Efesoona 1 - Geeshsha Maxaafa

¹ Xoossaa shenen Kiristoos Yesuusa hawaare gidida Phawuloosape, Efesoonan de7iya geeshshatasinne Kiristoos Yesuusa ammaneysatas xaafetida kiitaa.

² Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.

Kiristoosan de7iya ayyaana anjuwa

³ Salon de7iya ayyaana anjo ubban Kiristoosa baggara nuna anjida, nu Godaa Yesuus Kiristoosa Aaway, Xoossay galatetto.

⁴ Nuuni iya sinthan geeshshatanne borey baynayisata gidana mela Xoossay alamey medhetanaape kase Kiristoosa baggara ba siiquwan nuna dooris.

⁵ Xoossay ba sheniyan ba dosidaysada Yesuus Kiristoosa baggara nuna ba nayta oothanaw kasetidi qopi wothis.

⁶ Xoossay ba siiqiya Na7aa baggara nuus coo immida aadho keehatethay bonchetana mela hessa oothis.

⁷ Xoossaa aadho keehatetha duretethaada Kiristoosa suuthan wozetidi nagara atotetha demmida.

⁸ Ba aadho keehatetha cincatethaninne eratethan kunthidi nuus immis.

⁹ Xoossay ba dosidaysada Kiristoosa baggara iya sheniya xuuraa nu erana mela oothis.

¹⁰ Wodey gakiya wode Xoossay polanaw qopida qofay, saloninne sa7an de7iya medhetetha ubbay Kiristoosape garsan gidana melasa.

¹¹ Ubbabaa ba sheniyada oothiya Xoossay, kasetidi halchidaysa Kiristoosa baggara nuuni iyabaa gidana mela nuna dooris.

¹² Hessa I oothiday, Kiristoosan ufaysi wothidi naagon koyro gidida nuuni Xoossaa bonchuwa galatan qoncisana melasa.

¹³ Hinteka hinte atotetha Wongela, hessika tuma qaala si7ida wode Kiristoosa ammanideta. Xoossay hintew immana gida Geeshsha Ayyaanan hinte attametideta.

¹⁴ Xoossaa bonchoy galatetana mela Xoossay ba asaa wozana gakanaw Geeshsha Ayyaana nuus oythu oothidi immis.

Phawuloosa woosa

¹⁵ Hessa gisho, Godaa Yesuusa hinte ammaneysanne geeshshata ubbaa hinte siiqeysa ta si7ida wode

¹⁶ ta woosan hintena qopashe hinte gisho Xoossaa galateysa aggabike.

¹⁷ Godaa Yesuus Kiristoosa Xoossay, boncho Aaway, Xoossaa hinte aathidi eranaada cincatethaanne qoncetha ayyaana hintew immanaada taani Xoossaa woossayis.

¹⁸ Xoossay hintena xeegida ufaysaynne geeshshati laattiya boncho laatay ay mela daroko hinte erana mela Xoossay hinte wozana ayfiya dooyana mela taani Xoossaa woossayis.

¹⁹ Qassi iya ammaniya nunan oothiya iya wolqay ay mela aadhida giteeko hinte erana mela woossayis. He wolqay xoonetonanne daaburonna wolqaa. Ha nunan de7idi oothiya wolqaynne,

²⁰ Kiristoosa hayqope denthidi, salon Xoossaafe ushacha baggara utisida gita wolqay issino.

²¹ Iya sunthay, ayseysatapenne maata aawatape, haareysatapenne godatape, bolla gididi ha alamiya xalaalan gidonashin, sinthafe yaana alamiyanka hara sunthata ubbaafe dhoqa.

²² Xoossay ubba Kiristoosa tohope garsan haarisis; qassi woosa keethan, ubbaban Godaa gidana mela iya shuumis.

²³ Woosa keethi Kiristoosa kumethi oothiya iya asatethi. Medhetethay de7iya bessa ubban Kiristoosi ba huuphen ubbaba kuntheysa.