ሃዋሬታ ኦሱዋ 1 - Geeshsha Maxaafa

Markatethas Giigetethi

^1-2 Tewofloosa, Yesuusi ba oosuwa oykida wodepe salo bida gallasaa gakanaw, oothidabaanne tamaarsidaba ubba taani ta koyro maxaafan xaafas. Salo baanape sinthe I ba doorida hawaareta, Geeshsha Ayyaanan kiittis.

³ I ba waayiyape guye, hayqope dendidaysa sidhey bayna qoncisidi entaw bana bessis. Oytamu gallas entaw qoncidi Xoossa kawotethaaba enta tamaarsis.

⁴ Issi wode entara issife de7ishe enta haysada yaagidi kiittis: “Ta hintew odida, ta Aaway immana gida ufaysa qaala naagitepe attishin, Yerusalaamepe keyopite.

⁵ Yohaanisi haathan xammaqis, shin guutha wodepe guye, Geeshsha Ayyaanan hinte xammaqetana” yaagis.

⁶ Hawaareti issife Yesuusara shiiqida bessan, “Godaw, Isra7eeletas ne kawotetha zaarana wodey haysee?” yaagidi oychidosona.

⁷ Yesuusi entako, “Ta Aaway ba maatan oothiya wodenne laythi hinte eranaw danda7eketa.

⁸ Shin Geeshsha Ayyaanay hinte bolla wodhiya wode, hinte wolqan kumana. Yaani simmidi, Yerusalaamen, Yihuda biitta ubban, Samaareninne sa7a gaxa gakanaw taw markata gidana” yaagis.

⁹ Hessa gidaape guye enti xeellishin, dhoqu dhoqu gidi, salo bin, iya enta ayfepe shaari genthis.

¹⁰ Yesuusi biya wode enti salo tishshi oothidi xeellishin, bootha ma7o ma7ida nam7u asati akeekona enta matan eqidi,

¹¹ “Galila asato, salo xeellishe, hinte ayis eqidetii? Ha hinte be7ishin salo bida Yesuusi hessadaka simmidi yaana” yaagidosona.

Yihuda Bessan Maatiyasa Dooretetha

¹² Hessafe guye, hawaareti Shamaho zumaape Yerusalaame simmidosona. Shamaho zumay Yerusalaames matan de7ees.

¹³ Enti Yerusalaame gelidi, banta de7iya bessa, pooqiya bolla keyidosona. Entika: Phexroosa, Yohaanisa, Yayqooba, Indiriyasa, Filphoosa, Toomasa, Bartelemoosa, Maatosa, Ilfiyoosa na7a Yayqooba, ba biittas mishetiya Simoonanne Yayqooba na7a Yihuda.

¹⁴ Haysati ubbay maccasatara, Yesuusa aaye Mayraamiranne Yesuusa ishatara ubbay issi wozanan gididi minthidi woossosona.

¹⁵ He wode, Phexroosi xeetanne laatama gidiya ammaniya asay shiiqida bessan dendi eqidi, haysada yaagis:

¹⁶ “Asaw, Yesuusa oykidaysata kaalethida Yihudaba, Geeshsha Ayyaanay kase Dawita doonan odida Xoossa qaalay poletanaw bessees.

¹⁷ Yihudi nuura issife ha oosuwa oothanaw dooretida asi.”

¹⁸ Shin Yihudi ba iita oosuwan demmida miishen gade shammis. I sintha guthu kundin, iya uloy daaketis; iya maraace ubbay kare keyis.

¹⁹ Yihuda bolla hanidaba Yerusalaamen de7iya asa ubbay si7is. Hessa gisho, he gadiya banta qaalan Akeldaama (Suutha gade) gidi xeegidosona.

²⁰ “Hessika mazmure maxaafan, “ ‘Iya keethay kallo atto; oonika iyan de7opo. Qassi iya shuumatetha hari eko’ geetetidi xaafetis.

²¹ “Hessa gisho, Godaa Yesuusi nu giddon simeretida wode ubban nuura de7eysatape,

²² qassi Xammaqiya Yohaanisa wodepe doomidi Godaa Yesuusi salo bida gallas gakanaw nuura de7eysatape issi asi iya denduwas nuura marka gidanaw bessees” yaagis.

²³ Hessa gisho, asay dooruwas Yosxoosa woyko Barsabaasa geetetiya Yoosefanne Maatiyasa nam7a shiishidosona.

²⁴ Hessafe guye, Xoossa woossishe, “Asa ubba wozana eriya Godaw, ha nam7atape ne oona dooridako nuna bessa.

²⁵ Yihudi ba bessaa bidi, aggida oosuwanne hawaaretetha oosuwa ekana mela haysatape nuus qoncisa” yaagidosona.

²⁶ Enta bolla saama yeggidosona. Saamay Maatiyasa bolla wodhin, Maatiyasi tammanne issi hawaareta bolla guzhetis.