Zakaryaasa 3 - ጌሻ ማፃፋ

ካህነ ሀላቃ ማኡዋ

¹ ሄሳፈ ጉየ፥ ካህነ ሀላቃይ እያሱይ ጎዳ ኪታንቹዋ ስንን ኤቅዳይሳነ ፃላሄይ እያሱ ሞታናዉ እያፐ ኡሻቻ ባጋራ ኤቅዳይሳ ታና ቆንጨን በስስ።

² ጎዳይ፥ “ፃላህያዉ፥ ጎዳይ ነና ሴሮ፤ የሩሳላመ ዶርዳ ጎዳይ ነና ሴሮ! ሀ አደይ ታማፐ አትዳ ዱንቻ መላ ግደኔ?” ያግስ።

³ እያሱይ ቅታትዳ ማኦ ማእድ ኪታንቹዋ ስንን ኤቅስ።

⁴ ኪታንቾይ ባ ስንን ኤቅዳይሳታ፥ “እያ ቦላፈ ሀ ቅታ ማኡዋ ቃርተ” ያግስ። ቃስ እያሱኮ፥ “ሄኮ፥ ታኒ ነ ናጋራ ኔፐ ድጋስ፤ ቦንቾ ማኡዋ ነና ማይዛና።”

⁵ ታኒ፥ “ጌሻ ፃ ቃጭያ እያ ሁጰን ፃፅተ” ያግስ። ኤንቲ ኪትዳይሳዳ ኦዶሶና፤ ማኦ ማይዝዶሶና። ጎዳ ኪታንቾይ ሄ ዎደ እያ ምየን ኤቅስ።

⁶ ሄሳፈ ጉየ፥ ጎዳ ኪታንቾይ እያሱኮ፥

⁷ ኡባፈ ዎልቃማ ጎዳይ ሀይሳዳ ያጌስ፤ “ኔኒ ታ ኦግያን ሄመትኮነ ታ ኪታ ናግኮ፥ ኔኒ ታ ኬ አይሳና፤ ታ ዳባባን አዋታና። ቃስ ሀይሳን ኤቅዳይሳታራ እስፈ ገልያነ ከይያ ማታ ነዉ እማና።

⁸ ካህነ ሀላቃ እያሱ፥ ሀይሳ ስአ! ስንራ ያና ሎኦባስ ማላታ ግድዳይሳትነ ኔራ ኦይሳት ሀይሳ ስኦ! ታኒ፥ ‘ታሸ’ ጌተትያ ታ አይልያ ኤሀና።

⁹ ሄኮ፥ ታኒ እያሱ ስንን ሹቹ ዎና፤ ሄ ሹቻ ቦላ ላፑን አይፈት ደኦሶና። ታኒ ሄ ሹቻ ዎጫዳ እያ ቦላ ፁፈ ፃፋና፤ ሀ ቢታ ናጋራ እስ ጋላስ ድጋና” ያጌስ ኡባፈ ዎልቃማ ጎዳይ።

¹⁰ “ሄ ጋላስ ህንተ ኡባይ ህንተ ዎይነነ ህንተ ባላሰ ጋርሳን ኡትድ ህንተ ሾሩዋ ፄጋና” ያጌስ ኡባፈ ዎልቃማ ጎዳይ።