Yohaanisa 5 - ጌሻ ማፃፋ

ጉንዳ ኡራ

¹ ሄሳፈ ጉየ፥ የሱሲ አይሁደት ቦንችያ ባልያ ቦንቻናዉ የሩሳላመ ብስ።

² የሩሳላመን ዶርሳ ፐንግያ ማታን እብራወ ዶናን ቤተሳይዳ ግያ ተቀትዳ ሃ ደኤስ። ሄ ተቀት ኡትዳ ሃ ማታን እቻሹ ሸምፕያ በሳት ደኦሶና።

³ [ሄሳን ሃይ ቃፃናይሳ ናግያ] ዳሮ ሀርጋንቾት፥ ቆቀት፥ ዎበትነ ጉንዳት ዝንእዶሶና።

⁴ [አይስ ጊኮ፥ እስ እስ ቶሆ ጎዳ ኪታንቾይ ተቀትዳ ሃን ዎድ ሃ ቃስ። ሃይ ቃፅያ ዎደ ኮይሮ ገልዳ ኡራይ ባና ኦይክዳ አይ ሀርገፈካ ፓፄስ።]

⁵ ሄ በሳን ሀስታማነ ሆስፑን ላይ ሀርገትዳ እስ አደይ ደኤስ።

⁶ የሱሲ ያን ዝንእዳ አድያ በእድ፥ ቃስ ዳሮ ዎደ ሀርገትዳይሳ ኤርድ አድያኮ፥ “ፓፃናዉ ኮያይ?” ያግስ።

⁷ ሀርጋንቾይ ዛሪድ፥ “ጎዳዉ፥ ሃይ ቃፅያ ዎደ ታና ሃን የግያ አስ ባዋ። ታኒ ገላና ሀንያ ዎደ ሀራይ ታፐ ስንትድ ገል ክቼስ” ያግስ።

⁸ የሱሲ እያኮ፥ “ደንዳ ኤቃ፤ ነ አልጋ ቶካዳ ባ” ያግስ።

⁹ አደይ ኢራካ ፓፅስ፤ ባ አልጋ ቶክድ ብስ። ሄስ ሳምባታ ጋላሳን ሀንስ።

¹⁰ ሄሳ ግሾ፥ አይሁደት ፓፅዳ አድያኮ፥ “ሀች ሳእ ሳምባታ፤ ኔኒ ነ አልጋ ቶከይስ ዎጋ ግደና” ያግዶሶና።

¹¹ ሽን አደይ፥ “ታና ፓዳይስ፥ ነ አልጋ ቶካዳ ባ ግስ” ያግድ ዛርስ።

¹² ኤንቲ እያኮ፥ “ነና፥ ነ አልጋ ቶካዳ ባ ግዳይ እ ኦኔ?” ያግድ ኦይችዶሶና።

¹³ ሽን የሱሲ ሄ በሳን ዳሮ አሳ ግዶራ ኤርሶና ካንድ ብዳ ግሾ አደይ ባና ፓዳይ ኦነኮ ኤረና።

¹⁴ የሱሲ ጉየፐ ሄ አድያ ፆሳ ኬን ደምድ፥ “ሄኮ፥ ኔኒ ፓፃዳሳ፤ ሀይሳፈ ኢታባይ ነና ጋኮና መላ ዛራዳ ናጋራ ኦፋ” ያግስ።

¹⁵ ሄሳፈ ጉየ፥ አደይ ብድ ባና ፓዳይስ የሱሳ ግድዳይሳ አይሁደታስ ኦድስ።

¹⁶ የሱሲ ሄሳ ሳምባታ ጋላስ ኦዳ ግሾ፥ አይሁደት የሱሳ ጎዳ ኦይክዶሶና።

¹⁷ የሱሲ ዛሪድ፥ “ታ አዋይ ኡባ ዎደ ኦስ፤ ታካ ኦናዉ በሴስ” ያግስ።

¹⁸ የሱሲ ሳምባታ ቦንቾና ግሾ ፃላላስ ግዶናሽን ፆሳይ ባ አዋ ግድ ባና ፆሳራ ጊግስዳ ግሾ፥ አይሁደት እያ ዎናዉ ካሰፐ ምንድ ኮይዶሶና።

¹⁹ የሱሲ ዛሪድ፥ “ታኒ ህንተዉ ቱማ ኦዳይስ፤ ናአይ ባርካ አይኮካ ኦናዉ ዳንዳኤና። እ ባ አዋይ ኦሽን በኦይሳ ፃላላ ኦስ። አዋይ ኦይሳ ናአይካ ኦስ።

