Yohaanisa 20 - ጌሻ ማፃፋ

የሱሳ ሀይቆፐ ደንዱዋ

¹ ዎጋ ዎደ ዎንታ ቡሮ ጌዮና ደእሽን፥ ማግደላ ማይራማ፥ የሱሲ ሞገትዳ ዱፉዋ ባዳ ሹቻይ ሄ ዱፉዋ ዶናፐ ደንድዳይሳ በአሱ።

² ስሞን ጰፅሮሳኮነ የሱሲ ዶስያ ሀንኮ ታማርያኮ ዎፃ ባዳ፥ “ዱፉዋፐ ጎዳ ኤፍዶሶና፤ እያ አዉን ዎዳኮ ኑ ኤሮኮ” ያጋሱ።

³ ሄሳ ግሾ፥ ጰፅሮስነ ሀንኮ ታማረይ ከይድ ዱፉዋ ብዶሶና።

⁴ ናምአይካ እስፈ ዎፅዶሶና፥ ሽን ሀንኮ ታማረይ ጰፅሮሳፐ አድ ስንትድ ዱፉዋ ጋክስ።

⁵ ሄ ታማረይ ሆክድ፥ ሞጎ አፍላ በእስ፥ ሽን ዱፉዋን ዎቤና።

⁶ ስሞን ጰፅሮስ እያ ካል ይድ፥ ዱፉዋን ዎድ ሞጎ አፍላይ ያን ደኤይሳ በእስ።

⁷ ቃስ የሱሳ ሁጰን ፃፀትዳ አፍላይ ፃፀትዳ መላ ዱማ እስ በሳን ደኤይሳ በእስ። ሄ አፍላይ ዱማ ደኤስፐ አትሽን፥ ሞጎ አፍላራ እስፈ ዴና።

⁸ ሄ ዎደ፥ ስንትድ ዱፉዋ ጋክዳ ሀንኮ ታማረይ ገል በእድ አማንስ።

⁹ የሱሲ ሀይቆፐ ደንዳናዉ በሰይሳ ኦድያ ጌሻ ማፃፋ ቃላ ኤንቲ ቡሮ አኬክቦኮና።

¹⁰ ሄሳፈ ጉየ፥ እያ ታማረት ባንታ ሶ ስም ብዶሶና።

የሱሲ ማግደላ ማይራምስ ቆንጭስ

¹¹ ሽን ማይራማ ሄ ዱፉዋ ዶናን ኤቃዳ ዬካሸ ሆካዳ ዱፉዋ ግዶ ፄላሱ።

¹² ቦ ማኦ ማእዳ ናምኡ ኪታንቾት የሱሳ አሀይ ዝንእዳ በሳን እሶይ ሁጰሶራ ሀንኮይ ቶሆሶራ ኡትዳሽን በአሱ።

¹³ ኤንቲ ኢኮ፥ “ማጫሰተ፥ አይስ ዬካይ?” ያግድ ኦይችዶሶና። እያ፥ “ኤንቲ ታ ጎዳ ኤፍዶሶና፤ ኤንቲ አዉን ዎዳኮ ታኒ ኤርከ” ያጋሱ።

¹⁴ ሄሳ ግዳፐ ጉየ፥ እያ ጉየ ስማ ፄልያ ዎደ፥ የሱሲ ያን ኤቅዳይሳ በአሱ። ሽን እ የሱሳ ግድዳይሳ ኤራቡኩ።

¹⁵ የሱሲ ኢኮ፥ “ማጫሰተ፥ አይስ ዬካይ? ኦና ኮያይ?” ያግድ ኦይችስ። ማይራማ አታክልተ ኦሳንቹዋ ዳንን፥ “ጎዳዉ፥ ነ ኤክዳባ ግድኮ፥ እያ አዉን ዎዳኮ ታዉ ኦዳርኪ። ታኒ እያ ኤካና” ያጋሱ።

