Yohaanisa 9 - ጌሻ ማፃፋ

ቆቀ ግድድ የለትዳ ኡራ

¹ የሱሲ ብሸ የለቶሳፐ ቆቀ ግድድ ደእያ እስ አድያ በእስ።

² እያ ታማረት፥ “አስታማርያዉ፥ ሀ አደይ ቆቀ ግድድ የለታና መላ ናጋራ ኦዳይ ኦኔ? እ ኦደየ ዎይኮ እያ የልዳይሳት ኦዶና?” ያግድ ኦይችዶሶና።

³ የሱሲ፥ “ፆሳ ኦሶይ እያ ቦላ ቆንጫና መላፐ አትሽን፥ እ ዎይኮ እያ የልዳይሳት ናጋራ ኦዳ ግሾ ግደና።

⁴ ሳእ ጋላስ ደእሽን ታና ኪትዳይሳ ኦሱዋ ኑ ኦናዉ በሴስ። ኦንካ ኦናዉ ዳንዳኦና ቃማይ ዬስ።

⁵ ታኒ አላምያን ደአሸ አላምያስ ፖኦ” ያግስ።

⁶ የሱሲ ሄሳ ግድ ሳአን ጩትስ። ባ ጩቻን ጉ ቢታ ላኮድ ሄ ኡርቃን ቆቀ አድያ አይፍያ ትይስ።

⁷ ያትድ፥ “ባዳ ሳልሆመ (ሳልሆመ ጉሳይ ኪተትዳይሳ ጉሱ) ጌተትያ ተቀትዳ ሃን ነ አይፍያ ሜጨታ” ያግስ። ሄሳ ግሾ፥ አደይ ብድ ባ አይፍያ ሜጨትድ ፄልሸ ስምስ።

⁸ አድያ ሾሮትነ አደይ ካሰ ዎስሽን በእዳ አሳይ፥ “ሀይስ ኡትድ ዎስያ አድያ ግደነዬ?” ያግዶሶና።

⁹ እስ እስ አሳይ፥ “ሀይስ እያ” ያግዶሶና። ሀራት ቃስ፥ “አካይ፥ ሀይስ እያ ዳኔስፐ አትሽን፥ እያ ግደና” ያግዶሶና። ሽን አደይ፥ “ኤ፥ ታና” ያግስ።

¹⁰ ኤንቲ እያኮ፥ “ያትን ነ አይፈይ ዋንድ ፄልዴ?” ያግድ ኦይችዶሶና።

¹¹ እ ዛሪድ፥ “የሱሳ ጌተትያ አደይ ጉ ኡርቃ ላኮድ ታ አይፍያ ትይድ፥ ‘ሳልሆመ ባዳ ነ አይፍያ ሜጨታ’ ያግን፥ ታኒ ባዳ ሜጨታዳ ፄላ አጋስ” ያግስ።

¹² ኤንቲ እያኮ፥ “እ አዉን ደኢ?” ያግድ ኦይችዶሶና። አደይ፥ “ታኒ ኤርከ” ያግስ።

¹³ ኤንቲ ካሰ ቆቀ፥ ሽን ሀእ ፄልዳ አድያ ፋርሳወታኮ ኤፍዶሶና።

¹⁴ የሱሲ ኡርቃ ላኮድ አድያ አይፍያ ፓዳ ጋላሳይ ሳምባታ ጋላስ።

¹⁵ ሄሳ ግሾ፥ አደይ ዋንድ ፄልዳኮ ፋርሳወት እያ ዛር ኦይችዶሶና። አደይ ኤንታኮ፥ “እ ታ አይፍያን ጉ ኡርቃ ትይስ። ታ አይፍያ ሜጨታዳ ሀእ ፄላይስ” ያግስ።

¹⁶ ፋርሳወተፐ እሶት እሶት፥ “ሀይሳ ኦዳ አደይ ሳምባታ ህግያ ናጎና ግሾ ፆሳ ማታፐ ይቤና” ያግዶሶና። ሽን ሀራት፥ “ናጋራንቾ አስ ሀይሳ መላ ማላታ ዋት ኦናዉ ዳንዳኢ?” ያግድ ባንታ ግዶን ሻከትዶሶና።

¹⁷ ሄሳ ግሾ፥ ፋርሳወት አድያኮ፥ “እ ነ አይፍያ ፄልስዳ ግሾ ነ እያባ ዎይጋይ?” ያግዶሶና። አደይ፥ “እ ናበ” ያግስ።

¹⁸ አይሁደ ሀላቃት፥ እያ አይዉነ አዋ ፄግድ ኦይቻና ጋካናዉ፥ አደይ ካሰ ቆቀ ግድዳይሳነ ሀእ እ ፄለይሳ አማንቦኮና።

¹⁹ ኤንቲ እያ አይዉነ እያ አዋኮ፥ “ህንተ ‘ቆቀ ግድድ የለትስ’ ግያ ህንተ ናአይ ሀይሴ? ያትን፥ ሀእ ዋንድ ፄልዴ?” ያግድ ኦይችዶሶና።

