Yohaanisa 18 - ጌሻ ማፃፋ

የሱሲ ኦይከትስ

¹ የሱሲ ዎሳ ኦንግዳፐ ጉየ፥ ባ ታማረታራ ቀድሮና ዛንጋራ ፕንድ፥ ሄ በሳን ደእያ አታክልትያ ግዶ ገልዶሶና።

² የሱሲ ኡባ ዎደ ባ ታማረታራ ያን ሺቅያ ግሾ የሱሳ አድ እምዳ ይሁድ ሄ በሳ ኤሬስ።

³ ሄሳ ግሾ፥ ይሁድ ፓኖሰ፥ ፆምፐ፥ ቶራነ ጎንዳለ ኦይክዳ ዳሮ ዎታዳረታ፥ ካህነ ሀላቃትነ ፋርሳወት ኪትዳ ፆሳ ኬ ናግያ ዎታዳረታ ካለ ኤክድ፥ ሄ በሳ ብስ።

⁴ የሱሲ ባና ጋካና ሀንያባ ኡባ ኤርድ፥ ጋፃ ከይድ፥ “ኦና ኮዬቲ?” ያግስ።

⁵ ኤንቲ ዛሪድ፥ “ናዝረተ የሱሳ ኮዮስ” ያግዶሶና። እ ዛሪድ፥ “ታኒ የሱሳ” ያግስ። የሱሳ አድ እምዳ ይሁድ ያን ኤንታራ ኤቅስ።

⁶ እ፥ “ታኒ የሱሳ” ግዳ ዎደ ኤንቲ ጉየ ሺቅድ፥ ሳአን ኩንድዶሶና።

⁷ የሱሲ ቃስካ፥ “ኦና ኮዬቲ?” ያግድ ኦይችስ። ኤንቲ፥ “ናዝረተ የሱሳ ኮዮስ” ያግዶሶና።

⁸ እ ዛሪድ፥ “ታኒ የሱሳ ግደይሳ ህንተዉ ኦዳስ። ህዛ፥ ህንተ ታና ኮያባ ግድኮ ሀይሳታ የድተ” ያግስ።

⁹ እ ሄሳ ግዳይ፥ “አዋዉ፥ ኔኒ ታዉ እምዳይሳታፐ ሀር አቶሽን እሱዋካ ይሳብከ” ግዳይስ ፖለታና መላሳ።

¹⁰ ስሞን ጰፅሮሳስ ማሻይ ደኤስ። እ ሄ ማሻ ሾድድ ካህነ ሀላቃ አይልያስ ኡሻቻ ሀይ ሾጭድ፥ ቃንፅ የግስ። ሄ አይልያ ሱንይ ማልኮሳ።

¹¹ የሱሲ ጰፅሮሳኮ፥ “ነ ማሻ ሾሁዋን ዛራ። ታ አዋይ ታዉ እምዳ ፁአፐ ታኒ ኡዮናባ ነዉ ዳኒ?” ያግስ።

የሱሲ ሃና ስንን

¹² ሮመ ዎታዳረትነ ኤንታ ሀላቃይ ፆሳ ኬ ናግያ ዎታዳረታራ እስፈ የሱሳ ኦይክድ ቃችዶሶና።

¹³ ኮይሮ የሱሳ ሃናኮ ኤፍዶሶና። ሃን ሄ ላይ ካህነ ሀላቃ ግድያ ቃያፋ ቦሎ።

¹⁴ ቃያፍ፥ “አሳ ኡባ ግሾ፥ እስ አስ ሀይቅኮ ሎኦ” ግድ ካሰ አይሁደታ ዞርዳይሳ።

ጰፅሮስ የሱሳ ኮይሮ ካዱዋ

¹⁵ ስሞን ጰፅሮስነ ሀራ እስ ታማረይ የሱሳ ካልድ ብዶሶና። ካህነ ሀላቃይ ሄ ሀራ ታማርያ ሎይ ኤሬስ። ሄሳ ግሾ፥ እ የሱሳራ ካህነ ሀላቃ ዛባ ገልስ።

¹⁶ ሽን ጰፅሮስ ካረራ ድርሳ ፐንገን ኤቅስ። ካህነ ሀላቃይ ኤርያ ሀራ ታማረይ ካረ ከይድ፥ ፐንግያ ናግያ ናኤስ ኦድድ፥ ጰፅሮሳ ጋ ገልስስ።

¹⁷ ፐንግያ ናግያ ናእያ ጰፅሮሳኮ፥ “ኔኒ፥ ሄ አድያ ታማረታፐ እሱዋ ግድኪ?” ያጋሱ። ጰፅሮስ ዛሪድ፥ “አካይ፥ ታኒ ግድከ” ያግስ።

¹⁸ ሳአይ ሜግያ ግሾ፥ አይለትነ ናገይሳት ፂፋ ታማ ኤድ፥ ካዮሶና። ጰፅሮስካ ኤንታራ ኤቅድ ታማ ካዬስ።

ካህነ ሀላቃይ የሱሳ ኦይችስ

¹⁹ ካህነ ሀላቃይ የሱሳ፥ እያ ታማረታባነ እያ ትምርትያባ ኦይችስ።

²⁰ የሱሲ ዛሪድ፥ “ታኒ አሳ ኡባስ ቆንጨን ኦዳስ። ታኒ አይሁደ ኡባይ ሺቅያ አይሁደ ዎሳ ኬንነ ፆሳ ኬን ኡባ ዎደ ታማርሳስ። ጌማን አይኮካ ኦዳብከ።

