Zakaryaasa 8 - ጌሻ ማፃፋ

የሩሳላመይ ኦራፃና

¹ ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦

² ኡባፈ ዎልቃማ ጎዳይ፥ “ታኒ ፅዮነስ ዳሮ ቃታይስ፤ እ ምሻይ ታና ፁጌስ።

³ ታኒ ፅዮነ ስማዳ የሩሳላመን ዳና። ቃስ የሩሳላመይ አማንያ ካታማ ጌተታዳ ኤረታና። ኡባፈ ዎልቃማ ጎዳ ዙማይ ጌሻ ዙማ ጌተትድ ፄገታና” ያጌስ።

⁴ ኡባፈ ዎልቃማ ጎዳይ፥ “ጭምድ ጉፈራ ብያ አደይነ ማጫሳይ ካሰይሳዳ የሩሳላመ ዳባባን ኡታና።

⁵ የሩሳላመ ካታማ ኦገት ካእያ አደነ ማጫ ናይታን ኩማና” ያጌስ።

⁶ “አትዳ አሳስ ሄስ ማላልስያባ ግድኮካ፥ ታና ሄስ ማላልስያባዬ? ያጌስ ኡባፈ ዎልቃማ ጎዳይ።

⁷ ሄኮ ታኒ ታ አሳ ዶሎሀፐነ ዉሎሀፐ ሺሻና።

⁸ ኤንቲ የሩሳላመን ዳና መላ ኦና። ኤንቲ ታ አሰ ግዳና፤ ታኒ ፅሎነ አማንያ ኤንታ ፆሳ ግዳና” ያጌስ ኡባፈ ዎልቃማ ጎዳይ።

⁹ ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ኡባፈ ዎልቃማ ጎዳ ኬ ባሶይ የገትዳ ጋላሳፐ ዶምድ ናበት ኦድዳ ቃላ ስእዳይሳቶ፥ ህንተ ኩሽያ ምንተ፤ ኦሱዋ ምንድ ፖልተ።

¹⁰ ሄ ዎድያፐ ካሰ አሳስ ዳሞዘይ፥ መህያስ ቃንፀትያ ከር ባዋ። ታኒ አሳ ኡባ እሱዋ እሱዋ ቦላ ሞርከተን ደንዳ ግሾ፥ ገለይሳስነ ከየይሳስ ሳሮይ ባዋ።

¹¹ ሽን ሀእ ታኒ ሀ አትዳ አሳ ቦላ ካሰ ኦዳይሳዳ ኦከ” ያጌስ ኡባፈ ዎልቃማ ጎዳይ።

¹² “ኤንቲ ዘርዳ ኡባይ ዶላና፤ ዎይነይ ባ አይፍያ እማና፤ ጎሻይ ካን ኩማና፤ ሳሎት ባንታ እራ እማና። ሀይሳ ኡባ አትዳ አሳስ ላታ ኦዳ እማና።

¹³ ህንተኖ፥ ይሁዳ አሳዉ፥ እስራኤለ አሳዉ፥ ካዎተታ ግዶን ህንተ ባደትዳይሳታ ግድደታ፥ ሽን ሀእ ታኒ ህንተና አሻና፤ ህንተ አንጀትዳይሳታ ግዳና። ያዮፍተ! ህንተ ኩሽያ ምንተ!” ያጌስ።

¹⁴ “ህንተ ማይዛት ታና ይሎይዳ ዎደ ኤንታ ቃይ ባይና ሴራናዉ ቆፋ ቃቻስ።

¹⁵ ሀእ ታኒ የሩሳላመስነ ይሁዳስ ሎኦባ ኦናዉ ቆፋ ቃቻስ። ህዛ ያዮፍተ!

¹⁶ ህንተ ኦናዉ ኮሽያባይ ሀይሳ፦ እሶይ እሱዋራ ቱማ ኦደትተ፤ ፕርዳ ዳባባን ቱማነ ሳሩዋ ኤህያ ፕርዳ ፕርድተ።

¹⁷ እሶይ እሱዋ ቆሀናዉ ኢታባ ህንተ ዎዛናን ማቀቶፍተ፤ ዎርዶን ጫቆፍተ። ሀይሳታ ኡባ ታኒ እፃይስ” ያጌስ ኡባፈ ዎልቃማ ጎዳይ።

¹⁸ ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦

¹⁹ “ኦይዳን፥ እቻሻን፥ ላፑንነ ታማን አጌናን ህንተ ፆምዳ ፆማይ ይሁዳ አሳስ ኡፋይስነ እንጀ ዎደ ግዳና። ሄሳ ግሾ፥ ህንተ ቱማተነ ሳሮተ ዶስተ” ያጌስ።

²⁰ “ዳሮ አሳይነ ዳሮ ካታማታን ደእያ አሳይ የሩሳላመ ያና።

²¹ እስ ካታማን ደእያ አሳይ ሀራ ካታማን ደእያ አሳኮ ብድ፥ ‘ጎዳ አንጆይ ያና መላ ዎሳናዉነ ኡባፈ ዎልቃማ ጎዳ ኮያናዉ አነ ቦስ፤ ታንካ ባይስ’ ያጋና።

²² ቃስ ዳሮ አሳይነ ዎልቃማ ካዎተት ኡባፈ ዎልቃማ ጎዳ ኮያናዉነ ዎሳናዉ የሩሳላመ ያና።

²³ ሄ ጋላሳታን ዱማ ዱማ ቃላን ሃሳያ ካዎተታ ኡባፈ ታሙ አሳት ይድ፥ እስ አይሁደ አድያ ማኡዋ ማጫራ ኦይክድ፥ ‘ፆሳይ ህንተራ ደኤይሳ ኑኒ ስእዳ ግሾ፥ ኑኒ ህንተራ ባና’ ያጋና” ያጌስ ኡባፈ ዎልቃማ ጎዳይ።