²⁰ እያ የልዳይሳት፥ “ሀይስ ኑ ናኣ ግድዳይሳነ ቆቀ ግድድ እ የለትዳይሳ ኑ ኤሮስ።

²¹ ሽን ሀእ እ ዋንድ ፄልዳኮ ቃስ እያ አይፍያ ኦን ፓዳኮ ኑኒ ኤሮኮ። እያ ኦይችተ። እ ባና ኤርዳ አስ ግድያ ግሾ ባባ ኦዳናዉ ዳንዳኤስ” ያግዶሶና።

²² እያ የልዳይሳት ሄሳ ግዳይ አይሁደታስ ያይዳ ግሾሳ። አይስ ጊኮ፥ አይሁደት፥ የሱሲ እ ክርስቶሳ ያግድ ማርካትያ አስ ደእኮ ሄ ኡራ አይሁደ ዎሳ ኬፈ ህላናዉ ኮይሮትድ ዞረ ቃችዶሶና።

²³ እያ የልዳይሳት፥ “እ ባና ኤርዳ አስ፤ እያ ኦይችተ” ያግዳይ ሄሳሳ።

²⁴ ሄሳ ግሾ፥ ቆቀ ግድድ የለትዳ አድያ ኤንቲ ዛር ፄግድ፥ “ቱማ ኦዳናዉ ፆሳን ጫቃ፤ ሀ አደይ ናጋራንቾ ግደይሳ ኑ ኤሮስ” ያግዶሶና።

²⁵ አደይ ዛሪድ፥ “እ ናጋራንቾ ግደይሳ፥ ታ ኤርከ። ታኒ ቆቀ ግደይሳነ ሀእ ፄለይሳ ሄ እስባ ኤራይስ” ያግስ።

²⁶ ኤንቲ ዛሪድ፥ “እ ነዉ አይ ኦዴ? እ ነ አይፍያ ዋት ፓዴ?” ያግዶሶና።

²⁷ እ ኤንታኮ፥ “ታኒ ህንተዉ ኦዳስ፥ ሽን ስእቤከታ። አይስ ዛር ስአናዉ ኮዬቲ? ህንተካ እያ ታማረ ግዳናዉ ኮዬትዬ?” ያግስ።

²⁸ ኤንቲ እያ ጫይድ፥ “ነ ሄ ኡራ ታማረ ግዳ፤ ኑኒ ሙሰ ታማረ።

²⁹ ፆሳይ ሙሰስ ኦድዳይሳ ኑኒ ኤሮስ፥ ሽን ሀር አቶሽን ሀ ኡራይ እ አዉፐ ይዳኮካ ኑ ኤሮኮ” ያግዶሶና።

³⁰ አደይ ኤንታኮ፥ “እ አዉፐ ይዳኮ ህንተ ኤሮናይስ ማላልስያባ፥ ሽን እ ታ አይፍያ ፓስ።

³¹ ፆሳ ቦንቸይሳነ እ ኮያባ ኦያ ኡራ ፆሳይ ስኤስፐ አትሽን፥ ናጋራንቾታ ስኤና።

³² ሳሎይ ሳእ መቶሳፐ ቆቀ ግድድ የለትዳ አሳ አይፈ ፓዳይ ኦንካ ባዋ።

³³ ሀ አደይ ፆሳፈ ኪተትቦናባ ግድያኮ እስባካ ኦናዉ ዳንዳኤና” ያግስ።

³⁴ ኤንቲ ዛሪድ፥ “ኔኒ ናጋራን የለታዳ ድጭዳይስ ኑና ታማርሳናዉ ኮያይ?” ያግዶሶና። እያ አይሁደ ዎሳ ኬፈ ህልዶሶና።

ዎዛና ቆቀተ

³⁵ የሱሲ ኤንቲ አድያ ከስዳይሳ ስእዳ ዎደ እያ ደምድ፥ “አሳ ናኣ አማናይ?” ያግድ ኦይችስ።

³⁶ አደይ የሱሳኮ፥ “ጎዳዉ፥ ታኒ እያ አማናና መላ እ ኦኔ? ታዉ ኦዳርኪ?” ያግስ።

³⁷ የሱሲ አድያኮ፥ “ኔኒ እያ በአዳሳ፤ ሀ ኔራ ኦደተይስ እያ” ያግስ።

³⁸ አደይ ዛሪድ፥ “ጎዳዉ፥ አማናይስ” ያግድ የሱሳስ ጎይንስ።

³⁹ የሱሲ፥ “ቆቀት ፄላና መላነ ፄለይሳት ቆቃና መላ ታኒ ፕርዳናዉ ሀ አላምያ ያስ” ያግስ።

⁴⁰ እያራ ደእያ ጉ ፋርሳወት ሄሳ ስእድ፥ “ኑ ቆቀዬ?” ያግድ ኦይችዶሶና።

⁴¹ የሱሲ፥ “ህንተ ቆቀ ግድያኮ ህንተዉ ናጋራ ግደና። ሽን ሀእ ህንተ ፄሎስ ግያ ግሾ ህንተ፥ ህንተ ናጋራን ደኤታ” ያግስ።