Yoonasa 1 - ጌሻ ማፃፋ

ዮናስ ፆሳፈ ባቃቱዋ

¹ ጎዳ ቃላይ አማተ ናኣ፥ ዮናሳስ ሀይሳዳ ያግድ ቆንጭስ።

² “ሄ ካታማ አሳ ኢታተይ ታ ስን ጋክዳ ግሾ፥ ደንዳዳ ህን ዎልቃማ ካታማ ናናወ ባዳ ሳባካ” ያግስ።

³ ሽን ዮናስ ጎዳ ስንፈ በትድ ታርሰሳ ቢታ ባናዉ ከይስ። እ፥ ዮጰ ካታማ ዎድ ታርሰሳ ብያ ማርካበ ደምስ። ጎዳ ስንፈ በታናዉ ኮይድ ታርሰሳ ባናዉ ኮሽያ ሚሸ ጭግድ ማርካብያን ገልስ።

⁴ ሽን ጎዳይ አባ ቦላ ዎልቃማ ጫርኩዋ ደንስ። አባን ዎልቃማ ሆበይ ዎልቃምዳ ግሾ ማርካብያ መቃናዉ ጋካሱ።

⁵ ያትን ማርካብያ ኦሳንቾት ያይዶሶና። እሶይ እሶይ ባ ፆሳኮ ባ ፆሳኮ ዋስስ። ቃስ ማርካበይ ካዉያና መላ ግዶን ደእያ ጫና ደንድ አባን የግዶሶና። ሽን ዮናስ ማርካብያስ ግዶ ገልድ ዎልቃማ ስኮ ስክስ።

⁶ ማርካብያ ላገይስ እያኮ ሺቅድ፥ “ሀይሳ መላ ሳተን ዋና ስካይ? ደንዳ ነ ፆሳ ዎሳ! ኦን ኤር እ ኑስ ቃትድ ኑና አሻነኮነ” ያግስ።

ዮናስ አባን የገትስ

⁷ ማርካብያ ኦሳንቾት እሶይ እሱዋኮ፥ “ሃ ዪተ፥ ሀ ኢታባይ ኑና ኦደ ጋሶን ጋክዳኮ ኤራናዉ ሳማ የጋና” ያግዶሶና። ሳማ የግን፥ ሳማይ ዮናሳ ቦላ ዎስ።

⁸ ኤንቲ ዮናሳኮ፥ “ሀ ኢታባይ ኦደ ጋሶን ኑ ቦላ ጋክዳኮ አነ ኑስ ኦዳ። ነ ኦሶይ አይቤ? አዉፐ ያዲ? ነ ቢታይ አዌ? ኔኒ ኦደ ባጌ?” ያግድ ኦይችዶሶና።

⁹ ዮናስ ዛሪድ፥ “ታኒ እብራወ አስ፤ አባነ ቢታ መዳ ጎዳ፥ ሳሎ ፆሳ ጎይንያ አስ” ያግስ።

¹⁰ እ ኤንታዉ ኮይሮትድ ኦድዳይሳዳ እ ጎዳ ስንፈ በተይሳ ኤርዶሶና። ሄሳ ግሾ፥ ኤንቲ ያይድ፥ “ላ አይባ ፓላባ ኦድ” ያግዶሶና።

¹¹ አባ ሆበይ ካሰይሳፈ ሃ ዳርዳ ግሾ አሳት ዮናሳ፥ “ኑስ አባይ ስእ ጋና መላ ነና ኑኒ ዋትኖ?” ያግድ ኦይችዶሶና።

¹² እካ፥ “ሀ ዎልቃማ ሆበይ ህንተ ቦላ ደንድዳይ ታ ጋሶን ግደይሳ ታኒ ኤራይስ። ሄሳ ግሾ፥ ታና ኤክድ አባን የግተ። ያትኮ አባይ ህንተዉ ስእ ጋና” ያግስ።

¹³ ሽን ማርካብያ ኦሳንቾት ማርካብያ ጋፃ ከሳናዉ ግታ ፕዶሶና። ሽን አባ ሆበይ ሃ ዳርዳ ግሾ ጋፃ ከሳናዉ ዳንዳእቦኮና።

¹⁴ ሄሳ ግሾ፥ ኤንቲ ጎዳኮ፥ “አቤት ጎዳዉ፥ ሃ ኡራ ሸምፑዋ ግሾ፥ ኔኒ ኑና ይሶናዳነ ሀ ጌሻ ሱ አጩዋ ኔኒ ኑፐ አቾናዳ ኑኒ ነና ምንድ ዎሶስ” ያግድ ጎዳ ዎስዶሶና።

¹⁵ ሄሳፈ ጉየ፥ ዮናሳ ደንድ፥ አባን የግዶሶና። አባ ሆባይካ ስእ ግስ።

¹⁶ ያትን አሳት ጎዳስ ዳሮ ያይድ ያርሾ ያርሽዶሶና፤ እያዉ ቃንግዶሶና።

¹⁷ ዮናሳ ምታና መላ እስ ግታ ሞሎ ጎዳይ ጊግስስ። ዮናስ ሄ ሞሉዋ ኡሎን ሄ ጋላስነ ሄ ቃማ ጋምእስ።