Zaaretho 2 - ጌሻ ማፃፋ

መላ ቢታን ብፃትዳ ዎደታ

¹ ሄሳፈ ጉየ፥ ጎዳይ ታና ኪትዳይሳዳ፥ ኑኒ ዞኦ አባ ኤፍያ ኦግያ ኦይክድ ጉየ ስሚድ መላ ቢታ መቶትሸ፥ ደረይ ዳርያ ሳይረ ቢታን ዳሮ ጋላሳ ቶይላትሸ ዩይዳ።

² ሄሳፈ ጉየ፥ ጎዳይ ታኮ ሀይሳዳ ያግስ።

³ “ሀ ደረይ ዳርያ ቢታ አዱሳ ዎደ ዩይዳይስ ህንተዉ ግዳና፤ ፑደሀ ባጋ ስሚድ ቢተ።

⁴ አሳ ኔኒ ያጋዳ ኪታ፤ ‘ሳይረን ደኤይ ኤሳዌ ናይታ ህንተ እሻታ ግድያ ግሾ ኤንታ ቢታራ ህንተ ካንታ። ኤንቲ ህንተዉ ያያና፥ ሽን ህንተ ኬህ ናገትተ።

⁵ ታኒ ኤንታ ቢታፈ ቶሆይ የያ በሳ መላ ህንተዉ እሞና ግሾ ኤንታራ ኦለቶፍተ። ታኒ ደረይ ዳርያ ሳይረ ቢታ ላታ ኦዳ ኤሳዌስ ኮይሮታዳ እማስ።

⁶ ህንተ ምያ ካነ ኡያ ሃ ኤንታፈ ሚሸን ሻምተ’ ” ያጋዳ ኪታ።

⁷ ጎዳይ ህንተ ፆሳይ ህንተ ኦዳባ ኡባ አንጅስ፤ ህንተ ሀ ዎልቃማ መላ ቢታን ሄመትያ ዎደ ህንተና ናግስ። ኦይታሙ ላይ ኡባን ጎዳይ ህንተ ፆሳይ ህንተራ ደእስ፤ ህንተዉ አይባካ ፓጭስቤና።

⁸ ሄሳ ግሾ፥ “ኑኒ ኑ እሻታ ግድያ ኤሳዌ ናይት ደእያ ሳይረ ቢታራ ካንድ ብዳ። ቃስ ኤላታነ ኤፅዮን-ጋብራ ካታማታፐ ደንድድ፥ ማፅነ አባኮ ጋያ ኦግያ አግድ፥ ሞአበ መላ ቢታራ አዳ።

⁹ ጎዳይ ታኮ፥ ‘ታኒ ኤንታ ቢታፈ አይባካ ህንተዉ እሞና ግሾ፥ ሞአበ አሳራ ካጨቶፍተ ዎይኮ ኤንታ ኦሎፕተ። ኤራ ካታማ ታኒ ላታ ኦዳ ሎፀ ኮቻስ ኮይሮ እማስ’ ” ያግስ።

¹⁰ (ሄ ቢታን ካሰ ምኖነ ዳሮ ግድዳ፥ ቃስ አናቀ ኮቻታዳ አዱሰ ግድዳ ኤምመታ ጌተትያ አሳት ደእዶሶና።

¹¹ ኤንቲ አናቀታዳ ራፋይመታ ጌተቶሶና። ሽን ሞአበ አሳይ ኤንታ ኤምመታ ግድ ፄጎሶና።

¹² ሆራ ቢታ አሳይ ካሰ ሳይረን ደእዶሶና፥ ሽን እስራኤለ አሳይ ላታና መላ ጎዳይ ኤንታዉ እምዳ ቢታን ኤንቲ ኦዳይሳዳ ኤሳዋ ኮቻት ሆራታ ኤንታ ቢታፈ ሾድዶሶና። ቃስ ባንታ ስንፈ ኤንታ ይስድ ኤንታ በሳን ኡትዶሶና።)

¹³ ጎዳይ ኑኮ፥ “ሀእ ደንድተ፥ ዛረአዳ ሻፋ ፕንተ” ያግን፥ ኑኒ ዛረዳ ሻፋ ፕንዳ።

¹⁴ ኑኒ ቃደስ-ባርነፈ ደንድድ፥ ዛረዳ ሻፋ ፕናና ጋካናዉ ሀስታማነ ሆስፑን ላይ አስ። ሄ ዎደ ጎዳይ ኤንታዉ ጫቅዳይሳዳ ኦላስ ጋክዳ አደ ኡባይ ዉርስ።

¹⁵ ዱንካንዳ ጉታፐ ኤንቲ ኩመ ያና ጋካናዉ፥ ጎዳ ኩሸይ ኤንታ ቦላ ዴፅስ።

¹⁶ ኦላስ ጋክዳ አደ አሳ ኡባይ ኩመ ይዳፐነ አሳ ግዶፈ ሀይቅድ ዉርዳፐ ጉየ፥

¹⁷ ጎዳይ ታኮ፥

¹⁸ “ኤራ ኦግያራ ሀች ህንተ ሞአበ ቢታ ካንታ።

¹⁹ ህንተ አሞነ አሳ ቢታ ጋክያ ዎደ ኤንታ ቦቾፍተ ዎይኮ ኤንታራ ኦየቶፍተ። አሞነ አሳታ ቢታፈ አይብባካ ታኒ ህንተዉ ላታ ኦዳ እምከ። ታኒ ሄ ቢታ ሎፀ ኮቻስ ላታ ኦዳ ኮይሮ እማስ” ያግስ።

