Zakaryaasa 14 - ጌሻ ማፃፋ

ፆሳይ ያና፥ ካዎታና

¹ ሄኮ፥ ጎዳ ፕርዳ ጋላሳይ ዬስ፤ ሄ ዎደ ህንተ ፄልሽን፥ ህንተፈ ቦንቅዳባ ህንተ ስንን ሻከታና።

² ካዎተታ ኡባ ጎዳይ የሩሳላመ ቦላ ኦላስ ሺሻና። ካታማይ ኦይከታና፤ ኬይ ቦንቀታና፤ ማጫ አሳ ዎልቃን ኢሳና። ካታማ አሳፐ ባጋይ ድኤትድ ባና፤ ሽን አትዳ አሳይ ካታማፐ ከየና።

³ ሄሳፈ ጉየ ጎዳይ ከይድ፥ ካሰ ኦላ ጋላስ ኦለተይሳዳ ካዎተታ ኦላና።

⁴ ሄ ጋላስ እያ ቶሆት የሩሳላመፐ ዶሎሀ ባጋራ ደእያ ሻማሆ ዙማ ቦላ ኤቃና። ሻማሆ ደረይ ዶሎሀፐ ዉሎሀ ጋካናዉ ናምኡ ከይድ ጳልቀትን፥ ዳሮ ግታ ዛንጋራይ መታና። ዙማፐ ባጋይ ፑደሀ ባጋ፥ ቃስ ባጋይ ዱገሀ ባጋ ሸርእ ጋና።

⁵ ሄ ዛንጋራይ ብድ አፄላ ጋካና፤ ህንተ ሄ ዛንጋራራ ባቃት አድ አታና። በን ይሁዳ ካዋ ኦዝያነ ላይ ቢታይ ቃፅን፥ ህንተ ማይዛት ባቃትድ አትዳይሳዳ ህንተ ባቃታና። ሄሳፈ ጉየ፥ ጎዳይ ታ ፆሳይ ባ ጌሻታ ኡባራ እስፈ ያና።

⁶ ሄ ዎደ ሜጎይ፥ ሻችነ ም ዴና።

⁷ ሄ ዎደ ቃምነ ጋላስ ባዋ፥ ጎዳይ ፃላል ኤርያ ዱማ ጋላስ ግዳና፤ ሄ ጋላስ ቃማይ ፖኦ ግዳና።

⁸ ሄ ዎደ ደኦ ሃይ የሩሳላመፐ ጎጋና፤ እያፐ ባጋይ ማፅነ አባን ገላና፤ ቃስ ባጋይ መደትራነ አባን ገላና። ሄ ሃይ ባልጎነ ቦነ ጎግሸ ዳና።

⁹ ጎዳይ ቢታ ኡባ ቦላ ካዎታና፤ ሄ ዎደ እስ ጎዳ ፃላል ዳና፤ እያ ሱን ፃላላ ፄጋና።

¹⁰ ግብአፐ ዶምድ የሩሳላመ ዱገሀ ባጋራ አድ እርሞና ካታማ ጋካናዉ ደእያ ቢታ ኡባይ ደምባታና። ሽን የሩሳላመይ ብንያመ ፐንግያፈ ብድ፥ በን ፐንግያ ግናራ ዞዘ ፐንግያ ጋካናዉ፥ ቃስ ሀናንኤላ አዱሳ ግምብያፈ ብድ፥ ካዎ ዎይነ ጉምእያ በሳ ጋካናዉ ባ በሳን ቁ ግድ ዳና።

¹¹ የሩሳላመይ አስ ደእያ በሲ ግዳና፤ ህዛፐ ጉየ የና፤ እያን ደእያ አሳይ ህርግ ባይና ሳሮ ዳና።

¹² ጎዳይ የሩሳላመ ኦላናዉ ደንድዳ አሳ ኡባ ቦላ ጋዶ ኤሀና። ኤንቲ ኤቆን ደእሽን፥ ኤንታ አሾይ ዎቃና፤ ኤንታ አይፈይ ባ ኦላን፥ ኤንታ እንፃርሳይ ባ ኮቶኑዋን ዎቃና።

¹³ ሄ ዎደ ጎዳይ ኤንታ ዎልቃማ ዳጋማ ዳጋንና። አሳ ኡባይ እሶይ እሱዋ ኩሽያ ኦይክድ ኦለታና።

¹⁴ ይሁዳ አሳይ የሩሳላመ ባጋ ግድድ ኦለታና። ዩሹዋን ደእያ ካዎተታ፥ ታይቦይ ባይና ሻሉዋ፥ ዎርቃ፥ ብራነ ማኡዋ ድእድ ሺሻና።

¹⁵ ሀ ጋዱዋ ዳንያ ጋዶይ ፓራታ ቦላ፥ ባቁሎታ ቦላ፥ ግማለታ ቦላ፥ ሀረታ ቦላነ ሞርከት ዱንካንዳ በሳን ደእያ መሄ ኡባ ቦላ ያና።

¹⁶ ሄሳፈ ጉየ፥ የሩሳላመ ኦልዳ ካዎተታፐ አትዳ ኡባይ ካዋ፥ ኡባፈ ዎልቃማ ጎዳ ጎይናናዉነ ሻቃራ ባኣለ ቦንቻናዉ ላይን ላይን የሩሳላመ ባና።

¹⁷ ሳአን ደእያ አሳፐ ኦንካ ካዋ፥ ኡባፈ ዎልቃማ ጎዳ ጎይናናዉ የሩሳላመ ቦና እፅኮ፥ ኤንታዉ እር ቡከና።

¹⁸ ግብፀ አሳይ ብድ ጎይኖና እፅኮ፥ ሻቃራ ባኣለ ቦንቻናዉ ቦና እፅዳ አሳ ቦላ ጋክዳ ጋዶይ ኤንታ ቦላ ያና።

¹⁹ ሻቃራ ባኣለ ቦንቻናዉ ቦና እፅዳ ግብፀይነ ሀራ ካዎተት ኡባይ ሴረታና ሴራይ ሀይሳ።

²⁰ ሄ ዎደ ፓራታ ቆን ደእያ ሻሾትያ ቦላ፥ “ጎዳስ ጌይዳይሳ” ጌተትያ ማላ ፁፈይ ፃፈታና። ፆሳ ኬን ደእያ ካያ ኦቶይ ያርሾ በሳ ማታን ደእያ ሳንያ መላ ጌሽ ግዳና።

²¹ የሩሳላመንነ ይሁዳን ደእያ ኦቶ ኡባይ ኡባፈ ዎልቃማ ጎዳስ ጌሽ ግዳና። ያርሾ ያርሽያ አሳ ኡባይ ሄ ኦቶታ ኤክድ፥ ያርሾ አሹዋ ኤንታን ካና። ሄ ዎደ ኡባፈ ዎልቃማ ጎዳ ኬን አይ ዛልአንቾይ ዴና።