1 Sameela 1 - Geeshsha Maxaafa

Sameela Yeletetha

¹ Derey dariya Efreema biittan, Rama kataman de7iya, Efreema kochenne Zuufa koche gidida, Hilqaana geetetiya issi addey de7ees. I Yirohaama na7a; Yirohaami Elihu na7a; Elihu Toohu na7a; Toohuy Zuufa na7aa.

² Hilqaanas nam7u macheti de7oosona; issinne sunthay Haanno; hankoori sunthay Pinaano. Pinaanis nayti de7oosona, shin Haannas na7i baawa.

³ Hilqaani laythan laythan Ubbaafe Wolqaama Godaa goyinnanawunne iyaw yarshanaw Seelo bees. Eeli nayti nam7ay, Afnaninne Finihaasi Godaa kahine gididi Seelon haggaazosona.

⁴ Hilqaani yarsho yarshiya wode ubban ashuwape issi issi kushe ba mache Pinaanis, ba adde naytasinne macca naytas huuphen huuphen immees.

⁵ Goday Haanno yelo diggikoka, Hilqaani iyo dosiya gisho, iw nam7u kushe immees.

⁶ Goday Haanno yelo diggida gisho, I dawuthiya iyo toochada yiloyawusu.

⁷ Hessi laythan laythan ubba wode haniyaba. Haanna Godaa keethi bida wode ubban I dawuthiya iya yeekana gakanawunne kathi ixana gakanaw yiloyawusu.

⁸ I azinay Hilqaani, “Haanne, ne ayis yeekay? Ayis kathi miikii? Ne wozanay ayis azzanii? Taani new tammu naytape aadhikinayee?” yaagees.

⁹ Issi gallas enti Seelon midaapenne uyidaape guye, Haanna denda eqasu. Kahiney Eeli Godaa keetha pengiya matan ba uttiya bessan uttis.

¹⁰ Haanna daro azzanida gisho cametada yeekashe Godaa woossasu.

¹¹ Iya haysada yaagada qangetasu; “Ubbaafe Wolqaama Godaw, tana ne aylliw be7a. Ta metuwa be7ada, tana hassaya; tana ne aylliw dogopa. Neeni taw ne ayllees adde na7a immiko, iya de7o laytha ubban taani iya new immana; iya huuphey polo meedetenna” yaagasu.

¹² Haanna Godaa woosa adussida wode Eeli I doona be7ees.

¹³ Haanna ba wozanan Xoossaa woossiya wode I mettershay qaaxees, shin I qaalay si7etenna; hessa gisho, Eeli iyo mathotidaada qopis.

¹⁴ I, “Neeni awude gakanaw mathotay? Woyne ushsha neepe digga” yaagis.

¹⁵ Haanni zaarada, “Ta Godaw, gidenna; taani daro azzanida maccas; taani ta shempuwafe Godaa woossaysipe attishin, woyne woyko mathoyiya ushshu uyabike.

¹⁶ Taani metoynne azzanoy darida gisho woossayis. Tana ne aylliw pathenna maccas oothada qopofa” yaagasu.

¹⁷ Eeli zaaridi, “Saro ba; neeni woossiyaba Isra7eele Xoossay new immo” yaagis.

¹⁸ Haanna, “Ne aylliya ne sinthan saba demmo” yaagasu. Hessafe guye, iya ba ogiya bada kathi masu; hessafe simmada iya azzanabuuku.

¹⁹ Wontetha gallas guura dendidi, Hilqaaninne iya soo asay Godaa goynidaape guye, Rama kataman de7iya banta soo simmidosona. Hilqaani ba mache Haannira aqis; Goday iyo qopis.

²⁰ Iya qanthatada adde na7a yelasu. Haanna, “Taani Godaa woossin I tana si7is” gada iya sunthaa Sameela sunthasu.

²¹ Hilqaani ba soo asa ubbaara laytha yarsho Godaas yarshanawunne qangetha gathanaw Seelo bis.

²² Shin Haanna babuku. Iya ba azinaako, “Na7ay dhanthi duuthidaape guye, iya efada, Godaas immana; I merinaw yan daana” yaagasu.

²³ Hilqaani, “Nena lo77idaba ootha; I dhanthi duuthana gakanaw son gam7anaw danda7aasa; Goday ba gelida qaala new polo” yaagis. Haanna ba na7aa dhanthi duuthana gakanaw son gam7asu.

²⁴ Haanna na7ay dhanthi duuthidaape guye, na7aanne heedzu laytha wofaano laatamu kilo giraame dhiillenne ogoro kumetha woyne ushshu ekada Seelon de7iya Godaa keethi basu; he wode na7ay guutha.

²⁵ Enti wofaanuwa shukidaape guye na7aa Eeliko efidosona.

²⁶ Haanna, “Ta godaw, ne shempoy ero; ne sinthan eqada Godaa woossida maccasiya tana.

²⁷ Ha na7aa immana mela woossin, Goday ta woossidaba immis.

²⁸ Hessa gisho, taani iya Godaas immas; I ba de7o laytha ubban Godaas imetis” yaagasu. Enti yan Godaa goyinnidosona.