Yohaanisa 4 - ጌሻ ማፃፋ

የሱሳነ ሳማረ ማጫስዉ

¹ የሱሲ ዮሃንሳፐ ዳሮ ካልያ አሳ ባኮ ሺሸይሳነ ፃማቀይሳ ፋርሳወት ስእዶሶና።

² ግድኮካ የሱሳ ታማረት ፃማቅዶሶናፐ አትሽን፥ የሱሲ ኦናካ ፃማቅቤና።

³ የሱሲ አሳይ እያባ ገይሳ ስእዳ ዎደ ይሁዳፐ ደንድድ ጋልላ ብስ።

⁴ እ፥ ጋልላ ብሸ ሳማረራ አናይስ አቶናባ ግድስ።

⁵ ሄሳ ግሾ፥ ያይቆብ ባ ናኣ ዮሰፋስ እምዳ ጋድያ ማታን ደእያ ስካረ ጌተትያ ሳማረ ካታማ ብስ።

⁶ ሄ በሳን ያይቆባ ሃ ኦላይ ደኤስ። የሱሲ ሄመን ዳቡርድ ሄ ሃ ኦላ ማታን ኡትስ። ሄ ዎደ ሳእ ኡሱፑን ሳተ ሄራ።

⁷ እስ ሳማረ ካታማ ማጫስ ሄ ኦላፈ ሃ ትካናዉ ያሱ። የሱሲ ሄ ማጫሴኮ፥ “ታና ሃ ኡሻርክ” ያግስ።

⁸ ሄ ዎደ የሱሳ ታማረት ካ ሻማናዉ ካታማ ብዶሶናሽን።

⁹ ሄ ማጫስያ ዛራዳ፥ “ኔኒ አይሁደ አሰ ግዳሸ፥ ሳማረ ማጫስ ግድያ ታና ዋናዳ ሃ ኡሻ ጋይ?” ያጋሱ። ሄሳ እያ ግዳይ አይሁደት ሳማረታራ ጋሄቶና ግሾሳ።

¹⁰ የሱሲ ዛሪድ፥ “ኔኒ ፆሳ እሞታነ ሃ ታና ኡሻ ገይስ ኦነኮ ኤርዳባ ግድያኮ እያ ነ ዎሳና፤ እካ ነዉ ደኦ እምያ ሃ እማናሽን” ያግስ።

¹¹ ማጫስያ ዛራዳ፥ “ጎዳዉ፥ ነዉ ዱቅያባይ ባዋ፤ ኦላይካ ዝቃ። ያትን፥ ደኦ እምያ ሃ ነ አዉፐ ኤካኔ?

