Zaaretho 6 - ጌሻ ማፃፋ

ግታ ኪታ

¹ ህንተ ላታናዉ ብያ ቢታን ህንተ ኦና መላ ታ ህንተና ታማርሳና መላ ጎዳይ፥ ህንተ ፆሳይ ታና ኪትዳ ኪታይ፥ አዋጆይነ ህገይ ሀይሳ።

² ነ ላይይ አዱቃና መላ ነ፥ ነ ናይትነ ነ ናይታ ናይት ጎዳ ነ ፆሳ ያይተ፤ ታ ሀች ነዉ እምያ ጎዳ አዋጅያነ ህግያ ነ ላይ ኡባን ናጋ።

³ ነኖ፥ እስራኤለ ስአ፤ ኡባባይ ነዉ እንጀታና መላነ ጎዳይ ነ አዋታ ፆሳይ፥ ነዉ ግዳይሳዳ ማነ ኤስ ጎግያ ቢታን ነ ዳራና መላ ሀ ህገታ ስአ፤ ምንዳ ናጋ።

⁴ ነኖ፥ እስራኤለ ስአ፤ ጎዳይ ኑ ፆሳይ እስ ፆሲ።

⁵ ነ ጎዳ፥ ነ ፆሳ ነ ኩመ ዎዛናፐ፥ ነ ኩመ ሸምፑዋፈነ ነ ኩመ ዎልቃፈ ዶሳ።

⁶ ሀች ታ ነና ኪትያ ሀ ኪታ ነ ዎዛናን ዎ።

⁷ ኤንታ ኔኒ ነ ናይታ ታማርሳ፤ ኔኒ ነ ሶን ኡትያ ዎደ፥ ኦገ ሄመትያ ዎደ፥ ዝንእያ ዎደነ ደንድያ ዎደ ኤንታባ ሃሳያ።

⁸ ማላ ኦዳ ነ ኩሸን ኤንታ ቃቻ፤ ቃስ ነ ሶምኦን ማላዳ ዎ።

⁹ ነ ፐንገ ዝዝገታ ቦላነ ነ ድርሳ ፐንግያ ቦላ ኤንታ ፃፋ።

¹⁰ ጎዳይ፥ ነ ፆሳይ ነዉ እማና ግድ ነ አዋታስ አብራሃመስ፥ ይሳቃስነ ያይቆባስ ጫቅዳ፥ ነ ኬፃቦና ግታነ ሎኦ ካታማት ኩምዳ ቢታ ነዉ እማና።

¹¹ ኔኒ ሺሻቦና ዱረተን ኩምዳ ኬታ፥ ነ ቦካቦና ሃ ኦላታ፥ ነ ቶካቦና ዎይነነ ሻማሆ ነዉ እምያ ዎደ፥ ኔኒ ማዳ ካልዳ ዎደ፥

¹² ነና ግብፀ አይለተ ቢታፈ ከስዳ፥ ጎዳ ዶጎና መላ ናገታ።

¹³ ጎዳ፥ ነ ፆሳ ያያ፤ እያ ፃላላ ጎይና፤ እያ ሱንን ጫቃ።

¹⁴ ነ ዩሾን ደእያ አሳይ ጎይንያ ሀራ ፆሳታ ጎይኖፋ።

¹⁵ ነ ግዶን ደእያ ጎዳይ፥ ነ ፆሳይ ቃናትያ ፆሱ። እያ ሀንቆይ ነ ቦላ ኤፃና፤ እ ነና ቢታ ቦላፈ ፕትድ ይሳና።

¹⁶ ማሳሀን ህንተ እያ ፓጭዳይሳዳ ጎዳ ህንተ ፆሳ ፓጮፕተ።

¹⁷ ጎዳይ፥ ህንተ ፆሳይ ህንተና ኪትዳ እያ ኪታ፥ እያ ዎጋነ እያ አዋጁዋ ምንድ ናግተ።

¹⁸ ነዉ ኡባባይ እንጀታና መላ ጎዳ ስንን ነ ሱረባነ ሎኦባ ኦ። ሄሳ ኦኮ፥ ነዉ እማናዉ ጎዳይ ነ አዋታስ ጫቅዳ፥ ሄ ሎኦ ቢታ ነ ላታና።

¹⁹ ጎዳይ ግዳይሳዳ ኔኒ፥ ነ ሞርከታ ኡባ ነ ስንፈ ጎዳና።

²⁰ ዎደፐ ነ ናይት፥ “ጎዳይ፥ ኑ ፆሳይ ህንተና ኪትዳ ሀ ዎጋ፥ አዋጅያነ ህግያ ብርሸይ አይቤ?” ያግድ ህንተና ኦይችያ ዎደ፥

²¹ ነ ኤንታዉ ሀይሳዳ ያጋዳ ዛራና፤ “ኑኒ ግብፀ ቢታን ግብፀ ካዋ አይለታ፥ ሽን ጎዳይ ባ ምኖ ኩሽያን ኑና ግብፀፈ ከስስ።

²² ጎዳይ ኑ ፄልሽን፥ ግብፀ ቢታ ቦላ፥ ግብፀ ካዋ ቦላነ እያ ሹማታ ኡባ ቦላ ግታነ ያሽያ ማላታታነ ማላልስያባታ ኦስ።

²³ ሽን እ ኑ ማይዛስ እማና ግድ ጫቅዳ ቢታ ኑስ እማናዉ ኑና ግብፀፈ ከስስ።

²⁴ ያትድ ሀች ህንተ በኤይሳዳ ኑስ ኡባ ዎደ ሎኦ ግዳና መላነ ኑኒ ደኦን ዳና መላ፥ ጎዳይ፥ ሀ አዋጆታ ኡባ ኑን ናጋና መላነ ጎዳስ ኑ ፆሳስ ያያና መላ ኪትስ።

²⁵ እ ኑና ኪትዳይሳዳ፥ ጎዳ፥ ኑ ፆሳ ስንን ሀ ኪታ ኡባ ምንድ ናግኮ፥ ሄስ ኑስ ፅሎተ ግዳና” ያግተ።