1 ፅሞትዮሳ 1 - Geeshsha Maxaafa

¹ Nuna ashshiya Xoossaaninne nu ufaysan naagiya Yesuus Kiristoosan kiitetida, Yesuus Kiristoosa hawaare gidida, Phawuloosape,

² ammanon taw tuma na7a gidida Ximotiyoosas. Xoossaa nu Aawa, nu Godaa Kiristoosa aadho keehatethay, maarotethaynne sarotethay new gido.

Wordo Timirtefe Naagetethi

³ Taani Maqedoone bashe nena hadaridaysada, issi issi asati wordo timirtiya tamaarseysa digganaw ne Efesoonan gam7ana mela koyayis.

⁴ Enti go77i bayna hayse odanne banta kocha taybuwa agganaada oda. Hessa melabay palama kaaletheesipe attishin, ammanon oosetiya Xoossaa oosuwas maaddenna.

⁵ Ha kiitaa huuphe qofay geeshsha wozanape, lo77o kahapenne tuma ammanuwape bentiya siiquwa denthethanaasa.

⁶ Issi issi asati haysa aggidi, pathonna odako simmidosona.

⁷ Enti Xoossaa higgiya astamaare gidanaw koyoosona. Shin enti ay odiyako woyko tuma oothidi odeysi I aybeko erokona.

⁸ Asi besseysada higgiyan go7etiko higgey lo77o gideysa eroos.

⁹ Issiba akeekanaw koshshees. Higgey lo77o asaas medhetibeenna. Shin higgey, higge mentheyisata, worandzota, Xoosse yayyonnayisata, shempo wodheyisata, nagaranchota, geeshshatethi baynayisata, tunata, hari attoshin banta aayiw woyko aawa wodheyisata,

¹⁰ laammeyisata, addey addera laymateyisata, ase bayzeyisata, wordanchota, wordon caaqeyisata, woyko tuma timirtiyara gahetonna ay ooso ootheyisata seeranaw keyis.

¹¹ He timirtey bonchonne anjetida Xoossay taani awaajana mela taw hadara immida Wongela giddon de7ees.

Xoossa Maarotethas Galata

¹² Taani oothiya oosuwan taw wolqaa immida nu Godaa Kiristoos Yesuusa galatayis. Tana ba oosuwas shuumidi he oosuwas besseysa gidi taybida gisho iya galatayis.

¹³ Taani haysafe kase iya cayeysa, iya yedetheysanne metootheysa gidikoka taani hessa eronnanne ammanonna oothida gisho Xoossay tana maaris.

¹⁴ Nu Goday ba aadho keehatetha ta bolla gussidi, he aadho keehatethaara ammanonne siiqo Kiristoos Yesuusa baggara taw immis.

¹⁵ “Kiristoos Yesuusi nagaranchota ashshanaw ha alamiya yis” giya qaalay ammantheysanne asa ubbay ekanaw besseysa. Ubbaafe aadhida nagaranchoy tana.

¹⁶ Shin merinaa de7uwa ekanaw iya ammaniya asaas taani leemiso gidana mela Yesuus Kiristoosi daro danda7is. Taw ubbaafe aadhida nagaranchuwas Xoossay ba maarota darsis.

¹⁷ Ayfen bentonnaysas, issi Xoossaas, hayqonaysas, merinaa Kawas, merinaape merinaa gakanaw galataynne bonchoy gido. Amin7i.

¹⁸ Ximotiyoosa, ta na7aw, kase nebaa nabeti odida qaala bolla eqada ha kiitaa hadara new immayis. Ne he qaala kaalliko lo77o olaa oletana.

¹⁹ Ammanoynne lo77o kahi new de7o. Issoti issoti kaha dhayidi markabey hobben dhayeysada banta ammanuwa dhaysidosona.

²⁰ Hessa hanidaysata giddon Hemeneyoosinne Iskindirey de7oosona. Enti tamaaridi Xoossaa cayeysa aggana mela taani Xalahes entana aatha immas.