Yohaanisa 6 - ጌሻ ማፃፋ

እቻሹ ሙኩሉ አሳ

¹ ሄሳፈ ጉየ፥ የሱሲ ፅብራዶሳ ጌተትያ ጋልላ አባፈ ሄፍን ፕንስ።

² እ ሀርጋንቾታ ፓሶን ኦዳ ማላታ በእዳ ግሾ፥ ዳሮ አሳይ እያ ካልዶሶና።

³ የሱሲ ዙማ ቦላ ከይድ፥ ያን ባ ታማረታራ እስፈ ኡትስ።

⁴ አይሁደት ቦንችያ ፓስካ ባኣለ ጋላሳይ ጋክስ።

⁵ የሱሲ ዳሮ አሳይ ባኮ የይሳ በእድ ፍልጶሳኮ፥ “ሀ አሳ ኡባ ሙዛናዉ ግድያ ካ አዉፐ ሻማኔ?” ያግስ።

⁶ እ ሄሳ ፍልጶሳ ፓጫናዉ ግስፐ አትሽን፥ እ ባ ሁጰን አይ ኦነኮ ኤሬስ።

⁷ ፍልጶስ ዛሪድ የሱሳኮ፥ “ሀር አቶሽን፥ ሁጰን ሁጰን፥ እስ እስ ባርስ ጋናዉ፥ ናምኡ ፄቱ ድናረን ኡይ ሻምንካ ግደና” ያግስ።

⁸ ቃስ የሱሳ ታማረታፐ እሶይ፥ ስሞን ጰፅሮሳ እሻይ እንድርያስ፥

⁹ “እቻሹ ባንጋ ኡይነ ናምኡ ሞሎ ኦይክዳ እስ ናአይ ሀይሳን ደኤስ፥ ሽን ሀ አሳ ኡባስ ሄስ አይ ማዳኔ?” ያግስ።

¹⁰ የሱሲ ባ ታማረታኮ፥ “አሳ ኡትስተ” ያግስ። ሄ በሳን ዳሮ ማት ደኤስ፤ አሳ ኡባይ ኡትስ። አደ አሳ ታይቦይ እቻሹ ሙኩሉ ግዳና።

