Zaaretho 11 - ጌሻ ማፃፋ

¹ ህዛ ጎዳ፥ ነ ፆሳ ዶሳ፤ እያ አዋጁዋ፥ ዎጋ፥ እያ ህግያነ እያ ኪታ ኡባ ዎደ ናጋ።

² ህንተ ናይት በኦናባነ ኤሮናባ ግድኮካ፥ ህንተ ሀች ጎዳ ሴራ፥ እያ ግታተ፥ እያ ዎልቃማ ኩሽያነ ምጨትዳ ቀስያ በእዳይሳ አኬክተ።

³ ህንተ እ ኦዳ ማላታታነ ግብፀ ካዋ ቦላነ እያ ቢታ ኡባ ቦላ ኦዳ ማላልስያባታ በእደታ።

⁴ ኤንቲ ህንተና ካልድ ጎድዳ ዎደ፥ ጎዳይ ግብፀ ቢታ ኦላንቾታ፥ ኤንታ ፓራታነ ፓራ ጋረታ ዞኦ አባን ምትስድ፥ ሀች ጋካናዉ ኤንታ ኩመ ይስዳይሳ በእደታ።

⁵ ህንተ ሀ በሳ ጋካናዉ መላ ቢታን ጎዳይ ህንተዉ ኦዳባ ህንተ ኤሬታ።

⁶ ሮቤላ ኮቻፈ ኤልኣባ ናይታ ግድዳ ዳታነ ቦላነ አቤሮ ቦላ ጎዳይ ኦዳይሳ አኬክተ። እስራኤለ አሳ ኡባይ በእሽን፥ ቢታይ ዶየትድ፥ ኤንታ፥ ኤንታ ሶ አሳ፥ ኤንታ ዱንካንያነ ሸምፖራ ደእያ ኤንታባ ኡባ ምትስ።

⁷ ጎዳይ ኦዳ ሀ ግታ ኦሶታ ኡባ ህንተ፥ ህንተ አይፈን በእደታ።

⁸ ህዛ ህንተ ምኖ ግዳና መላነ ዮርዳኖሰ ፕንድ ህንተ ኤካናዉ ብያ ቢታ ላታና መላ ታኒ ሀች ህንተና ኪትያ ኪታ ኡባ ናግተ።

⁹ ህንተ ኪተትኮ፥ ጎዳይ ህንተ ማይዛታስነ ኤንታ ኮቻስ እማና ግድ ጫቅዳ፥ ማነ ኤስ ጎግያ ቢታን ህንተ አዱሳ ላይ ዳና።

¹⁰ ነ ላታናዉ ብያ ቢታይ፥ ነ ከያዳ ይዳ ግብፀ ቢታ መላ ግደና። ግብፀን ነ ካ ዘራዳ፥ ጎሻ ቢታ ኡባ አታክልተ በሳዳ ሃ ኡሻሳ።

¹¹ ሽን ዮርዳኖሰ ፕንድ ህንተ ላታናዉ ብያ ቢታይ፥ ደረይነ ዛንጋራይ ደእያ፥ ሳሎ እራን አልያ ቢታ።

¹² ሄ ቢታይ፥ ጎዳይ ነ ፆሳይ ናግያ ቢታ፤ ላይ ዶመፈ ብድ ላይ ዉርሰ ጋካናዉ ጎዳ፥ ነ ፆሳ አይፈይ እያ ቦላ ደእያ ቢታ።

¹³ ሄሳ ግሾ፥ ጎዳ፥ ህንተ ፆሳ ሲቅኮ፥ ህንተ ኩመ ዎዛናፐነ ህንተ ኩመ ሸምፑዋፈ እያ ጎይንኮ፥ ታኒ ሀች ህንተዉ እምያ ኪታ ህንተ ናግኮ፥

¹⁴ ነ ካ፥ ዎይነይ ዛይተይ ፓጮና ሺሻና መላ ቶርቸነ ስላ እራ ዎደን ዎደን ቡክሳና።

¹⁵ ጎዳይ ነ መህያስ ማታ ዳርሳና፤ ነ ማና፤ ካላና።

¹⁶ ህንተ ዎዛና ሀራ ሶ ዛሪድ፥ ሀራ ፆሳታ ጎይኖና መላነ ሆኮና መላ ናገትተ።

¹⁷ ሄሳ ህንተ ኦኮ፥ ጎዳ ሀንቆይ ህንተ ቦላ ኤፃና፤ እራይ ቡኮና መላነ ካ ዶሎና መላ እ ሳሉዋ ጎርዳና። ህንተ ጎዳይ ህንተዉ እምያ ሎኦ ቢታፈ ኤሶን ያና።

