Zaaretho 26 - ጌሻ ማፃፋ

ባይራ ካ ያርሾነ አስራታ

¹ ጎዳይ፥ ነ ፆሳይ ነና ላትስያ ቢታ ገላዳ፥ ዎፑ ጋዳ ዱስ ኦይክያ ዎደ፥

² ጎዳይ፥ ነ ፆሳይ ነዉ እምያ ቢታን ሞክዳ ካ ኡባፈ ባይራ፥ ጎዳይ ነ ፆሳይ ባ ሱንይ ፄገታና መላ ዶርዳ በሳ ኤካዳ ባ።

³ ሄ ዎደ አዋትያ ካህንያኮ ባዳ፥ “ጎዳይ ታዉ እማና ግድ ካሰ ኑ ማይዛታስ ጫቅዳ በሳ ኑና ገልስዳ ጎዳስ፥ ኑ ፆሳስ፥ ሀች ማርካታይስ” ያግተ።

⁴ ካህነይ ካ ነ ኩሸፐ ኤክድ፥ ጎዳ ነ ፆሳ ያርሾ በሳ ስንን ዎ።

⁵ ሄሳፈ ጉየ፥ ጎዳ ነ ፆሳ ስንን ሀይሳዳ ያጋ፤ “ታ ማይዛይ በሳፈ በሰ ዩይሸ ደእዳ ሶረ ቢታ አስ፤ እ ታይቦን ጉ አሳታራ ግብፀ ዎድ ያን ደእስ። እ ያን ደእሸ ግታ፥ ዎልቃማነ ታይቦን ዳሮ ደረ ግድስ።

⁶ ሽን ግብፀት ኑኒ አይለ ግድድ ኦና መላ ኡንኤዶሶና፤ ካዉሽዶሶና።

⁷ ያትን፥ ኑኒ ጎዳኮ፥ ኑ አዋታ ፆሳኮ ዋስዳ። ጎዳይ ኑ ዋሱዋ ስእስ፤ ኑ ዋይያ፥ ኑ ዳቡራነ ኑ ኡንኤተ በእስ።

⁸ ጎዳይ ባ ዎልቃማ ኩሽያን፥ ባ ምጨትዳ ቀስያን፥ ግታ ዳጋማን፥ ማላታንነ ማላልስያባታን ኑና ግብፀፈ ከስስ።

⁹ ሀ በሳ ኑና ኤህድ፥ ማነ ኤስ ጎግያ ሀ ቢታ ኑስ እሚስ።

¹⁰ ሄኮ፥ ጎዳይ ኑስ እምዳ ቢታ አይፍያፐ ባይራ ኤሀስ” ያጋዳ፥ ካ ጎዳ ነ ፆሳ ስንን ዎዳ፥ እያ ስንን ጉፋና።

¹¹ ነዉነ ነ ሶ አሳስ ጎዳይ፥ ነ ፆሳይ እምዳ ሎኦባ ኡባን ኡፋይታሸ፥ ጎዳ ጋላታ። ሌወትነ ነ ግዶን ደእያ በተ አሳ ኡባይካ ኔራ ኡፋይቶ።

¹² አስራታ ከስያ ሄን ላይን፥ ነ ካፈ አስራታ ከሳ ኦንግዳፐ ጉየ ነ ካታማን ደእያ ሌወታስ፥ በተ አሳስ፥ ይኦታስነ አምኤታስ እማዳ ኤንቲ ካልድ ማና መላ ኦ።

¹³ ጎዳ፥ ነ ፆሳኮ፥ “ታኒ ታ ሶፐ ዱማትዳ ካ እሞታ ከሳዳ፥ ነ ታና ኪትዳይሳዳ ሌወታስ፥ በተ አሳስ፥ ይኦታስነ አምኤታስ እማስ። ታኒ ነ ኪታፐ እሱዋካ መንብከ፤ እሱዋካ ዶጋ አጋብከ።

¹⁴ ታ ካዮትያ ዎደካ፥ ሄ አስራታፐ አይባካ ማብከ፤ ታ ቱንዳ ዎደካ እያ ቦቻብከ፤ ሀይቅዳ አሳስ እያፐ እማብከ። ታኒ ጎዳ፥ ታ ፆሳ ቦንቻስ፤ እ ታና ኪትዳባ ኡባ ፖላስ።

¹⁵ ነኒ ደእያ ጌሻ በሳፈ፥ ሳሎፐ ዱገ ፄላ፤ ነ ደርያ እስራኤለ አንጃ፤ ካሰ ኑ ማይዛታስ ነ እማና ጋዳ ጫቅዳ ማነ ኤስ ጎግያ ቢታ ኑስ አንጃ” ያጋ።

ፆሳስ ዱማትዳ ደረ

¹⁶ ነ ሀ አዋጆታነ ዎጋታ ናጋና መላ ጎዳይ ነ ፆሳይ ሀች ነና ኪትስ። ሄሳ ግሾ፥ ነ ኩመ ዎዛናፐነ ኩመ ሸምፑዋፈ ኤንታ ናጋ።

¹⁷ ጎዳይ፥ ነው ፆሰ ግደይሳነ ነኒ እያ ኦግያን ባናዉ፥ እያ ዎጋ፥ እያ ኪታነ ህግያ ናጋናይሳ ሀች ኤርሳዳሳ።

¹⁸ ጎዳይ ባ ገልዳ ቃላዳ ነኒ እያ ደረ ግደይሳ፥ እያዉ ቡዞ ሚሸ ግደይሳነ እያ ኪታ ኡባ ናገይሳታ ግደይሳ ሀች ነና ኤርስስ።

¹⁹ ሄሳ ነኒ ኦኮ፥ እ መዳ ደረ ኡባፈ አድ ነና ጋላታን፥ ሱንንነ ቦንቾን ግታ ደረ ኦና። እ ገልዳ ቃላዳ ነኒ እያዉ ጌሻ ደረ ግዳና።