Yohaanisa 2 - ጌሻ ማፃፋ

የሱሲ ያጋኖ በሳን

¹ ሄን ጋላስ ጋልላ ቢታን ቃና ካታማን ያጋኖይ ያጋነትስ። የሱሳ አይያ ሄ ያጋኑዋን ደአዉሱ።

² የሱሲካ ባ ታማረታራ እስፈ ሄ ያጋኑዋ ፄገትስ።

³ ዎይነ ኡሻይ ዉርን፥ የሱሳ አይያ የሱሳኮ፥ “ኤንታዉ ዎይነ ኡሻይ ዉርስ” ያጋሱ።

⁴ የሱሲ ዛሪድ፥ “ታ አየ፥ ነ ሀይሳን ገሎፓ? ታ ዎደይ ቡሮ ጋክቤና” ያግስ።

⁵ የሱሳ አይያ ኦሳንቾታኮ፥ “እ ህንተዉ ኦድያባ አይብባ ግድኮካ ኦተ” ያጋሱ።

⁶ አይሁደት ባንታ ጌሾ ዎጋስ ጎኤትያ ኡሱፑን ሹቻ ባት ሄ በሳን ደኦሶና። እስ እስ ባይ ናምኡ ዎይኮ ሄ ፁጋ ኦይኬስ።

⁷ የሱሲ ኦሳንቾታኮ፥ “ባታን ሃ ኩንተ” ያግስ። ኤንቲ ባታስ ዶና ጋካናዉ ሃ ኩንዶሶና።

⁸ የሱሲ ኤንታኮ፥ “ሀእ ዱቅድ ያጋኑዋ አዋተን ፖልሰይሳስ እምተ” ያግስ። ኤንቲ እያዉ ኤፍድ እምዶሶና።

⁹ ያጋኑዋ አዋተን ፖልሰይስ ዎይነ ኡሽ ላመትዳ ሃ ጋንፅ ኤክድ አዉፐ ይዳኮ ኤርቤና፥ ሽን ሃ ኩንዳ ኦሳንቾት ኤሮሶና። ያጋኑዋ አዋተን ፖልሰይስ ማችዉ ኤከይሳ ፄግድ፥

¹⁰ “ኦንካ ሎኦ ዎይነ ኡሻ አሳ ኮይሮትድ ኡሼስ። ያትድ አሳይ ኡይ ካልዳፐ ጉየ፥ ቅራርያ እሜስ። ሽን ኔኒ ሎኦ ዎይነ ኡሻ ሀኖ ጋካናዉ ዎ አጋዳሳ” ያግስ።

¹¹ የሱሲ ሀ ኮይሮ ማላታ ጋልላ ቢታን ቃና ካታማን ኦስ፤ ሄሳን ባ ግታተ በስስ። እያ ታማረት እያ አማንዶሶና።

¹² ሄሳፈ ጉየ፥ የሱሲ ባ አየራ፥ ባ እሻታራነ ባ ታማረታራ እስፈ ቅፍርናሆማ ካታማ ብድ ጉ ጋላስ ጋምእስ።

ፆሳ ኬፈ ዛልኤይሳታ ከስስ

¹³ አይሁደት ቦንችያ ፓስካ ባኣለ ጋላሳይ ማታትን የሱሲ የሩሳላመ ብስ።

¹⁴ ብድ ፆሳ ኬን ቦራታ፥ ሚዛታ፥ ዶርሳታነ ሆለታ ባይዘይሳታነ ባንታ ኦይድያን ኡትድ ሚሸ ላመይሳታ ደምስ።

¹⁵ እ ፁርቃፈ ዶቅድ አሳ ኡባ ኤንታ መሄታራ ፆሳ ኬፈ ጎድድ ካረ ከስስ። ሚሸ ላመይሳታ ፃርጴዛታካ አ የግድ ኤንታ ሚሽያ ላልስ።

¹⁶ ሆለ ባይዘይሳታ፥ “ሀ ሆለታ ሀይሳፈ ከስተ፤ ታ አዋ ኬ ግያ ኦፍተ” ያግስ።

¹⁷ እያ ታማረት ጌሻ ማፃፋን፥ “ታኒ ነ ኬስ ምሸትያ ምሻይ ታና ታማዳ ፁጌስ” ጌተትድ ፃፈትዳይሳ አኬክዶሶና።

¹⁸ ሄሳፈ ጉየ፥ አይሁደት ዛሪድ፥ “ነ ሀይሳ ኦናዉ ነዉ ማት ደኤይሳስ ኑና አይ ማላታ ኦዳ በሳኔ?” ያግዶሶና።

¹⁹ የሱሲ፥ “ሀ ፆሳ ኬ ላልተ፤ ታኒ ሄ ጋላሳን ዛራዳ ኬፃና” ያግስ።

²⁰ ቃስካ አይሁደት፥ “ሀ ፆሳ ኬ ኬፃናዉ ኦይታማነ ኡሱፑን ላይ ኤክስ፥ ሽን ኔኒ ሄ ጋላሳን ኬፃኔ?” ያግዶሶና።

²¹ ሽን የሱሲ ኦድያ ፆሳ ኬይ ባ አሳተባ።

²² ሄሳ ግሾ፥ የሱሲ ሀይቆፐ ደንድዳፐ ጉየ እያ ታማረት እ ሄሳ ግዳይሳ አኬክዶሶና። ቃስ ኤንቲ ጌሻ ማፃፋን ፃፈትዳይሳነ የሱሲ ኦድዳይሳ አማንዶሶና።

²³ የሱሲ ፓስካ ቦንችያ በሳን የሩሳላመን ደእሽን፥ እ ኦዳ ማላታታ በእድ ዳሮ አሳይ እያ አማንዶሶና።

²⁴ ሽን የሱሲ አሳ ኡባ ኤርያ ግሾ ኤንታ አማንበና።

²⁵ አሳ ዎዛናን ደእያባ እ ባ ሁጰን ኤርያ ግሾ አሳባ ኦንካ እያዉ ኦዳና መላ ኮሽቤና።