¹² ኑስ ሀ ሃ ኦላ እምዳ ኑ አዋ ያይቆባፐ ኔኒ አይ? እ፥ እያ ናይትነ እያ መሄይ ሀ ኦላፈ ኡይዶሶና” ያጋሱ።

¹³ የሱሲ፥ “ሀ ሃፈ ኡይዳ ኦንካ ዛር ሳሞታና።

¹⁴ ሽን ታኒ እማና ሃ ኡያ ኦንካ ኡባካ ሳሞተና። ታኒ እሚያ ሃይ እያ ግዶን መርና ደኦ እምያ ጎግያ ፑልቶ ግዳና” ያግስ።

¹⁵ ማጫስያ ዛራዳ፥ “ጎዳዉ፥ ታኒ ሳሞቶና መላነ ሃ ትካናዉ ሀ በሳ ዮና መላ ታዉ ሄ ሃ እማ” ያጋሱ።

¹⁶ የሱሲ ኢኮ፥ “ባዳ ነ አዝና ፄጋዳ ያ” ያግስ።

¹⁷ ማጫስያ ዛራዳ፥ “ታዉ አዝን ባዋ” ያጋሱ። የሱሲ ኢኮ፥ “ታዉ አዝን ባዋ ጋሸ ባላባካ።

¹⁸ ነዉ ካሰ እቻሹ አዝናት ደኦሶና። ሀእ ኔራ ደእያ አደይ ነ አዝና ግደና። ኔኒ ሀእ ቱማ ኦዳዳሳ” ያግስ።

¹⁹ ማጫስያ ዛራዳ፥ “ጎዳዉ፥ ኔኒ ናበ ግደይሳ ታኒ ኤራስ።

²⁰ ኑ አዋት ሀ ዙማ ቦላ ፆሳ ጎይንዶሶና። ሽን ህንተ አይሁደት አስ ፆሳስ ጎይናናዉ በሲያ በሳይ የሩሳላመና ጌታ” ያጋሱ።

²¹ የሱሲ፥ “ሀ ማጫሰተ ታና አማና፤ ሀ ዙማ ቦላ ዎይኮ የሩሳላመን አዋስ ህንተ ጎይኖና ዎደይ ያና።

²² ህንተ ሳማረት ኤሮናይሳ ጎይነታ። ሽን ኑኒ አቶተይ አይሁደፐ ያ ግሾ ኑ ኤረይሳ ጎይኖስ።

²³ ሽን አዋስ ቱማን ጎይነይሳት አያናንነ ቱማተን ጎይናና ዎደይ ማታትስ፤ ሀእካ ጋክስ። ህዛ፥ አዋይ ኮየይ ሀይሳ መላ ኦግያን ጎይነይሳታ።

²⁴ ፆሳይ አያና፤ እያዉ ጎይነይሳት አያናንነ ቱማተን ጎይናናዉ በሴስ” ያግስ።

²⁵ ማጫስያ ዛራዳ፥ “ክርስቶስ ያናይሳ ታኒ ኤራይስ። እ ያ ዎደ ኑስ ኡባባ ኦዳና” ያጋሱ።

²⁶ የሱሲ፥ “ሀ ኔራ ኦደተይ ታኒ እያ” ያግስ።

²⁷ ኤንቲ ኦደትሽን፥ የሱሳ ታማረት ብዳ በሳፈ ስምዶሶና። የሱሲ ማጫሳራ ኦደትሽን ኤንቲ በእድ ዳሮ ማላለትዶሶና። ሽን ማጫሴኮ፥ “አይ ኮያይ?” ዎይኮ የሱሳኮ፥ “ኢራ አይስ ኦደታይ?” ግዳይ ኦንካ ባዋ።