²¹ ያትን፥ ኔኒ ታና አይስ ኦይቻይ? ታ ኦድሽን ስእዳ አሳ ኦይቻ። ሄ አሳይ ታኒ ኦድዳይሳ ኤሮሶና” ያግስ።

²² የሱሲ ሄሳ ግዳ ዎደ፥ ሄ በሳን ኤቅዳ ዎታዳረታፐ እሶይ የሱሳ ባቅድ፥ “ካህነ ሀላቃስ ሀይሳዳ ዛራይ?” ያግስ።

²³ የሱሲ ዛሪድ፥ “ታኒ ኢታባ ኦድዳባ ግድኮ ሀይሳን ደእያ አሳ ኡባ ስንን ኦዳ። ሽን ታኒ ቱማ ኦድዳባ ግድኮ ታና አይስ ባቃይ?” ያግስ።

²⁴ ሄሳ ግሾ፥ ሃን፥ የሱሲ ቃሸትዳ መላ ካህነ ሀላቃ ቃያፋኮ የድስ።

ጰፅሮስ የሱሳ ናምአን ካድስ

²⁵ ጰፅሮስ ያን ኤቅድ፥ ታማ ካይሽን፥ ሀራት እያኮ፥ “ኔኒ ሀ አድያ ታማረታፐ እሱዋ ግድኪ?” ያግስ። ጰፅሮስ ዛሪድ፥ “አካይ፥ ታኒ ግድከ” ያግድ ካድስ።

²⁶ ካህነ ሀላቃ አይለታፐ እሶይ፥ ጰፅሮስ ሀይ ቃንፅዳ አድያ ዳቦይ፥ ጰፅሮሳኮ፥ “ታኒ ነና እያራ አታክልትያ ግዶን በአብክና?” ያግድ ኦይችስ።

²⁷ ጰፅሮስ ቃስካ ካድስ፤ ኤለስድ ኩቶይ ዋስ አግስ።

የሱሲ ጵላፆሳ ስንን

²⁸ ዎንታ ጉራ፥ ኤንቲ የሱሳ ቃያፋ ሶፐ ደርያ ሃረይሳ ኦሶ ኬ ኤክ ኤፍዶሶና። አይሁደት ፓስካ ባኣለ ካ ማናዉ ባንታና ቱንሶና መላ ደርያ ሃረይሳ ኦሶ ኬ ገልቦኮና።

²⁹ ሄሳ ግሾ፥ ጵላፆስ ኤንታኮ ካረ ከይድ፥ “ሀ አድያ አይስ ሞተቲ?” ያግስ።

³⁰ ኤንቲ፥ “እ ኢታ ኦናባ ግድያኮ ኑኒ እያ ኔኮ ኤሆኮ” ያግዶሶና።

³¹ ጵላፆስ ዛሪድ፥ “ህንተ እያ ኤክ ኤፍድ፥ ህንተ ህገይ ገይሳዳ እያ ቦላ ፕርድተ” ያግስ። አይሁደት፥ “ኦናካ ዎያ ማት ኑስ ባዋ” ያግዶሶና፤

³² ሄስ ሀንዳይ የሱሲ አይ መላ ሀይቆ ሀይቃነኮ ኤርሳናዉ ኦድዳይስ ፖለታናሳ።

³³ ጵላፆስ ባ ኦሶ ኬ ዛር ገልድ፥ የሱሳ ፄግድ፥ “ኔኒ አይሁደ ካዎ?” ያግድ ኦይችስ።

³⁴ የሱሲ ጵላፆሳ፥ “ሀ ኦይሻ ኔኒ ኔፐ ኦይቻየ ዎይኮ ሀራ አስ ነዉ ታባ ኦድዴ?” ያግስ።

³⁵ ጵላፆስ ዛሪድ፥ “ታ አይሁደ አሴ? ነ አሳይነ ካህነ ሀላቃት ነና ታዉ አድ እምዶሶና። ነ አይ ኦዲ?” ያግስ።

³⁶ የሱሲ፥ “ታ ካዎተይ ሀ አላምያና ግደና። እ ሀይሳን ግድያኮ ታ አይሁደታ ሀላቃታስ አዳ እመቶና መላ ታ አይለት ታዉ ኦለታና። ሽን ታ ካዎተይ ሀ አላምያና ግደና” ያግስ።

³⁷ ሄሳ ግሾ፥ ጵላፆስ የሱሳኮ፥ “ያትን፥ ኔኒ ካዎዬ?” ያግድ ኦይችስ። የሱሲ ዛሪድ፥ “ቱማ ታ ካዎ ግደይሳ ነ ጋዳሳ። ታኒ የለትዳይነ ሀ አላምያ ይዳይ ቱማተስ ማርካታናሳ። ቱማ ባጋ ግድዳ ኦንካ ታኒ ገይሳ ስኤስ” ያግስ።

³⁸ ጵላፆስ፥ “ቱም አይቤ?” ያግስ። ጵላፆስ ሄሳ ግዳፐ ጉየ አይሁደታኮ ካረ ከይድ፥ “ታኒ እያፐ አይ ኢታካ ደማብከ።

³⁹ ሽን ፓስካ ባኣለ ጋላስ፥ እስ አሰ ህንተዉ ቃሾፐ ብልያ ሜዘይ ደኤስ። ታኒ ህንተዉ አይሁደታ ካዋ ብላና መላ ኮዬቲ?” ያግስ።

⁴⁰ ኤንቲ ዛሪድ፥ ባንታ ቃላ ቁ ኦድ፥ “ባርባና ብላፈ አትሽን፥ እያ ግደና” ያግዶሶና። ሽን ባርባን ፓንጋ።