²⁰ አዋይ ባ ናኣ ዶስያ ግሾ እ ኦያ ኦሶ ኡባ ባ ናኣ በሴስ። ህንተ ማላለታና መላ እ ሀይሳፈ አያ ኦሶ ባ ናኣ በሳና።

²¹ አዋይ ሀይቅዳይሳታ ሀይቆፐ ደንድ ኤንታዉ ደኦ እመይሳዳ ናአይካ ባ ኮየይሳታስ ደኦ እሜስ።

²² አዋይ ናኣስ ፕርዳ ማታ ኡባ እሚስፐ አትሽን፥ እ ኦናካ ፕርደና።

²³ አሳ ኡባይ አዋ ቦንቸይሳዳ ናኣካ ቦንቻና። ናኣ ቦንቾና ኦንካ ናኣ ኪትዳ አዋካ ቦንቸና።

²⁴ “ታኒ ህንተዉ ቱማ ኦዳይስ፤ ታ ቃላ ስኤይሳስነ ታና ኪትዳይሳ አማነይሳስ መርና ደኦይ ደኤስ። እ ሀይቆፐ ደኦን ፕንዳ ግሾ ፕርደተና።

²⁵ ታኒ ህንተዉ ቱማ ኦዳይስ፤ ሀይቅዳ አሳይ ፆሳ ናኣ ቃላ ስእያ ዎደይ ያና፤ ሄስካ ሀእ። ሄ ቃላ ስኤይ ደኦን ዳና።

²⁶ አዋይ ደኦስ ፑልቶ ግድዳይሳዳ ናኣካ ደኦስ ፑልቶ ኦስ።

²⁷ ናአይ አሳ ናአ ግድያ ግሾ አዋይ ናኣስ ፕርዳ ማታ እሚስ።

²⁸ “ዱፎን ደኤይሳት እያ ቃላ ስእድ ደንድያ ዎደይ ያና ግሾ ሀይሳን ማላለቶፍተ።

²⁹ ሎኦ ኦዳይሳት ደኦን ዳናዉ ቃስ ኢታ ኦዳይሳት ፕርዳ ኤካናዉ ዱፎፐ ደንዳና።

³⁰ “ታኒ ታ ማታን አይብባካ ኦናዉ ዳንዳእከ። ፆሳይ ታዉ ኦድዳይሳዳ ፕርዳይስ። ታኒ ታና ኪትዳይስ ኮያባ ኦይስፐ አትሽን፥ ታ ኮያባ ኦና ግሾ ታ ፕርዳይ ቱማ።

³¹ “ታኒ ታባ ማርካትኮ ታ ማርካተይ ቱማ ግደና።

³² ታባ ማርካትያ ሀር ደኤስ፤ እ ታባ ማርካተይስ ቱማ ግደይሳ ታኒ ኤራይስ።

³³ “ህንተ ዮሃንሳኮ አሰ ኪትን እ ቱማስ ማርካትስ።

³⁴ ታኒ ሄሳ ህንተዉ ኦደይ፥ ህንተ አታና መላ ጋዳፐ አትሽን፥ አሳ ማርካተ ታዉ ኮሽን ግደና።

³⁵ ዮሃንስ ሙቃዳዳ ኤፅሸ ፖእስ። ህንተ ጉ ዎደ እያ ፖኡዋን ኡፋይትደታ።

³⁶ “ሽን ታዉ ዮሃንሳፐ አያ ማርክ ደኤስ። ታኒ ኦና መላ ታ አዋይ ታዉ እምዳ ኦሶት ታባ ማርካቶሶና፤ አዋይ ታና ኪትዳይሳ ቆንጭሶሶና።

³⁷ “ቃስ ታና ኪትዳ አዋይካ ባ ሁጰን ታባ ማርካቴስ። ህንተ እያ ቃላ ኡባራካ ስእቤከታ ዎይኮ እያ ማላ በእቤከታ።

³⁸ እ ኪትዳይሳ ህንተ አማኖና ግሾ እያ ቃላይ ህንተ ዎዛናን ባዋ።

³⁹ “ጌሻ ማፃፋታፐ መርና ደኦ ደማናባ ህንተዉ ዳንን ኤንታ ፕልጌታ፤ ኤንቲ ታባ ማርካቶሶና።

⁴⁰ ሽን ህንተ ደኦ ደማናዉ ታኮ ያናዉ ኮየከታ።

⁴¹ “አሳፐ ታኒ ቦንቾ ኮይከ።

⁴² ሽን ታኒ ህንተ ዎዛናን ፆሳ ሲቆይ ባይናይሳ ኤራይስ።

⁴³ ታኒ ታ አዋ ማታን ያስ፥ ሽን ታና ሞክበከታ። ሀራይ ባ ማታን ያ ዎደ እያ ሞኬታ።

⁴⁴ ህንተ እሶይ እሱዋፈ ቦንቾ ኮየይሳት፥ እስ ፆሳፈ ያ ጋላታ ኤካናዉ ኮዮናይሳት፥ ዋንድ ታና አማናናዉ ዳንዳኤቲ?

⁴⁵ “ታኒ ታ አዋ ስንን ህንተና ሞትያባ ህንተዉ ዳኖፖ። ህንተና ሞታናይ ህንተ ኡፋይሳን ናግያ ሙሰ።

⁴⁶ ህንተ ሙሰ አማንዳባ ግድያኮ እ ታባ ፃፍዳ ግሾ ታናካ አማናናሽን።

⁴⁷ ሽን ህንተ እ ፃፍዳይሳ አማኖና እፅኮ ታ ቃላ ዋትድ አማናኔ?” ያግስ።