²⁸ ሄሳፈ ጉየ፥ ማጫስያ ባ ሃ ኦቱዋ አጋዳ ጉየ ካታማ ባዳ አሳኮ፥

²⁹ “ታኒ ኦዳባ ኡባ ታዉ ኦድዳ አድያ በአናዉ የተ። እ ክርስቶሳ ግዳንደሻ?” ያጋሱ።

³⁰ አሳይ ካታማፐ ከይድ የሱሳኮ ብዶሶና።

³¹ ሄስ ሀንሽን፥ እያ ታማረት የሱሳኮ፥ “ጉባ ማርክ” ያግድ ዎስዶሶና።

³² ሽን እ፥ “ታዉ ህንተ ኤሮና ካ ታ መይስ ደኤስ” ያግስ።

³³ ሄሳ ግሾ፥ እያ ታማረት ባንታ ግዶን፥ “እያዉ ምያባ አስ ኤሆና አገና” ያግዶሶና።

³⁴ የሱሲ ኤንታኮ፥ “ታ ካይ ታና ኪትዳይሳ ሸንያ ኦናይሳነ እያ ኦሱዋ ፖላናይሳ።

³⁵ ህንተ፥ ‘ኦይዱ አጌናፐ ጉየ ካይ ጫከታና’ ጌከትዬ? ሽን ታኒ ህንተዉ ኦዳይስ፤ ካይ ካፅድ ሺሾስ ጋክዳይሳ ሎይ ፄልተ።

³⁶ ዘረይስነ ጫከይስ እስፈ ኡፋይታና መላ ጫከይስ ዳሞዝያ ኤኬስ ቃስ ካ መርና ደኦስ ሺሼስ።

³⁷ ህዛ፥ ‘እሶይ ዘሬስ፤ ሀንኮይ ቃስ ጫኬስ’ ግያ ኦዳይ ቱማ።

³⁸ ህንተ ዳቡርቦናይሳ ሺሻና መላ ታኒ ህንተና ኪታስ። ሀራት ኦ ዳቡርዳሱዋን ገልድ ህንተ ኤንታ ዳቡራ አይፍያ ኤክደታ” ያግስ።

³⁹ ማጫስያ፥ “እ፥ ታኒ ኦዳ ኡባባ ኦድስ” ጋዳ ማርካትዳ ግሾ ሄ ካታማን ደእያ ሳማረ አሳፐ ዳሮት የሱሳ አማንዶሶና።

⁴⁰ ሳማረ አሳይ የሱሳኮ ይድ፥ ባንታ ማታን ጋምአና መላ የሱሳ ዎስን እ ያን ናምኡ ጋላስ ኡትስ።

⁴¹ እ ኦድያ ቃላ ግሾ ካሰይሳፈ ዳሮ አሳይ አማንዶሶና።

⁴² ቃስ ኤንቲ ማጫሴኮ፥ “ሀእ ኑ አማነይ ኑ ሁጰን እ ገይሳ ስእዳ ግሾሳፈ አትሽን፥ ኔኒ ማርካትዳ ግሾሳ ግደና። ቃስ እ ቱማ ሀ አላምያ አሸይሳ ግደይሳ ኑኒ ኤርዳ” ያግዶሶና።

እስ ሹማ ናአ ፓፁዋ

⁴³ ናምኡ ጋላሳፐ ጉየ፥ የሱሲ ያፐ ከይድ ጋልላ ቢታ ብስ።

⁴⁴ የሱሲ ባ ሁጰን፥ “ናበይ ባ ቢታን ቦንቸተና” ያግድ ካሰትድ ኦድስ።

⁴⁵ የሱሲ ጋልላ ጋክዳ ዎደ ጋልላ አሳይ እያ ሞክዶሶና። አይስ ጊኮ፥ ፓስካ ባኣለ ቦንችያ ጋላስ ኤንቲ የሩሳላመን ደእያ ግሾ እ ኦዳባ ኡባ በእዶሶና።

⁴⁶ የሱሲ ሃ ዎይነ ኡሽ ላምዳ በሳ፥ ጋልላን ደእያ ቃና ካታማ ብስ። ቅፍርናሆማን ካዎ ኬን ኦያ እስ ሹማስ ናአይ ሀርገትስ።

⁴⁷ የሱሲ ይሁዳፐ ጋልላ ይዳይሳ ሄ ሹማይ ስእድ እያኮ ይስ። ሀይቃናዉ ማትዳ ባ ናኣ ብድ ፓና መላ የሱሳ ዎስስ።

⁴⁸ የሱሲ ሹማኮ፥ “ፆሳይ ኦያ ማላታታነ ኦራባታ በኦና ደእሸ ህንተ ኡባራካ አማነከታ” ያግስ።

⁴⁹ ሹማይ ዛሪድ፥ “ጎዳዉ፥ ታ ናአይ ሀይቆና ደእሽን ታራ የርክ” ያግስ።

⁵⁰ የሱሲ፥ “ነ ሶ ባ፤ ነ ናአይ ፓፃና” ያግስ። ሄ ሹማይ የሱሲ ግዳይሳ አማንድ ባ ሶ ብስ።

⁵¹ እ ባ ሶ ብሽን እያ አይለት እያኮ ይሸ እያራ ኦገን ጋሄትድ፥ “ነ ናአይ ፓፅስ” ግዶሶና።

⁵² እ ባ አይለታ ባ ናኣስ አይ ሳተን ሎእዳኮ ኦይችስ። ኤንቲ ዛሪድ፥ “ዝነ ላፑን ሳተን ምሻይ አግስ” ያግዶሶና።

⁵³ ናኣ አዋይ የሱሲ ባኮ፥ “ነ ናአይ ፓፃና” ግዳይ ሄ ሳትያን ግደይሳ አኬክስ። ሄሳ ግሾ፥ እነ እያ ሶ አሳ ኡባይ አማንዶሶና።

⁵⁴ ሄስ የሱሲ ይሁዳፐ ጋልላ ይድ ኦዳ ናምአን ማላታ።