Zakaryaasa 12 - ጌሻ ማፃፋ

የሩሳላመ ሞርከት ያና

¹ ሳሎታ ምጭዳይ፥ ሳኣ መዳይ፥ አሳስ ደኦ አያና እምዳ ጎዳይ እስራኤለባ ኦድዳ ጎዳ ቃላይ ሀይሳ፦

² “ሄኮ፥ ታኒ የሩሳላመ ካታማ፥ እያ ዩሹዋን ደእያ አሳ ኡባይ ኡይን ጋንድጋርስያ ዎይነ ኡሽ ትግያ ዋንጫ ኦና። የሩሳላመይ ኦይከትያ ዎደ ይሁዳ ካታማት ኦይከታና።

³ ሄ ዎደ ታኒ የሩሳላመ ካታማ አሳ ኡባስ ዴፆ ሹቹ ኦና፤ እያ ደንያ ኡባይ ባዉ ደሸታና። ሳኣ ካዎተት ኡባይ እያ ኦላናዉ እስፈ ሺቃና።

⁴ ሄ ዎደ ታኒ ፓራ ኡባ ዳጋንና፤ ፓራ አሳታ ጎሻና።” ታኒ ጎዳይ ሀይሳ ኦዳይስ። ይሁዳ አሳ ታኒ ታ ኬሀ አይፈን ፄላና፤ ሽን ሞርከታ ፓራታ ኡባ ቆቅሳና።

⁵ ሄ ዎደ ይሁዳ ሀላቃት ባንታ ዎዛናን፥ “የሩሳላመ አሳይ ኡባፈ ዎልቃማ ጎዳን፥ ባንታ ፆሳን፥ ምኖተ ደምዶሶና” ያጋና።

⁶ “ሄ ዎደ ታኒ ይሁዳ ኮቻታ ም ዶርያ ግዶን ደእያ ፂፋነ ምርቄታ ግዶን ላፅያ ፆምፐ ኦና። ኤንቲ ባንታ ኡሻቻን፥ ባንታ ሀድርሳንነ ባንታ ዩሹዋን ደእያ አሳ ኡባ ማና፤ ሽን የሩሳላመ ካታማይ፥ አሳይ ሳሮ ደእያ በሲ ግዳና።

⁷ “ዳዊታ ኮቻታ ቦንቾይነ የሩሳላመን ደኤይሳታ ቦንቾይ ይሁዳ አሳ ቦንቹዋፈ አና መላ ታኒ ጎዳይ ካሰታዳ ይሁዳ አሳስ ፆኖ እማና።

⁸ ሄ ዎደ ኤንታ ግዶን ዳሮ ላፋ ጌተትያ አስ ዳዊታ መላ ምኖ ግዳና። ታኒ ጎዳይ የሩሳላመን ደኤይሳታስ ጎንዳለ ግዳና። ዳዊታ ኮቻት ፆሳ መላ፥ ጎዳ ኪታንቾ መላ ግድድ ኤንታ ካለና።

⁹ ሄ ዎደ ታኒ የሩሳላመ ኦላናዉ ደንድያ ካዎተታ ኡባ ይሳናዉ ደንዳና።

¹⁰ “ሄ ዎደ ታኒ ዳዊታ ኮቻታ ቦላነ የሩሳላመን ደእያ አሳ ቦላ ቃነ ዎሳ አያና ጉሳና። ሄሳ ግሾ፥ ኤንቲ ባንታ ጫድዳይሳ በእያ ዎደ አስ ባ እስ ናአስ ዬከይሳዳ ዬካና። ቃስ ባ ባይራ ናአስ ካዮተይሳዳ ካዮታና።

¹¹ ሄ ዎደ የሩሳላመን ዬከትያ ዬሆይ ማግዶ ደንባን ሀዳድ-ርሞናስ ዬከትዳ ዬሁዋ መላ ዎልቃማ ግዳና።

¹² ቢታን ደእያ እስ እስ ኮቻይ ባዉ ባዉ ዬካና፤ ዳዊታ ኮቻት ባንታ ማቸታራ፥ ናታና ኮቻት ባንታ ማቸታራ ባንታዉ፥

¹³ ሌወ ኮቻት ባንታ ማቸታራ ባንታዉ፥ ሳመአ ኮቻት ባንታ ማቸታራ ባንታዉ፥ ዬካና።

¹⁴ አትዳ ኮቻ ኡባይ ባዉ ባዉ ዬካና፤ ኤንታ ማቸት ባንታዉ ባንታዉ ዬካና” ያጌስ።