¹¹ የሱሲ ኡይ ኤክድ ፆሳ ጋላት ስሚድ ያን ኡትዳ አሳስ ግሽስ። ሞሉዋካ ኤክድ ሄሳዳ ኦድ እምን፥ አሳይ ባ ኮይዳይሳ መላ ምስ።

¹² ኤንቲ ኡባይ ካልዳፐ ጉየ፥ የሱሲ ባ ታማረታኮ፥ “እስባይካ ኢቶና መላ አትዳ ቲፍያ ሺሽተ” ያግስ።

¹³ ሄሳ ግሾ፥ ኤንቲ ኡባ ሺሽዶሶና። አሳይ ምን አትዳ ባንጋ ኡይ ቲፍያ ሺሽድ ታማነ ናምኡ ጋይታ ኩንዶሶና።

¹⁴ አሳይ የሱሲ ኦዳ ማላታታ በእዳ ዎደ፥ “ሀይስ ቱማ ሀ አላምያ ያና ጌተትዳ ናብያ” ያግዶሶና።

¹⁵ የሱሲ ኤንቲ እያ ኦይክድ ዎልቃን ካዎ ኦናዉ ሀነይሳ ኤርድ፥ ባርካ ዙማ ቦላ ዛሪድ ከይስ።

የሱሲ አባ ቦላራ ሄመትስ

¹⁶ ሳአይ ኦማርስዳ ዎደ የሱሳ ታማረት አባኮ ዎዶሶና።

¹⁷ ሳአይ ቃምዳ ግሾነ የሱሲ ቡሮ ኤንታኮ ይቦና ግሾ እያ ታማረት ዎጎሎን ገልድ አባ ፕንድ ቅፍርናሆማ ባናዉ ደንድዶሶና።

¹⁸ ዎልቃማ ጫርኮይ ጫርክዳ ግሾ አባይ ቃፄስ።

¹⁹ እቻሹ ዎይኮ ኡሱፑን ክሎ ምትረ ግደይሳ መላ ኤንቲ አባ ፕድ ብዳፐ ጉየ፥ የሱሲ አባ ቦላራ ሄመትሸ የይሳ በእድ ያይዶሶና።

²⁰ ሽን እ፥ “ባቦፍተ፥ ታና” ያግስ።

²¹ ኤንቲ ኡፋይትድ እያ ዎጎሉዋን ገልስዶሶና፤ ኢራካ ዎጎሎይ ኤንቲ ብያ አባ ጋፃ ጋክስ።

የሱሲ ደኦ ኡይ

²² ዎንተ ጋላስ አባፈ ሄፍንን አትዳ ዳሮ አሳይ እስ ዎጎሎ ፃላል ደኤይሳ በእዶሶና። የሱሲ ባ ታማረታራ ዎጎሉዋን ገልድ፥ ኤንታራ ቦናይሳነ ኤንቲ ባንታርካ ብዳይሳ አኬክዶሶና።

²³ ሽን ፅብራዶሳፐ ሀራ ዎጎሎት የሱሲ ፆሳ ጋላትን፥ አሳይ ኡይ ምዳ በሳ ይዶሶና።

²⁴ አሳይ የሱሲ ዎይኮ እያ ታማረት ያን ባይናይሳ በእድ፥ የሱሳ ኮያናዉ ዎጎሎታን ገልድ ቅፍርናሆማ ብዶሶና።

²⁵ አሳይ የሱሳ አባፈ ሄፍንን ደምዳ ዎደ፥ “አስታማርያዉ፥ ሃ አዉደ ያዲ?” ያግስ።

²⁶ የሱሲ ዛሪድ፥ “ታኒ ህንተዉ ቱማ ኦዳይስ፤ ህንተ ታና ኮየይ ኡይ ምድ ካልዳ ግሾሳፈ አትሽን፥ ማላታ በእዳ ግሾሳ ግደና።

²⁷ ሳምያ ካስ ኦፍተ፥ ሽን መርና ደኦ እምያ ካስ ኦተ። ፆሳ አዋይ እ ኦና መላ እያዉ ማታ እምዳ ግሾ ሄ ካ አሳ ናአይ ህንተዉ እማና” ያግስ።

²⁸ ያትን ኤንቲ፥ “ኑኒ ፆሳ ኦሱዋ ኦናዉ አይ ኦኔ?” ያግድ የሱሳ ኦይችዶሶና።

²⁹ የሱሲ ዛሪድ፥ “ህንተ ኦና መላ ፆሳይ ኮይያ ኦሶይ ሀይሳ፦ እ ኪትዳይሳ አማንተ” ያግስ።

³⁰ ኤንቲ ዛሪድ፥ “ኑኒ በእድ፥ ነና አማናና መላ አይ ማላታ ነ በሳኔ? ነ አይ ኦኔ?

