Zakaryaasa 5 - ጌሻ ማፃፋ

ፃ ማፃፋ ቆንጨ

¹ ቃስ ታኒ ቁ ጋዳ ፄልያ ዎደ ቦላራ ፕራያ እስ ፃ ማፃፋ በአስ።

² ኪታንቾይ ታና፥ “ኔኒ አይ በአይ?” ያግድ ኦይችስ። ታኒ ዛራዳ፥ “ታኒ ቦላራ ፕራያ እስ ፃ ማፃፋ በአይስ፤ ሄ ማፃፋ አዱሳተይ ላታሙ ዋ ቃስ ጎምፓይ ታሙ ዋ” ያጋስ።

³ እ ታኮ፥ “ሀ ፃ ማፃፋ ግዶን ቢታ ኡባ ቦላ ያና ባደይ ፃፈትስ። ሄ ማፃፋን እስ ባጋራ፥ ‘ካይሶ ኡባይ ቢታፈ ያና’፤ ቃስ ሀንኮ ባጋራ፥ ‘ዎርዶን ጫቅያ ኡባይ ያና’ ግያ ፁፈይ ፃፈትስ።

⁴ ‘ታኒ ሀ ባደ ኪታና፤ ሄ ባደይ ብድ፥ ካይሱዋ ሶነ ታ ሱንን ዎርዶ ጫቀይሳ ሶ ገላና። ሄ ኬ ገልድ ምነ ሹቻ ይሳና’ ” ያገስ ኡባፈ ዎልቃማ ጎዳይ።

ዳቾን ኡትዳ ማጫሰ ቆንጨ

⁵ ሄሳፈ ጉየ፥ ታራ ሃሳያ ኪታንቾይ ታኮ ይድ፥ “አነ ቁ ጋዳ፥ ያባይ አይበኮ በአ” ያግስ።

⁶ ታኒ፥ “እ አይቤ?” ያጋዳ ኦይቻስ። እ ዛሪድ፥ “ሀይስ ማክያ ዳቾ” ያግስ። ቃስ ጉጅድ፥ “ሀይስ አሳይ ሀ ቢታ ኡባን ኦዳ ናቁዋ ማላታ” ያግስ።

⁷ እርሳሰ ጌተትያ ብራታፐ ኦሰትዳ ዳቹዋ ካማ ደንያ ዎደ እስ ማጫስ ዳቹዋን ኡታሱ።

⁸ ኪታንቾይ፥ “ሀና ኢታተ ሌምሶ” ያግስ። እዮ ጉየ ዳቹዋን የግድ እርሳሰ ካማ ዛሪድ ካምስ።

⁹ ሄሳፈ ጉየ፥ ታኒ ቁ ጋዳ ፄልያ ዎደ ኤንታ ቀፍያን ጫርኮይ ደእያ፥ ፕራያ ናምኡ ማጫሳታ በአስ። ኤንታ ቀፈይ ጎሎ ቀፈ መላ ምኖ፤ ኤንቲ ዳቹዋ ሳአፐ ድንድ ኤክድ ፕራዶሶና።

¹⁰ ታኒ ኪታንቹዋኮ፥ “ሀይሳቲ ዳቹዋ አዉ ኤፎና?” ያጋዳ ኦይቻስ።

¹¹ እ ዛሪድ፥ “ኤንቲ እያዉ ኬ ኬፃናዉ ሳናኦራ ቢታ ኤፎሶና። ኬይ ኬፀት ስምኮ ኤንቲ ሄ ዳቹዋ እያዉ ጊግዳ በሳን ዎና” ያግስ።