana, shin kallokona; laymatana, shin na7a yelokona.

¹¹ Laymatethi, gam7ida woyne ushshinne mal7anto woyne ushshi ta asaa wozanaa dhaysis.

¹² Enti mithafe oosetida eeqa misile zore oychoosona; enta xam7ay enta oysha zaarees. Laymatetha ayyaanay enta balethis; enti banta Xoossaafe haakidi laymatidosona.

¹³ Dereta huuphen yarsho yarshoosona; lo77o kuyay de7iya wolaa garsan, xiidda garsan ixaane cuyisoosona. Hessa gisho, hinte macca nayti laymatoosona; hinte nayta macheti laammoosona.

¹⁴ Hinte macca nayti laymatiya wodenne hinte nayta macheti laammiya wode taani seerike. Ayis giiko, addeti banta huuphen laymateysatara laggetoosona; entara yarshoosona. Hessa gisho, akeeki bayna derey dhayana.

¹⁵ “Isra7eele asato, hinte laymatikoka, Yihuda asay hinteysada bala gidopo. Galgala boopite; Beet-Aweena (Iitatetha keethi) keyopite; ‘De7o Xoossay eriya mela’ gidi caaqofite.

¹⁶ Isra7eele asay geella ussada geellatis. Yaatin, Goday entana dalga denban dorsa marada waatidi heemmanee?

¹⁷ Efreemi eeqatara gahetis; enta aggaagite.

¹⁸ Enti daro woyne ushsha uyi simmidi, laymatethi aggokona; enta halaqatika yeellayaba daro dosoosona.

¹⁹ Enta carkoy efana; banta eeqas yarshida yarshota gaason enti yeellatana.”