³¹ ጌሻ ማፃፋን፥ ‘ኤንቲ ማና መላ ኡይ ሳሎፐ እሚስ’ ጌተትድ ፃፈትዳይሳዳ ኑ አዋት መላ ቢታን ማና ምዶሶና” ያግዶሶና።

³² የሱሲ፥ “ታኒ ህንተዉ ቱማ ኦዳይስ፤ ህንተዉ ሳሎፐ ቱማ ኡይ እምዳይ ታ አዋፐ አትሽን፥ ሙሰ ግደና።

³³ ህዛ፥ ፆሳይ እምያ ኡይይ ሳሎፐ ዎዳይስ አላምያስ ደኦ እመይሳ” ያግስ።

³⁴ ኤንቲ ዛሪድ፥ “ጎዳዉ፥ ኑስ ሄ ኡይ ኡባ ዎደ እማ” ያግዶሶና።

³⁵ የሱሲ፥ “ታኒ ደኦ እምያ ኡይ፤ ታኮ ያ ኦንካ ኡባራካ ኮሻተና። ቃስ ታና አማንያ ኡራይ ኡባራካ ሳሞተና።

³⁶ ሽን ታኒ ህንተዉ ኦዳስ፤ ህንተ ታና በእደታ፥ ሽን አማነከታ።

³⁷ ታ አዋይ ታዉ እምያ ኡባይ ታኮ ያና፤ ቃስ ታኮ ያ ኦናካ ካረ የድከ።

³⁸ ታኒ ታ ኮያባ ኦናዉ ግዶናሽን ታና ኪትዳይስ ኮያባ ኦናዉ ሳሎፐ ያስ።

³⁹ ታና ኪትዳይስ ኮየይ ሀይሳ፦ ታኒ እ ታዉ እምዳ ኡባታካ ዉርሰ ጋላስ ሀይቆፐ ደንና መላፐ አትሽን፥ እሱዋካ ይሳና መላ ኮየና።

⁴⁰ ህዛ፥ ታ አዋይ ኮየይ ሄሳ፦ ናኣ በእድ አማንያ ኡባይ መርና ደኡዋ ኤካና፤ ታኒ ሄ ኡባ ዉርሰ ጋላስ መርና ደኦስ ሀይቆፐ ደንና” ያግስ።

⁴¹ የሱሲ፥ “ታኒ ሳሎፐ ዎዳ ኡይ” ግዳ ግሾ፥ አይሁደት እያ ቦላ ዙዙምዶሶና።

⁴² ኤንቲ፥ “ሀይስ ኑኒ እያ አዋነ እያ አይዉ ኤርያ ዮሰፋ ናኣ የሱሳ ግደኔ? ያትን፥ እ ዋንድ፥ ‘ታኒ ሳሎፐ ዎስ’ ጋናዉ ዳንዳኢ?” ያግዶሶና።

⁴³ የሱሲ ዛሪድ፥ “እሶይ እሱዋራ ዙዙን አግተ።

⁴⁴ ታና ኪትዳ ታ አዋይ ታኮ ኤህያ አሳፐ አትሽን፥ ታኮ ያናዉ ዳንዳእያ ኦንካ ባዋ። ታኒ ዉርሰ ጋላስ እያ መርና ደኦስ ሀይቆፐ ደንና።

⁴⁵ ናበት፥ ‘ፆሳይ አሳ ኡባ ታማርሳና’ ያግድ ፃፍዶሶና። አዋ ስኤይስነ እያፐ ታማርያ ኦንካ ታኮ ዬስ።

⁴⁶ ፆሳ ማታፐ ይዳይሳፈ አትሽን፥ አዋ በእዳይ ኦንካ ባዋ፤ እያ ፃላል አዋ በእስ።

⁴⁷ “ታኒ ህንተዉ ቱማ ኦዳይስ፤ ታና አማንያ ኦደስካ መርና ደኦይ ደኤስ።

⁴⁸ ታኒ ደኦ እምያ ኡይ።

⁴⁹ ህንተ አዋት መላ ቢታን ማና ምዶሶና፥ ሽን ሀይቅዶሶና።

⁵⁰ ሳሎፐ ያ ኡይይ ሀይሳ፤ ሄ ኡይ ምያ ኦንካ ሀይቀና።

⁵¹ ሳሎፐ ይዳ ደኦ ኡይይ ታና። ኦንካ ሀ ኡይ ሚኮ መርናዉ ዳና። ቃስ ሀ አላመይ ደኦን ዳና መላ ታኒ ህንተዉ እማና ኡይይ ታ አሹዋ” ያግስ።

⁵² አይሁደት፥ “ሀ አደይ ባ አሹዋ ኑ ማና መላ ኑስ ዋትድ እማናዉ ዳንዳኢ?” ያግድ ባንታ ግዶን ፓላምዶሶና።

⁵³ ሄሳ ግሾ፥ የሱሲ ኤንታኮ፥ “ታኒ ህንተዉ ቱማ ኦዳይስ፤ አሳ ናኣ አሹዋ፥ ህንተ ሞና እፅኮ፥ ቃስ እያ ሱ ህንተ ኡዮና እፅኮ፥ ህንተዉ ደኦይ ባዋ።

