1 ተሰሎንቀ 1 - Geeshsha Maxaafa

¹ Phawuloosi Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafida kiita. Aadho keehatethaynne saroy hintew gido.

Teselonqe Asaa De7onne Ammano

² Nuuni Xoossaa woossiya wode ubban hintena qopishe hinte gisho ubba wode Xoossaa galatoos.

³ Xoossaa nu Aawa sinthan ammanon hinte oothida oosuwa, siiqon hinte daaburida daaburanne Yesuus Kiristoosan de7iya ufaysaa ekanaw hinte minnidi eqida equwa ubba wode nuuni qopoos.

⁴ Nu ishato, Xoossay hintena doseysanne ba ase oothidi hintena dooridaysa nuuni eroos.

⁵ Ayis giiko, nuuni Wongela doona xalaalan gidonashin, wolqan, Geeshsha Ayyaananinne Wongela tumaa ammanon hintew ehida. Nuuni hintera gam7ida wode ubban hinte gisho waanidi de7idaako hinte ereeta.

⁶ Hinte daro meto ekikoka Geeshsha Ayyaanay immiya ufaysan kiitaa ekideta; nunanne Godaa daanideta.

⁷ Hessa gisho, Maqedoonenne Akaya biittan de7iya ammaniya ubbaas leemiso gidideta.

⁸ Godaa qaalay hintefe keyidi, Maqedooneninne Akaya xalaalan gidonashin, Xoossaa hinte ammaneysi ubbason si7etis. Hiza, nuuni gaanabay aykoyka baawa.

⁹ Nuuni hinteko bida wode hinte nuna mokida mokuwanne hinte, hinte eeqa aggidi tumaanne de7o Xoossaa haggaazanaw hinte simmidaysa enti banta huuphen odoosona.

¹⁰ Qassi Xoossaa Na7ay, Yesuusi, Xoossay hayqope denthidaysi, sinthafe yaana Xoossaa hanquwafe nuna ashshanaysi, salope yaanaysa hinte naageysa enti markatoosona.