¹⁶ የሱሲ ኢኮ፥ “ማይራመ” ያግስ። እያ እያኮ ስማዳ፥ እብራወ ዶናን “ረቡን” ያጋሱ። ሄሳስ ብርሸይ “አስታማርያዉ” ጉሱ።

¹⁷ የሱሲ ኢኮ፥ “ታኒ ቡሮ ታ አዋኮ ቦና ግሾ፥ ታና ኦይኮፋ። ሽን ታ እሻታኮ ባዳ፥ ‘ታኒ ታ አዋኮነ ህንተ አዋኮ፥ ታ ፆሳኮነ ህንተ ፆሳኮ፥ ስማና ግስ’ ጋዳ ኤንታዉ ኦዳ” ያግስ።

¹⁸ ማግደላ ማይራማ ጎዳ በእዳይሳነ እዉ ሄሳ እ ኦድዳይሳ ባዳ እያ ታማረታስ ኦዳሱ።

የሱሲ ባ ታማረታስ ቆንጭስ

¹⁹ ዎጋ ዎደ ኦማርስ፥ እያ ታማረት አይሁደታስ ያይድ ካርያ ጎርድድ ሺቅ ኡትዳሽን፥ የሱሲ ይድ፥ ኤንታ ግዶን ኤቅድ፥ “ሳሮይ ህንተዉ ግዶ” ያግስ።

²⁰ ሄሳ ግድ ስሚድ ባ ኩሽያነ ባ ምያ ኤንታ በስስ። እያ ታማረት ጎዳ በእዳ ዎደ ዳሮ ኡፋይትዶሶና።

²¹ የሱሲ ዛሪድ ኤንታኮ፥ “ሳሮይ ህንተዉ ግዶ፤ ታ አዋይ ታና ኪትዳይሳዳ ታንካ ህንተና ኪታይስ” ያግስ።

²² ሄሳ ግዳፐ ጉየ፥ ኤንታ ቦላ ኡፉ ግድ ፑንስ። ቃስ፥ “ጌሻ አያና ኤክተ።

²³ ህንተ አቶ ግዳ አሳ ናጋራይ አቶ ጌተታና። ህንተ አቶ ጎናይሳታ ናጋራይ አቶ ጌተተና” ያግስ።

የሱሳነ ቶማሳ

²⁴ ሽን ታማነ ናምኡ ታማረታፐ እሶይ፥ ድድሞሳ ጌተትያ ቶማስ፥ የሱሲ ይዳ ዎደ ኤንታራ ዴና።

²⁵ ሄሳ ግሾ፥ ሀንኮ እያ ታማረት ቶማሳኮ፥ “ኑኒ ጎዳ በእዳ” ያግዶሶና። ሽን ቶማስ ኤንታኮ፥ “ምስማረን እ ጫደትዳ እያ ኩሽያን ደእያ ቤታ በኦናነ ሄ ቤታ ታ ብራን ቦቾና፥ ቃስ ታ ኩሽያ እያ ምየን የዳ በኦና አማንከ” ያግስ።

²⁶ ሳምንታፈ ጉየ፥ የሱሳ ታማረት ቃስካ ሶን ሺቅድ ኡትዶሶና፤ ቶማስካ ኤንታራ ደኤስ። ካረይ ጎርደትድ ደእሽን የሱሲ ይድ፥ ኤንታ ግዶን ኤቅድ፥ “ሳሮይ ህንተዉ ግዶ” ያግስ።

²⁷ ሄሳፈ ጉየ፥ የሱሲ ቶማሳኮ፥ “ታ ኩሽያ ነ ብራን ቦቻዳ በአ። ቃስ ነ ኩሽያ ታ ምይያን የዳ በአ። ኔኒ ስፓ፥ አማና” ያግስ።

²⁸ ቶማስ ዛሪድ፥ “ታ ጎዳዉ፥ ታ ፆሳዉ” ያግስ።

²⁹ ያትን የሱሲ፥ “ኔኒ ታና በእዳ ግሾ አማናዳሳ፥ ሽን ታና በኦና አማንዳይሳት አንጀትዳይሳታ” ያግስ።

³⁰ የሱሲ ሀ ማፃፋን ፃፈትቦና ሀራ ዳሮ ማላታታ ባ ታማረታ ስንን ኦስ።

³¹ ሽን የሱሲ እ ክርስቶሳ፥ ፆሳ ናኣ ግደይሳ ህንተ አማናና መላነ አማንድ እያ ሱንን ደኦ ደማና መላ ሃይስ ፃፈትስ።