⁵⁴ ታ አሹዋ ምያ ኡራስነ ታ ሱ ኡያ ኡራስ መርና ደኦይ ደኤስ። ታኒ ዉርሰ ጋላስ እያ ሀይቆፐ ደንና።

⁵⁵ ታ አሾይ ቱማ ካ፤ ታ ሱይካ ቱማ ኡሹ።

⁵⁶ ታ አሹዋ ምያ ኡራይነ ታ ሱ ኡያ ኡራይ ታናን ደኤስ፤ ታካ እያን ደአይስ።

⁵⁷ ደኦ አዋይ ታና ኪትን፥ ታኒ እያ ባጋራ ደኦን ደኤይሳዳ፥ ታና ምያ ኡራይካ ታ ጋሶን ደኦን ዳና።

⁵⁸ ሳሎፐ ዎዳ ኡይይ ሀይሳ፦ ህንተ አዋት ምድ ሀይቅዳ ማና መላ ግደና፤ ሀ ኡይ ምያ ኡራይ መርናዉ ዳና” ያግስ።

⁵⁹ የሱሲ ቅፍርናሆማ ካታማን አይሁደ ዎሳ ኬን ሀይሳ ታማርስስ።

መርና ደኦ ቃላ

⁶⁰ የሱሳ ታማረታፐ ዳርያ ባጋይ ሄሳ ስእዳ ዎደ፥ “ሀይስ ገሎና ትምርተ፤ ሀይስ ኦደስ ገሊ?” ያግዶሶና።

⁶¹ የሱሲ ባ ታማረት ሄሳስ ዙዙምዳይሳ ኤርድ፥ “ሀይስ ህንተና ቢ?

⁶² ያትን፥ አሳ ናአይ ካሰ ደእያሱዋ ፑደ ከይሽን ህንተ በእድ ዎይጋንደቲ?

⁶³ ጌሻ አያናይ ደኦ እሜስ፤ አሳ ዎልቅ አይኮካ ማደና። ታ ህንተዉ ኦድያ ቃላይ ደኦ እምያ ጌሻ አያናፐ ዬስ።

⁶⁴ ሽን ህንተ ግዶን አማኖናይሳት ደኦሶና” ያግስ። አማኖናይሳት ኦናንተኮ የሱሲ ኮይሮፐ ዶምድ ኤሬስ። ቃስ ባና አድ እማናይ ኦነኮ ኤሬስ።

⁶⁵ ቃስካ የሱሲ፥ “አዋይ ባ ጎና ኦንካ ታኮ ያናዉ ዳንዳኤና ጋዳ ታኒ ኦድዳይ ሄሳ ግሾሳ” ያግስ።

⁶⁶ ሄሳ ጋሶን፥ የሱሳ ካለይሳታፐ ዳሮት እያ አግድ ጉየ ስምዶሶና፤ ዛር እያ ካልቦኮና።

⁶⁷ የሱሲ ባ ታማነ ናምኡ ታማረታኮ፥ “ህንተካ አግድ ባናዉ ኮዬቲ?” ያግድ ኦይችስ።

⁶⁸ ስሞን ጰፅሮስ ዛሪድ፥ “ጎዳዉ፥ ኑኒ ኦደኮ ባኔ? ነዉ መርና ደኦ እምያ ቃላይ ደኤስ።

⁶⁹ ኔኒ ፆሳ ጌሻ ግደይሳ ኑኒ አማኖስነ ኤሮስ” ያግስ።

⁷⁰ የሱሲ ኤንታኮ፥ “ታኒ ህንተና ታማነ ናምአታ ዶራብክና? ሽን ህንተፈ እሶይ ፃላሄ” ያግስ።

⁷¹ የሱሲ ሄሳ ግዳይ ስሞና ናኣ አስቆሮታ ይሁዳሳ። ይሁድ የሱሳ አድ እማናዉ ደእያ ታማነ ናምኡ ታማረታፐ እሱዋ።