Zaaretho 8 - ጌሻ ማፃፋ

ጎዳ ዶጎፕተ

¹ ህንተ ደኦን ዳና መላ፥ ህንተ ታይቦይ ዳራና መላነ ጎዳይ ካሰ ህንተ ማይዛታስ እማና ግድ ጫቅዳ ቢታ ገልድ፥ ህንተ ላታና መላ ሀች ታ ህንተና ኪትያ ኪታ ኡባ ምንድ ናግተ።

² ጎዳይ፥ ነ ፆሳይ ነዉ እምዳ ኪታ ነ ናግያኮነ ናጎናኮ፥ ነ ዎዛና ቆፋ ኤራናዉ ነና ፓጫናዉነ ነና አዳ ኦናዉ ኦይታሙ ላይ ኩመ ነና መላ ቢታን ዋት ካለዳኮ አኬካ።

³ አዳተ ኤርሳናዉ ነና ኮሻይስስ፤ ያትድ ነ ዎይኮ ነ ማይዛት ኤሮና ማና ነና ሙዝስ። ሄሳ እ ኦዳይ አስ ጎዳ ዶናፐ ከይያ ቃላ ኡባናፐ አትሽን፥ ካ ፃላላን ደኦናይሳ ነና ታማርሳናሳ።

⁴ ሀ ኦይታሙ ላይታ ግዶን ነ ማእዳ ማኦይ ዉርቤና፤ ነ ቶሆይ ክፅቤና።

⁵ አስ ባ ናአ ሴረይሳዳ ጎዳይ፥ ነ ፆሳይ ነና ሴሮይሳ አኬካ።

⁶ እያዉ ያያሸነ እያ ቦንቻሸ ጎዳ ነ ፆሳ ኪታ ናጋ።

⁷ ጎዳይ ነ ፆሳይ ነና ዛንጋራፐነ ደርያፐ ጎግያ ሻፋትነ ፑልቶት ደእያ ሎኦ ቢታ ገልሳናዉ ኤህስ።

⁸ ሄ ቢታይ ግስተይነ ባንግ፥ ዎይነይነ ባላሰይ፥ ኦሮማነይ፥ ሻማሆ ዛይተይነ ኤስ ኩምዳ ቢታ።

⁹ ሄ ቢታይ አይኮይካ ፓጮና ህንተ ካልድ ምያ ቢታ። ሄ ቢታይ ብራት ሹቻዳ ገላ ግድዳ ቢታ። ዙማፐ ማዳበ ብራታ ቦክድ ኤክያ ቢታ።

¹⁰ ነ ማዳ ካልዳ ዎደ ነው እ እምዳ ሎኦ ቢታ ግሾ፥ ጎዳ ነ ፆሳ ጋላታ።

¹¹ ታ ሀች ነና ኪትያ እያ ኪታ፥ እያ ህግያነ እያ አዋጁዋ ናጎና እፃዳ፥ ጎዳ ነ ፆሳ ዶጎና መላ ናገታ።

¹² ነ ማዳ ካልያ ዎደ፥ ሎኦ ኬ ኬፃዳ እያን ደእያ ዎደ፥

¹³ ነ መሄይነ ዶርሳይ ዳርያ ዎደ፥ ነዉ ብርነ ዎርቅ ዳጋየትያ ዎደ፥ ነዉ ደእዳባይ ኡባይ ዳርያ ዎደ፥

¹⁴ ሄ ዎደ፥ ነ ዎዛናይ ኦቶርቶና መላ፥ ግብፀ አይለተ ኬፈ ነና ዎዝዳ ጎዳ፥ ነ ፆሳ ዶጎና መላ ናገታ።

¹⁵ እ ነና ኢታ ሾሻይነ ኮርነይ ኩምዳ፥ ሃ ባይና፥ ግታነ ያሽያ መላ ቢታራ ነና ካለዳይሳ ዶጎፓ። እ ነዉ መላ ቢታን ዛላፈ ሃ ስስ።

¹⁶ ነ ማይዛት ኤሮና ማና እ ነና መላ ቢታን ሙዝስ። ዉርሰን ነዉ ኡባባይ እንጀታና መላ ነና አዳ ኦናዉነ ፓጫናዉ ሄሳ ኦስ።

¹⁷ ኔኒ፥ “ታ ዎልቃይነ ታ ኩሸ ምኖተይ ሀ ዱረተ ታዉ ኤህስ” ጎና መላ ናገታ።

¹⁸ ሽን ነ ዱረታና መላ ነዉ ዎልቃ እምዳይ ጎዳ፥ ነ ፆሳ ግደይሳ አኬካ። እ ሄሳ ኦዳይ፥ ሀች ነ በኤይሳዳ፥ ነ ማይዛታራ ጫቅዳ ጫቁዋ ምንናሳ።

¹⁹ ሽን ህንተ ጎዳ ህንተ ፆሳ አግድ፥ ሀራ ፆሳታ ካልኮ፥ ኤንታዉ ሆክኮነ ጎይንኮ፥ ህንተ ቱማ ያናይሳ ታ ሀች ማርካታይስ።

²⁰ ጎዳይ፥ ህንተ ፆሳይ ሀራ ካዎተታ ህንተ ስንፈ ይስዳይሳዳ ህንተ እያዉ ኪተቶና እፅኮ ህንተናካ ይሳና።