¹⁸ ህዛ፥ ሀ ኪታታ ህንተ ዎዛናንነ ህንተ ቆፋን ዎተ። ማላዳ ኤንታ ህንተ ኩሸን ቃችተ፤ ቃስ ህንተ ሶምኦን ቃችተ።

¹⁹ ህንተ ናይታ ታማርስተ። ህንተ ሶን ደእያ ዎደ፥ ኦገን ሄመትያ ዎደ፥ ዝንእያ ዎደነ ደንድያ ዎደ ኤንታዉ ኦድተ።

²⁰ ህንተ ፐንገ ዝዝግያ ቦላነ ህንተ ድርሳ ፐንግያ ቦላ ፃፍተ።

²¹ ሄሳ ህንተ ኦኮ፥ ጎዳይ ህንተ ማይዛታስ እማና ግድ ጫቅዳ ቢታን፥ ህንተ ላይይነ ህንተ ናይታ ላይይ ሳአፐ ቦላራ ደእያ ሳሎ መላ ግዳና።

²² ህንተ ጎዳ፥ ህንተ ፆሳ ዶስኮ፥ እያ ኦገ ኡባን ህንተ ቢኮ፥ እያዉ አማነትኮ፥ ታ ሀች ህንተዉ እምያ ኪታ ህንተ ምንድ ናግኮ፥

²³ ጎዳይ ሀ ካዎተታ ኡባ ህንተ ስንፈ ጎድድ ከሳና። ህንተፈ ዳርያነ ዎልቃምያ ካዎተታ ቢታ የግስድ ኤካና።

²⁴ ቶሆን ህንተ የዳ ቢታ ኡባይ ህንተባ ግዳና። ህንተ ዛዋይ ዱገሀ መላ ቢታፈ ብድ ልባኖሰ ጋካናዉነ ኤፍራፂሳ ሻፋፐ ብድ ግታ አባ ጋካናዉ ግዳና።

²⁵ ህንተራ አይ አስካ ኤቀታናዉ ዳንዳኤና፤ ጎዳይ፥ ህንተ ፆሳይ ህንተዉ ግዳይሳዳ ህንተ ብያ ሶ ኡባን አሳይ ህንተና በእድ ዳጋማና መላነ ህንተዉ ያያና መላ ኦና።

²⁶ ሄኮ፥ ታ ሀች ህንተ ስንን አንጆነ ባደ ዎይስ።

²⁷ ታ ሀች ህንተና ኪትያ ጎዳ፥ ህንተ ፆሳ ኪታ ናግኮ፥ ህንተ አንጀታና።

²⁸ ሽን ታኒ ህንተና ሀች ኪትያ ጎዳ፥ ህንተ ፆሳ ኪታ ናጎና እፅድ፥ ሀራ ፆሳታ ጎይናናዉ እያ ኦግያፐ ደሽኮ፥ ህንተ ባደታና።

²⁹ ጎዳይ፥ ህንተ ፆሳይ ህንተ ላታናዉ ብያ ቢታ ህንተና ገልስያ ዎደ፥ ባደ ጋርዛና ዙማ ቦላ፥ አንጁዋ ኤባላ ዙማ ቦላ አዋጅተ።

³⁰ ሀ ዙማት ዮርዳኖሰ ሻፋፐ ሄፍንን ኦግያፐ ዉሎሀ ባጋን፥ አራባን ደእያ ካናነታ ቢታን፥ ጋልጋላ ስንን ደእያ ሞረ ም ማታን ደኦሶና።

³¹ ህንተ ሀእ ጎዳይ፥ ህንተ ፆሳይ ህንተዉ እምያ ቢታ ላታናዉ ዮርዳኖሰ ሻፋ ፕናና ሀኔታ። ህንተ ሄ ቢታ ኤክድ ያን ደእያ ዎደ፥

³² ታ ሀች ህንተዉ እምያ አዋጆታነ ህግያ ኡባ ምንድ ናግተ።