²⁰ [ሄ ቢታይ ካሰ ያን ደእያ አሳይ ፄገትያ ሱን ራፋይመታ ቢታ ጌተትድ ፄገቴስ። ቃስ አሞነት ኤንታ ዛምዙመታ ግድ ፄጎሶና።

²¹ ኤንቲ አናቀታዳ አዱሰ፥ ምኖነ ዳሮ ደረ፥ ሽን ጎዳይ ኤንታ ይስን፥ አሞነት ኤንታ ቢታ ላትድ ኡትዶሶና።

²² ጎዳይ ሳይረን ደእያ ኤሳዌ ኮቻስ ኦዳይሳዳ፥ ኤንታ ቦላ ኦስ። ሄስካ እ ሄ ቢታን ደእያ ሆራታ ይስን፥ ኤሳዌ ኮቻይ ኤንታ ቢታ ላትድ ሀች ጋካናዉ ኡትዶሶና።

²³ ጋዛ ጋካናዉ ደእያ ሄራን ደእያ አዌት፥ ካፍቶረ ቢታፈ ይዳ ካፍቶረት ኤንታ ይስድ ኤንታ ቢታን ኡትዶሶና።]

²⁴ ቃስካ ጎዳይ ኑኮ፥ “ደንድተ፤ አርኖና ሻፋ ፕንተ። ሄኮ፥ አሞረ ቢታ አስ ግድዳ ሀሰቦና ካዋ ስሆናነ እያ ቢታ ታ ህንተ ኩሸን አዳ እማስ፤ እያ ኦልድ እያ ቢታ ላትተ።

²⁵ ሀችፈ ዶምን ሳሎፐ ጋርሳን ደእያ አሳ ኡባይ ህንተዉ ያያና መላ ታኒ ኦና። ኤንቲ ህንተባ ስእያ ዎደ ኡባን ያሻን ኮኮራና” ያግስ።

ስሆነ ፆነተ

²⁶ ሄሳፈ ጉየ፥ ቅደሞታ መላ ቢታፈ ሀሰቦና ካዋ ስሆናስ ኪታንቾታ ቦላ ሀይሳዳ ያጋዳ ሳሮ ቃላ ኪታስ።

²⁷ “ኑና ነ ቢታራ አርክ፤ ኑኒ ዎጋ ኦግያ ፃላላ ኦይክድ ባና፤ እያፐ ኡሻች ዎይኮ ሀድርስ ጎኮ።

²⁸ ኑኒ ምያ ካስነ ኡያ ሃስ ሚሸ ቃንፃና። ኑ ኮየይ ነ ቢታራ ካን አ ፃላላ።

²⁹ ሳይረን ደእያ ኤሳዌ ኮቻትነ፥ ኤራን ደእያ ሞአበ ኮቻት ኑና አዳይሳዳ ጎዳይ ኑ ፆሳይ፥ ኑስ እምያ ቢታስ ዮርዳኖሰ ሻፋ ኑኒ ፕናና ጋካናዉ ያራ ኑና አ” ያጋስ።

³⁰ ሽን ሀሰቦና ካዎይ ስሆነይ ኑና አና እፅስ። ጎዳይ ህንተ ፆሳይ ሀእ ኦዳይሳዳ እያ ህንተ ኩሸን አድ እማናዉ ኮይዳ ግሾ እያ ዎዛና ሙምስስድ፥ ኦቶራንቾ ኦስ።

³¹ ሄሳፈ ጉየ ጎዳይ ታኮ፥ “ሄኮ፥ ስሆናነ እያ ቢታ ታ ነዉ አዳ እሞ ዶማስ፤ ሀእ ፆናዳ እያ ቢታ ላታ” ያግስ።

³² ስሆነይ ባ ኦላንቾታ ኡባ ኤክድ ያሃፃ ጌተትያ በሳን ኑራ ኦለታናዉ ከይስ።

³³ ሽን ጎዳይ ኑ ፆሳይ ኑስ እያ አድ እምን፥ እያ፥ እያ አደ ናይታነ እያ ኦላንቾታ ኡባ ኑኒ ዎዳ።

³⁴ ሄ ዎደ ኑኒ እያ ካታማታ ኡባ ኦይክድ፥ እያን ደእያ አደ፥ ማጫነ ናአ ኡባ አሾና ይስዳ።

³⁵ ኤንታ መህያነ ኑኒ ኦይክዳ ካታማታፐ ድእዳይሳ ፃላላ ኑስ ኤክዳ።

³⁶ አርኖና ዛንጋራ ጋፃን ደእያ አሮኤራፐነ ሄ ዛንጋራ ግዶን ደእያ ካታማፐ ብድ ጋላዳ ቢታ ጋካናዉ ኑራ ኤቀትዳ እስ ካታምካ ዴና። ጎዳይ ኑ ፆሳይ ኤንታ ኡባ ኑ ኩሸን አድ እሚስ።

³⁷ ሽን ኑኒ አሞነ ቢታኮ፥ ያቦቃ ሻፋ ጋፃን ደእያ ቢታኮ፥ ገዘ ቢታን ደእያ ካታማታኮነ ጎዳይ ኑ ፆሳይ ኑኒ ቦና መላ ድግዳ በሳ ኡባ ሺቅቦኮ።